ކޮވިޑް-19: ފިޔަވަތީގެ ކުޑަކުދިންތަކަކާއި މުވައްޒަފުންތަކެއް ފައްސިވެއްޖެ
ދައުލަތުގެ ބެލުމުގެ ދަށުން ހުޅުމާލޭގައި ކުޑަކުދިން ބަލަހައްޓަމުން އަންނަ ފިޔަވަތީގެ މުވައްޒަފުންތަކަކާއި ކުޑަކުދިންތަކެއް ކޮވިޑް-19 އަށް ފައްސި ވެއްޖެއެވެ.
މިރޭ ބޭއްވި ނޫސްވެރިންގެ ބައްދަލުވުމުގައި ހެލްތު އެމަޖެންސީ އޮޕަރޭޝަންސް ސެންޓަރ (އެޗްއީއޯސީ) ގެ ތަރުޖަމާނު ޑރ.ނަޒްލާ ރަފީގް ވިދާޅުވީ، މިދިޔަ ސެޕްޓެމްބަރު މަހުގެ 30 ވަނަ ދުވަހު ފިޔަވަތީގައި ކުޑަކުދިން ބެލެހެއްޓުމުގައި މަސައްކަތް ކުރާ ފަރާތެއް ބަލީގެ އަލާމާތްތަކެއް ހުރުމާ ގުޅިގެން ސާމްޕަލް ނެގި ޓެސްޓު ކުރެވުނު ކަމަށާއި އޭނާގެ ނަތީޖާ މި މަހުގެ އެއްވަނަ ދުވަހު ލިބުނުއިރު ކޮވިޑަށް ފައްސި ވެފައިވާ ކަމަށެވެ.
އެ ކޭސްގެ ކޮންޓެެކްޓް ޓްރޭސިންގެ ތެރެއިން 54 ކޮންޓެކްޓެއް ދެނެގަނެވި ކަރަންޓީނު ކުރެވުނު ކަމަށާއި، އޭގެތެރެއިން 19 ސާމްޕަލެއް ނެގުނު ކަމަށް ވެސް ޑރ. ނަޒްލާ ވިދާޅުވިއެވެ.
ޑރ. ނަޒްލާ ވިދާޅުވީ، އެސާމްޕަލްތަކުގެ ތެރެއިން ކުޑަކުދިން ބެލެހެއްޓުމުގައި ހަރަކާތްތެރިވާ ފަރާތަކާއި އަދި އެއް ކުއްޖަކު، މިމަހުގެ ހަތަރުވަނަ ދުވަހު ކޮވިޑް-19 އަށް ފައްސިވެފައިވާ ކަމަށެވެ.
މީގެ އިތުރުން އެތަނުން ރެންޑަމް ސާމްޕަލްތަކާއި، ކަރަންޓީނުގައި ތިބި ކުޑަކުދިންގެ ސާމްޕަލްތަކެއް ވެސް ނެގި ކަމަށާއި އެގޮތުން ކަރަންޓީނުގައި ތިބި ކުދިންގެ ތެރެއިން ހަތް ކުއްޖަކާއި އަދި ކުޑަކުދިން ބެލެހެއްޓުމުގައި ހަރަކާތްތެރިވާ ތިން ފަރާތެއް އިއްޔެ ކޮވިޑަށް ފައްސި ވެފައިވާއިރު، މިއަދު ވެސް ކުދިން ބެލެހެއްޓުމުގެ ކަންކަން ކުރާ މުވައްޒަފެއް ވަނީ މިބައްޔަށް ފައްސި ވެފައި ކަމަަށް ޑރ. ނަޒްލާ ވިދާޅުވިއެވެ.
ފިޔަވަތިން ކުދިން ފައްސިވުމާއި ގުޅިގެން، އަޅަންޖެހޭ ސަލާމަތީ ފިޔަވަޅުތައް އަޅާފައިވާ ކަމަށާއި މިހާރު އެތަނުގެ ހާލަތު ރަނގަޅުކަމަށް ޑރ.ނަޒްލާ ވިދާޅުވިއެވެ.
