ކުނބުރުދޫގައި އަލަށް އިމާރާތްކުރި ފުލުހުންގެ މަރުކަޒު ހުޅުވައިފި
ރާއްޖޭގެ މީހުން ދިރިއުޅޭ ކޮންމެ ރަށެއްގައި ފުލުހުން ގާއިމުވެ ތިބެގެން ރައްޔިތުންނަށް ސަލާމަތާއި ރައްކާތެރިކަން ކަށަވަރުކޮށްދިނުމުގެ ސިޔާސަތުގެ ދަށުން، އދ. ކުނބުރުދޫގައި އަލަށް އިމާރާތްކުރި ފުލުހުންގެ މަރުކަޒު ރަސްމީކޮށް ހުޅުވައި ހިދުމަތް ދޭން ފަށައިފިއެވެ.
ރޯޑް ޑިވެލޮޕްމަންޓް ކޯޕަރޭޝަން (އާރްޑީސީ)އާ ހަވާލުކޮށްގެން، 2025އޮކްޓޫބަރު 7ގައި ބިންގާއަޅައި، އަހަރެއްހައި ދުވަހުގެ ތެރޭގައި މަސައްކަތް ނިންމައި މިއަދު ހުޅުވި މި މަރުކަޒު ހުޅުވައިދެއްވީ، ދާހިލީ ސަލާމަތާއި ފަންނިއްޔާތާ ބެހޭ ވަޒީރު ޢަލީ އިހުސާނާއި ކޮމިޝަނާ އޮފް ޕޮލިސް އަހުމަދު މުހައްމަދެވެ.
މި ރަސްމިއްޔާތުގައި ވާހަކަފުޅުދައްކަވަމުން ވަޒީރު އަލީ އިހުސާން ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުޢިއްޒު ވެރިކަމާ ހަވާލުވެވަޑައިގެންނެވިއިރު ރާއްޖޭގެ 63ރަށެއްގައި ފުލުހުން ފިޒިކަލީ ގާއިމުވެ ތިބެގެން ހިދުމަތް ދެމުން ނުދާކަމަށެވެ. ނަމަވެސް، ފުލުހުން ކުރެއްވި ބުރަ މަސައްކަތުން މިހާރު އެ 63ރަށުގައި ވެސް ފުލުހުން ގާއިމުވެ ތިބެގެން ހިދުމަތް ދެމުންދާކަން ވަޒީރު ފާހަގަކުރެއްވިއެވެ.
އަދި އޭރު އަމިއްލަ މަރުކަޒުތައް ހުރީ އެންމެ 17ރަށުގައި ކަމަށާއި، ގާތްގަނޑަކަށް 170އެއްހައި ރަށުގައި ފުލުހުން ހިދުމަތް ދެމުންދިޔައީ ކައުންސިލު އިދާރާތަކާއި އަމިއްލަ ތަންތަން ކުއްޔަށް ހިފައިގެން ވަރަށް ދަތި ހާލުގައި ކަމަށް ވިދާޅުވިއެވެ.
