ކޮވިޑް-19: އައްޑޫސިޓީން ފައްސިވީ މީހާގެ ދެވަނަ ސުންކު ނައްސި!
އައްޑޫސިޓީ ހިތަދޫގައި ކޮވިޑް-19 އަށް ފައްސިވެގެން އެކަހެރި ކޮށްގެން ފަރުވާ ދެމުން ދިޔަ މީހާގެ ދެވަނަ ސުންކު (ސާމްޕަލް) ނައްސި ވެއްޖެއެވެ.
އެނގިފައިވާ ގޮތުގައި އެމީހާއަށް ފަރުވާ ދެމުން އަންނަނީ އައްޑޫ އީކިއުޓޯރިއަލް ހޮސްޕިޓަލުގައެވެ.
އެމީހާއަކީ މާލެއިން އައްޑޫ އަށް ގޮސް ކަރަންޓީނުގައި ހުރި މީހެއްކަން ވެސް ވަނީ އެނގިފައެވެ. ނަމަވެސް ކަރަންޓީނު ވެގެން ހުއްޓާ ދިމާވި ސިއްހީ ހާލަތެއްގެ ސަބަބުން ފަރުވާ ކުރުމަށްޓާކައި ފަހުން ހުރީ ހޮސްޕިޓަލްގެ އައިސޮލޭޝަންގައެވެ.
އެނގިފައިވާ ގޮތުގައި އޭނާ ކޮވިޑަށް ފައްސި ވެފައިވާކަން އެނގިފައިވަނީ އައިސޮލޭޝަންގައި ހުރެފައި މޫދަށް ގޮސް އުޅެނިކޮށް ބަލިހާލަތު ގޯސްވުމުން ބަޔަކު އޭނާ ސަލާމަތްކޮށް ހޮސްޕިޓަލަށް ގެންގޮސް ޓެސްޓު ހެދުމުންނެވެ. ކުރިން އޭނާ ކޮވިޑަށް ޓެސްޓު ކޮށްފައި ނުވާކަން ވެސް ހާމަވެފައިވެއެވެ.
ހެލްތު އިމަޖެންސީ އޮޕަރޭޝަން ސެންޓަރު (އެޗްއީއޯސީ)ގެ އޮފިޝަލަކު ވިދާޅުވީ، އެ މީހާގެ ދެވަނަ ސުންކެއް ނަގާފައިވާ ކަމަށާއި، އެ ސުންކު ނައްސި ކަމަށެވެ.
