އުކުޅަހު ކައުންސިލްގެ އޮޑިޓް ރިޕޯޓުގައި މާލީ ބޮޑެތި އިހުމާލުތަކެއް
ދައުލަތުގެ މާލިއްޔަތު ގަވާއިދާ ހިލާފަށް އއ. އުކުޅަހު ކައުންސިލުން ބޮޑެތި މަސައްކަތްތަކެއް ބަޔަކާ ހަވާލުކޮށްފައިވާކަމާއި، ތިޖޫރީއަށް ޖަމާކުރަންޖެހޭ ފައިސާ މުވައްޒަފުންގެ މޭޒު ވަތްގަނޑުގައި ބަހައްޓާކަން އެ ކައުންސިލްގެ 2024ވަނަ އަހަރުގެ އޮޑިޓް ރިޕޯޓުން ހާމަވެއްޖެއެވެ.
އޮޑިޓަރ ޖެނެރަލްގެ އޮފީހުން އާންމުކޮށްފައިވާ އަރިއަތޮޅު އުތުރުބުރީ އުކުޅަހު ކައުންސިލްގެ 2024ވަނަ އަހަރުގެ ކޮމްޕްލަޔަންސް އޮޑިޓް ރިޕޯޓުގައިވާ ގޮތުން، ލިބޭ އާމްދަނީ ގަވާއިދުން ބޭންކަށް ޖަމާކުރުމުގެ ބަދަލުގައި މުވައްޒަފެއްގެ މޭޒު ވަތްގަނޑުގައި ގިނަ އަދަދެއްގެ ފައިސާ ބަހައްޓާފައި ހުރިކަން ވަނީ ފާހަގަކުރެވިފައެވެ. އަދި ތިޖޫރީގައި ހުންނަންޖެހޭ ފައިސާގެ އަދަދާއި ލިޔެކިޔުންތަކުން ދައްކާ އަދަދު ދިމާނުވާއިރު، ތިޖޫރީން 8,925 ރުފިޔާ މަދުކަން ވެސް ވަނީ ހާމަވެފައެވެ.
މީގެ އިތުރުން، އާންމުކޮށް އިއުލާނު ކުރުމަކާ ނުލައި 245,000 ރުފިޔާގެ ފުޓުބޯޅަ ދަނޑު މަރާމާތުކުރުމުގެ މަސައްކަތް އަމިއްލަ ޖަމިއްޔާއަކާ ހަވާލުކޮށްފައިވެއެވެ. އަދި ގަބުރުސްތާނު ފާރު ރޭނުމަށް ބޭނުންވާ ތަކެތި ހޯދުމުގައި ވެސް، އިއުލާނު ނުކުރުމަށްޓަކައި ބިލްތައް ބައިބަޔަށް ބަހާލައިގެން 78,862 ރުފިޔާގެ ތަކެތި ހޯދާފައިވާކަން ރިޕޯޓުގައި ވަނީ ފާހަގަކޮށްފައެވެ.
މިއީ ދައުލަތުގެ މާލިއްޔަތު ގަވާއިދާ ހިލާފަށް، ވާދަވެރި ބީލަމުގެ މަރުހަލާ ގެއްލޭގޮތަށް ކޮށްފައިވާ ކަންކަމެވެ. ކައުންސިލަށް ލިބެންޖެހޭ އާމްދަނީ ހޯދުމުގައި ވެސް ބޮޑެތި އިހުމާލުތަކެއް ވަނީ ވެފައެވެ. އެގޮތުން ތެލުގެ ވިޔަފާރިކުރުމަށް އެކި އަހަރުތަކުގައި ދޫކޮށްފައިވާ ބިންތަކަކުން ކުލީގެ ގޮތުގައި ލިބެންޖެހޭ 1,034,573 ރުފިޔާ ނުލިބި އެބަހުއްޓެވެ. އަދި ކުއްޔަށް ދޫކޮށްފައިވާ ބިންތަކުގެ އެއްބަސްވުންތަކުގައި އިޖުތިމާއީ ޒިންމާ (ސީއެސްއާރު)ގެ ގޮތުގައި ކުރަން ބަޔާންކޮށްފައިވާ 488,800 ރުފިޔާގެ މަސައްކަތްތަކެއް އެ ފަރާތްތަކުން ނުކޮށް ހުރިއިރު، އެކަންކަން ބަލައި ފިޔަވަޅު އެޅޭނެ ހަރުދަނާ ނިޒާމެއް ކައުންސިލްގައި ނެތްކަން އޮޑިޓުން ވަނީ ހާމަވެފައެވެ.
މި މައްސަލަތައް އިސްލާހުކުރުމަށް އޮޑިޓަރ ޖެނެރަލް ވަނީ ގިނަ ލަފާތަކެއް ކައުންސިލަށް ދެއްވާފައެވެ. މީގެ ތެރޭގައި ލިބޭ ފައިސާ ވީއެންމެ އަވަހަކަށް ބޭންކަށް ޖަމާކުރުމަށާއި، ދައުލަތުގެ މާލިއްޔަތު ގަވާއިދާ އެއްގޮތަށް ބީލަމުގެ އުސޫލުން މަސައްކަތްތައް ހަވާލުކުރުމަށާއި، ނުލިބި ހުރި ކުލީގެ ފައިސާތައް ހޯދަން އަވަސް ފިޔަވަޅުތަކެއް އެޅުމަށް ވަނީ އަންގާފައެވެ.
