ކޮވިޑް-19: ސާމްޕަލް ނެގި ކުއްޖާއާ ބައްދަލުކޮށް އިކުރާމް މާފަށް އެދިއްޖެ
ރައްޔިތުންގެ މަޖިލީހުގެ ދިއްގަރު ދާއިރާގެ މެންބަރު އިކުރާމް ޙަސަން ކޮވިޑް-19 އަށް ޓެސްޓު ކުރުމަށް ސާމްޕަލް ނެގި ސިއްޙީ ޚިދުމަތްތެރިޔާއާ ބައްދަލުކޮށް، މާފަށް އެދިއްޖެއެވެ.
މެންބަރު އިކުރާމް މާފަށް އެދިފައި މިވަނީ، މިދިޔަ ހުކުރު ދުވަހު އިކުރާމްގެ ސާމްޕަލް ނެގިއިރު އެޚިދުމަތްތެރިޔާއާއި މާރާމާރީ ހިންގާފައިވާ ކަމަށް ބުނާ ތުހުމަތުތަކެއް ފެންމަތިވުމާއި ގުޅިގެންނެވެ.
މާފަށް އެދިފައިވާކަން ހާމަކުރައްވަމުން މެންބަރު އިކުރާމް ކުރެއްވި ޓްވީޓެއްގައި ވިދާޅުވެފައިވަނީ، އޭނާ މިއަދު "ޝިފާނާ (ސާމްޕަލް ނެގި ފަރާތް) އާއި ޝިފާނާގެ މަންމަ އާއި ބައްދަލު" ކުރި ކަމަށާއި އިކުރާމަށް ބުނެވުނު ބަހަށް އަދި ކުރެވުނު ކަމަކަށް މާފަށް އެދިފައިވާނެ ކަމަށެވެ.
"މިހިނގާ ދިޔަ ކަންތަކާއި ގުޅިގެން އެޗްއީއޯސީ އާރްއާރްޓީ ޓީމުގެ ހުރިހާ މުވައްޒަފުން ކިބައިންވެސް މާފަށް އެދެން" އިކްރާމް ވިދާޅުވެފައިވެއެވެ.
ސިއްޙީ ޚިދުމަތްތެރިޔާ ކިބައިން މިއަދު އިކުރާމް މާފަށް އެދިފައިވާއިރު، މީގެ ކުރިން އޭނާވަނީ މާރާމާރީއެއް ހިންގި ކަމަށް އިންކާރު ކުރައްވާފައެވެ.
