ހިޔާ ފްލެޓު: ފޯނަށް ނުގުޅޭ 509 މީހެއްގެ ނަން އާއްމުކޮށްފި
ކުރީ ސަރުކާރުގައި ހިންގި "ހިޔާ މަޝްރޫޢު" ގެ ދަަށުން ހުޅުމާލޭ ދެވަނަ ފިޔަވަހީގެ ފްލެޓަށް އެދި އެޗް7 ކެޓަގަރީއަށް ފޯމު ހުށަހަޅާފައިވާ ފަރާތްތަކުގެ ތެރެއިން މިހާތަނަށް ފޯނުން ނުގުޅޭ 509 މީހެއްގެ ނަންތައް އާއްމުކޮށްފިއެވެ.
ފޯނުން ނުގުޅިގެން އާންމުކުރި އެޗް7 ކެޓަގަރީއަކީ އުމުރުން 18 އަހަރާ 40 އަހަރާ ދެމެދުގެ ކައިވެނިކޮށްގެން އުޅޭ ފަރާތްތަކަށް ހާއްސަކޮށްފައިވާ ކެޓަގަރީއެވެ.
އެނގިފައިވާ ގޮތުގައި ހިޔާ މަޝްރޫއުގެ ދަށުން ދޫކުރާ ފްލެޓަށް އެދި ހުށަހަޅާފައިވާ ފަރާތްތަކަށް ޕޮއިންޓް ދީފައިވަނީ އުސޫލާއެއްގޮތަށްތޯ ބަލައި ކަށަވަރުކުރުމަށް ކުރެވޭ މަސައްކަތް ފްލެޓުތަކުގެ މައްސަލަ ބަލާ ކޮމިޓީން އަންނަނީ ކުރަމުންނެވެ.
މިކަމާއި ގުޅޭގޮތުން ރައީސް އޮފީހުން މިއަދު ނެރުނު ބަޔާނެއްގައި ބުނެފައިވަނީ ނަންތައް އާންމު ކުރި 509 ފަރާތްތަކަކީ، ގުޅޭނެ ނަންބަރެއްގެ ގޮތުގައި ދީފައިވާ ނަމްބަރުން، މިހާތަނަށް ނުގުޅޭ ފަރާތްތައް ކަމަށެވެ.
