ދުނިޔޭގެ ފުރަތަމަ ބޯޑަރ މައިލްސް ޕްރޮގްރާމް ރާއްޖޭގައި ތަޢާރަފްކުރަނީ
ޓޫރިޒަމް މިނިސްޓްރީ އާއި މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަންސް (އެމްއެމްޕީއާރްސީ) އަދި އިމިގްރޭޝަނާއި ޓޫރިޒަމް ސިނާއަތު ގުޅިގެން "މޯލްޑިވްސް ބޯޑާ މައިލްސް" ގެ ނަމުގައި ޕްރޮގްރާމެއް ތައާރަފު ކުރަން ތައްޔާރު ވެއްޖެއެވެ.
ދުނިޔޭގެ އެކި ކަންކޮޅު ތަކުން ރާއްޖެ އަންނަ ޓޫރިސްޓުންނަށް ޕޮއިންޓް ލިބި ގިނަ އިނާމު ތަކެއް ލިބޭ، މިމައިލްސް ޕްރޮގްރާމު ތައާރަފް ކުރަނީ މިރެއެވެ. މިއީ މުޅި ދުނިޔޭގައި ވެސް މިފަދަ ޕްރޮގްރާމެއް ތައާރަފްކުރާ ފުރަތަމަ ފަހަރެވެ.
ބޯޑަރު ހުރަސްކޮށް ރާއްޖެ އަންނަ ފަތުރުވެރިންނަށް ޕޮއިންޓް ލިބޭގޮތަށް ފަރުމާކޮށްފައިވާ މިޕްރޮގްރާމުގައި ހާއްސަ އޮކޭޝަން ތަކަށް ރާއްޖެ އަންނަ ޓޫރިސްޓުންނަށް ވެސް ޕޮއިންޓް އިތުރު ވެއެވެ.
މި ޕްރޮގްރާމުގައި ތިން ޕެކޭޖެއް ތައާރަފު ކުރާނެ އެވެ. ބްރޯޒް ޕެކޭޖުގެ ނަމަކީ "އައިދަ" އެވެ. އަދި ސިލްވަ "އަންތަރަ" އަދި ގޯލްޑް "އަބާރަނަ" އެވެ. ހާއްސަ ބެނެފިޓްސް ތަކެއް މި ޕެކޭޖުތަކުގައި ހިމެނޭނެ އެވެ. މި ޕެކޭޖުތަކުގެ ތަފުސީލް މިރޭ ދިނުމަށް ވަނީ ހަމަޖެހިފައެވެ.
ކޮވިޑުގެ ހާލަތާއި ގުޅިގެން ރާއްޖޭގެ ބޯޑަރުތައް ބަންދު ކުރުމަށްފަހު އަލުން ހުޅުވާލާފައިވަނީ ޖުލައި 15 ގައެވެ. ބޯޑަރުތައް އަލުން ހުޅުވާލި ފަހުން މިހާތަނަށް ރާއްޖެ އައިސްފައި ވަނީ 16،000 ފަތުރުވެރިންނެވެ.
