ފިނިކަމެއް ނެތް ހުރަގެ ތަކުގައި މައިންބަފައިން ގެންގުޅޭކަމީ މިއަދު ފެންނަ ހަގީގަތެއް: ހުތުބާ
އަޅުގަނޑުމެންގެ މާތްވެގެންވާ އިސްލާމްދީނަކީ އެންމެ ފުރިހަމަވެގެންވާ ދީނެވެ. މި މަތިވެރި ދީނުގައި ހުރިހާ ކަމެއްގެ ހައްލު ބަޔާން ކުރައްވާފައިވެއެވެ. އަދި އަޅުގަނޑުމެން ދިރިއުޅުމުގައި ކުރަންވީ ކަންކަމާއި ނުކުރަންވީ ކަންކަން ބަޔާން ކޮށްދެއްވަވާފައިވެއެވެ. އަޅުގަނޑުމެންގެ ރަސޫލާ އަޅުގަނޑުމެންނަށް ދަސްކޮށްދެއްވި ރިވެތި އަޚްލާގަކީ އޭގައި އަޅުގަނޑުމެން ހިފައިފި ނަމަ މަގު ފުރެދިގެން ނުދާނޭ އެއްޗެކެވެ. އެގޮތުން އަޅުގަނޑުމެންނަށް ޒުވާން އުމުރު ހެޔޮގޮތުގައި ހިފުމަށް އަންގަވާފައިވާއިރު އުމުރުން ދުވަސްވީ މީހުންނަށް ކަމޭހިތައި އަޅައިލުމަށް ވެސް ދީނުގައި އަންގަވާފައި ވެއެވެ، މިއަދުގެ ހުުކުރު ޚުތުބާގައި އަލި އަޅުވާލައިފައި ވަނީ އުމުރުން ދުވަސްވީ މީހުންނަށް ކަމޭހިތައި އެމީހުންނަށް އަޅާލުމާ ބެހޭގޮތުންނެވެ.
ބޮޑެތި މީހުންނަށް އިހްތިރާމް ކުރުމަކީ އިސްލާމީ މަތިވެރި އަޅުކަންތަކުގެ ތެރޭގައި ހިމެނޭ ކަމެއް ކަމުގައި ހުތުބާގައި ފާހަގަ ކޮށްފައިވެއެވެ. އަދި އެއީ ހަމަ އެކަނި ރީތި އާދައަކާއި ސުލޫކެއް ނޫން ކަމާއި އެހެނެއްކަމަކު، އެއީ އިސްލާމީ އަދަބެއް ކަމުގައިވެސް ހުތުބާގައި ބުނެފައި ވެއެވެ. މިކަމަކީ ދީނުގައި ވާޖިބު ކުރައްވާފައިވާ ކަމެއް ކަމަށާއި މިކަމުގެ ޒިންމާ ޒުވާން ޖީލުތަކުގެ ބޮލުގައި އަޅުއްވާފައިވާ ކަމަށް ހުތުބާގައި ފާޙަގަ ކޮށްފައިވެއެވެ.
"އުމުރުން ދުވަސްވީ މީހުންނަށް ހެޔޮކޮން ހިތުމާއި، ހެޔޮ ފޯރުވުމާއި، އިހްސާންތެިރވުމާއި، މުޖުތަމައުގެ ކަންތައްތަކުގައި ބައިވެރިކުރުމާއި، ކަންކަމުގައި މަޝްވަރާ އާއި ޚިޔާލު ހޯދުމަކީ، އަޅުގަނޑުމެން ކުރާ ކަންކަމުގައި މާތްﷲ ބަރަކާތް ލައްވާނޭ ކަމެކެވެ." ޚުތުބާގައި އިތުރަށް ބުނެފައިވެއެވެ.
ހުތުބާގައި އިތުރަށް ފާހަ ގަ ކޮށްފައިވަނީ އުމުރުން ދުވަސްވީ މީހުންނަށް ފުރައްސާރަކޮށް، މަލާމާތްކޮށް އުޅުމަކީ މަދުން ނަމަވެސް މުޖުތަމައުން ފެންނަމުންދާ ހިތާމަވެރި މަންޒަރެއް ކަމަށެވެ. އަދި އުމުރުން ދުވަސްވީ މީހުންނަށް ކުރާ އަނިޔާގެ ތެރޭގައި އެންމެ ގިނައީ އިހުމާލުވުމުގެ މައްސަލަތައް ކަމަށް ހުތުބާގައި ބުނެފައިވެއެވެ. މީގެ ތެރޭގައި، އާއިލާގެ ތެރެއިންނާއި މުޖުތަމައުގެ ތެރެއިންވެސް ވެވޭ އިހުމާލުތައް ހުތުބާގައި ވަނީ ފާހަގަކޮށްފައެވެ.
އެގޮތުން ހުތުބާގައި ބުނެފައިވަނީ، ތިމާމެން އަރާމު ތަންމަތީގައި، ފިނި ކޮޓަރި ތަކުގައި، ނިދާއިރު އެ ތަނަވަސްކަމާއި މުއްސަނދިކަން ހޯދައިދިނުމަށް މަސައްކަތްކުރި އުމުރުން ދުވަސްވެފައިވާ މައިންބަފައިން، ވައިރޯޅީގެ ފިނިކަމެއް ނެތް ހުރަގެ ތަކުގައި ގެންގުޅޭ ކަމީ ދެބަސްވެވެން ނެތް ހަގީގަތެއް ކަމަށެވެ. އަދި އުމުުރުން ދުވަސްވީ މީހުންނަށް ސަރުކާރުން ދޭ އިނާޔަތް އެމީހުންނަށް ނޭނގި ބޭނުން ކުރާ މަންޒަރުވެސް ފެންނަ ކަމަށް ހުތުބާގައި ބުނެފައި ވެއެވެ.
މީގެ އިތުރުންވެސް، ކޮންމެ މީހަކުވެސް ދުނިޔޭގައި ހުރެއްޖެ ނަމަ އުމުުރުން ދުވަސްވެ ގައިބާރު ދޫވެ މުސްކުޅިވާނެ ކަން ހަނދާންކޮށް އުމުރުން ދުވަސްވީ މީހުންނަށް ކަމޭހިތުމަށް ހުތުބާގައި ގޮވާލައްވާފައިވެއެވެ.
