އިންކަމް ސަޕޯޓް އެލަވަންސްގެ ގޮތުގައި 89.8 މިލިއަން ރުފިޔާ ދޫކޮށްފި
ކޮވިޑް-19ގެ ސަބަބުން އިގްތިސާދަށް ލިބުނު ގެއްލުމުގެ ސަބަބުން ވަޒީފާއަށް އަސަރުކުރި މީހުންނަށް ދޭ އިންކަމް ސަޕޯޓު އެލަވެންސްގެ ގޮތުގައި މިހާތަނަށް ޖުމްލަ 89.8 މިލިއަން ރުފިޔާ ދެވިފައިވާ ކަމަށް ފިނޭންސް މިނިސްޓްރީ އިން ހާމަކޮށްފިއެވެ.
ފިނޭންސް މިނިސްޓްރީން އެންމެ ފަހުން އާންމުކުރި ތަފާސް ހިސާބުތަކަށް ބަލާއިރު ސެޕްޓެމްބަރުމަހުގެ 24 ވަނަ ދުވަހުގެ ނިޔަލަށް 8648 ފަރާތަކަށް އިންކަމް ސަޕޯޓުގެ ގޮތުގައި 89.8 މިލިއަން ރުފިޔާ ވަނީ ދޫކުރެވިފައެވެ.
އިންކަމް ސަޕޯޓު އެލަވަންސަށް އެދި އެޕްލިކޭޝަން ހުށަހަޅަން ޖެހެނީ މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ދަށުން ހިންގާ ޖޮބް ސެންޓަރަށެވެ. ޖޮބް ސެންޓަރގެ ވެބްސައިޓުގައި އިންކަމް ސަޕޯޓު އެލަވަންސް ލިބޭ ފަރާތްތަކުގެ މައުލޫމާތުތައް ދަނީ ހިއްސާކުރަމުންނެވެ.
މި އެލަވެންސަށް ޝަރުތު ހަމަވާނީ މިދިޔަ އަހަރުގެ ޑިސެމްބަރު މަހުގެ އެއްވަނަ ދުވަހުން ފެށިގެން ވަޒީފާ އަށް ނުރަނގަޅު އަސަރުކޮށްފައިވާ ފަރާތްތަކެވެ.
އެގޮތުން އޮގަސްޓު މަހުގެ އެލަވެންސަށް އެދުމުގެ މުއްދަތު މިރޭ ދަންވަރު 12 އަށް ހަމަވާއިރު، ސެޕްޓެމްބަރު މަހުގެ އެލަވެންސަށް އެދުމުގެ މުއްދަތު އަންނަ އޮކްޓޫބަރު މަހުގެ 30 ގެ ނިޔަލަށް ހަމަވާނެއެވެ.
