އަމީންގެ އިތުބާރު ނެތްކަމުގެ މައްސަލަ މަޖިލީހަށް ވައްދައިފި
އަމިއްލަފުޅަށް މަގާމުން އެކހެރިވެ ވަޑައިގެންފައިވާ ހެލްތު މިނިސްޓަރ ޢަބްދުﷲ އަމީން ގެ އިތުބާރު ނެތްކަމުގެ މައްސަލަ މަޖިލީހަށް ވައްދައިފިއެވެ.
އަމީން އެމަގާމުން މަގާމުން ދުރުކުރުމަށް އިތުބާރު ނެތްކަމުގެ މައްސަލަ މަޖިލީހަށް ވައްދާފައި މިވަނީ، ވެރިކަން ކުރާ ޕާޓީ އެމްޑީޕީ ގެ ޕާލިމަންޓްރީ ގްރޫޕް (ޕީޖީ) ގައި މިކަމާއި ގުޅޭގޮތުން މިއަދު ނެގި ވޯޓުން، އަމީންގެ އިތުބާރު އޮތްކަމަށް ފާސްވެފައި ވަނިކޮށެވެ.
މިއަދު ނެގި ވޯޓުގައި އަމީންގެ އިތުބާރު ނެތްކަމަށް ވޯޓު ދީފައިވަނީ 27 މީހުންނެވެ. އެގޮތަށް ފާސްވުމަށް މަދުވެގެން 29 ވޯޓު ބޭނުން ވެއެވެ.
ހެލްތު މިނިސްޓަރ އަމީންގެ އިތުބާރުނެތްކަމުގެ މައްސަލައިގައި ސޮއިކޮށްފައިވާ ފާހަގަކޮށްލެވޭ މެމްބަރުންގެ ތެރޭގައި އީވާ އަބްދުﷲ، އިމްތިޔާޒް ފަހުމީ، މީކާއިލް އަހުމަދު ނަސީމް، ހަސަން ލަތީފް، ހިސާން ހުސައިން، ހުސައިން ފިރުޝާން އަދި އިބްރާހިމް ރަޝީދު ހިމެނެއެވެ.
ވެންޓިލޭޓަރު ތަކުގެ މައްސަލައިގައި ކޮރަޕްޝަންގެ މައްސަލައެއް އުޅޭކަމަށް ބުނެ މިނިސްޓަރ އަމީންގެ މައްޗަށް ވަނީ ދައުލަތުން ސީރިއަސް ތުހުމަތުތަކެއް ކޮށްފައެވެ. ނަމަވެސް އޭސީސީން ހުށަހެޅި އެމައްސަލަ ނުބެލޭނެ ކަމަށް މިއަދު ޕްރޮސެކިއުޓާ ޖެެނެރަލްގެ އޮފީހުން ވަނީ ނިންމާފައެވެ.
