ވެންޓިލޭޓަރުގެ މައްސަލަ އަލުން ރިވިއު ކޮށްދޭން އެދެން މަޖިލީހުން ފާސްކޮށްފި
ކޮވިޑް-19އާ ގުޅިގެން ރާއްޖެއަށް ގެނައި ވެންޓިލޭޓަރުތައް ގެނައުމުގައި މިނިސްޓްރީ އޮފް ހެލްތުން ކޮރަޕްޝަން ހިންގާފައިވާ ކަމަށް ތުހުމަތު ކުރެވޭ މައްސަލައިގައި ދައުވާ ކުރެވޭނެ ހެއްކެއް ނެތްކަމަށް ޕްރޮސެކިއުޓަރ ޖެނެރަލް (ޕީޖީ) ޙުސެއިން ޝަމީމް ނިންމެވި ނިންމެވުން މުރާޖަޢާ ކޮށްދިނުމަށް އެމަނިކުފާނަށް ލަފާއެރުވުމަށް، ރައްޔިތުންގެ މަޖިލީހުގެ ޖުޑިޝަރީ ކޮމިޓީން އެކުލަވާލި ރިޕޯޓު ފާސްކޮށްފިއެވެ.
ޖުޑިޝަރީ ކޮމިޓީން އެކުލަވާލި މިރިޕޯޓަކީ، ވެންޓިލޭޓަރު މައްސަލައިގައި ދައުލަތަށް ގެއްލިފައިވާ ފައިސާ އަނބުރައި ހޯދައި ދެވެންދެން އެމައްސަލަ މަޖިލީހުން ބެލުމަށް މަޖިލީހުގެ ރައީސް މުޙައްމަދު ނަޝީދު ހުށަހެޅުއްވި ހުށަހެޅުއްވުމަށް އެކުލަވާލާފައިވާ ރިޕޯޓެކެވެ. މިރިޕޯޓް މަޖިލީހުން ފާސްކޮށްފައި ވަނީ ވޯޓުގައި ބައިވެރިވެޑައިގެންނެވި 50 މެމްބަރުންގެ ވޯޓުންނެވެ.
ޖުޑިޝަރީ ކޮމިޓީން އެކުލަވާލައި ރިޕޯޓުގައި ތިން ހުށަހެޅުމެއް އެކޮމިޓީން ވަނީ ފާސްކޮށްފައެވެ.
ޙާލަތާ ގުޅިގެން ރާއްޖެއަށް ބޭނުންވާ ވެންޓިލޭޓަރުތައް ގެނައުމުގައި ކޮރަޕްޝަނަށް މަގުފަހިވާ މުޢާމަލާތްތަކެއް ހިންގާފައިވާކަމަށް އޮޑިޓް ރިޕޯޓުގައި ބުނެފައިވާތީ އޭސީސީން އެމައްސަލަ ތަޙްޤީގުކޮށް ދައުވާކުރުމަށް ޕްރޮސެކިއުޓަރ ޖެނެރަލްގެ އޮފީހަށް ފޮނުވުމުން ޕީޖީން ވަނީ ދައުވާ ނުކުރުމަށް ނިންމާފައެވެ.
