ކޮވިޑް-19: އިތުރު ބަޔަކު ފައްސިވުމާ ގުޅިގެން ކުޅުދުއްފުށި އަނެއްކާވެސް މޮނީޓަރިންގަށް ލައިފި
ހދ. ކުޅުދުއްފުށިން އިތުރު ބަޔަކު ކޮވިޑް-19 އަށް ފައްސިވުމާ ގުޅިގެން އެ ސިޓީ އަނެއްކާ ވެސްމޮނީޓަރިންގަށް ލައިފިއެވެ.
ހެލްތު އެމަޖެންސީ އޮޕަރޭޝަން ސެންޓަރ (އެޗްއީއޯސީ) ގެ އޮފިޝަލު ތަސްލީމާ އުސްމާން މިއަދު ވިދާޅުވީ، ކުޅުދުއްފުށި މޮނީޓަރިންގެ ހާލަތަށް ލެވިފައި މިވަނީ އެރަށުން ކޮވިޑަށް ފައްސިވީ އިތުރު ހަތަރު ކޭސް ފެނިގެން ކަމަށެވެ. އެއީ އުމުރުން 75 އަހަރާއި، 35 އަހަރުގެ މީހެއްގެ އިތުރުން ދެ ކުޑަ ކުދިންނެވެ. އެކުދިންގެ އުމުރަކީ 10 އަހަރާއި 9 އަހަރެވެ.
މިހަތަރު ކޭސް ވެސް ކޮވިޑަށް ފައްސިކަން އެނގިފައިވަނީ މިމަހުގެ 16 ވަނަ ދުވަހު ހެދި ކޮންޓެކްޓް ޓްރޭސިންގެ ތެރެއިން، ބައްޔަށް ފައްސިކަން އިއްޔެ އެނގުމުންނެވެ. ކުޅުދުއްފުށި މޮނީޓަރިންގަށް ލާފައި މިވަނީ އިއްޔެ ފައްސިވީ މީހުންގެ ވެސް ކޮންޓެކްޓް ޓްރޭސިންގ ހެދުމަށާއި ސާމްޕަލް ނެގުމުގެ ކަންކަން ނިމެންދެނެވެ.
މިއީ މިދިޔަ މަހު ކުޅުދުއްފުށީ ޕޮލިސް ސްޓޭޝަނުން ފައްސިވީ ފުލުހެއްގެ ކޮންޓެކްޓް ޓްރޭސިންގެ ދަށުން އެކްލަސްޓަރ އިން ފައްސި ވެފައިވާ މީހުން ކަންވެސް ތަސްލީމާ ފާހަގަ ކުރެއްވިއެވެ.
މޮނީޓަރިންގެ ހާލަތަށް އެސިޓީ ލާފައި އޮންނައިރު، އެޗްޕީއޭ ގެ ޚާއްސަ ހުއްދައަކާއި ނުލާ އެތަނުން އެއްވެސް މީހަކު އަރާފައިބާ ހެދުމަކީ މަނާ ކަމެކެވެ.
Ads by STO
