މީހަކު މަރުވި އެކްސިޑެންޓަކާ ގުޅިގެން ކުޑަކުއްޖަކު ގޭބަންދު ކުރީ ރަނގަޅަށް: ހައިކޯޓު
ހުޅުމާލޭގައި ކުޑަ ކުއްޖަކު ބާރު ސްޕީޑެއްގައި ދުއްވާފައި ދިޔަ ސައިކަލަކުން ޖެހި މީހަކު މަރުވުމުގެ މައްސަލައިގައި އެކުއްޖާ އެއް އަހަރަށް ގޭ ބަންދު ކުރަން ޖުވެނައިލް ކޯޓުން ހުކުމް ކުރީ ރަނގަޅަށް ކަމަށް ހައިކޯޓުން ނިންމައިފިއެވެ.
އުމުރުން 16 އަހަރުގެ ކުއްޖަކު 2017 ވަނަ އަހަރުގެ އޯގަސްޓު މަހު، ބާރު ސްޕީޑެއްގައި ސައިކަލު ދުއްވާފައި ދަނިކޮށް، ދުއްވާފަދިޔަ އެހެން ސައިކަލެއްގައި ޖެހި އެ ސައިކަލު ދުއްވަން އިން އުމުރުން 64 އަހަރުގެ ދިވެހި ފިރިހެނަކަށް އަނިޔާވެ އެމީހާ ވަނީ މަރުވެފައެވެ.
އޭނާ މަރުވީ އެއަހަރުގެ ސެޕްޓެމްބަރު މަހުގައެވެ.
މިމައްސަލާގައި އެ ކުއްޖާ އެއް އަހަރާއި 24 ދުވަހަށް ގޭ ބަންދު ކުރަން ޖުވެނައިލް ކޯޓުން މިދިޔަ އަހަރު ހުކުމްކުރީ މީހަކު މަރުވެ ދިއުމުގެ އިހުމާލުގެ އަމަލެއް ކުރުމުގެ ކުށުގައެވެ.
އެ ކުއްޖާގެ ފަރާތުން އެ މައްސަލަ ހައިކޯޓުގައި އިސްތިއުނާފް ކުރުމުން، އިސްތިއުނާފު ޝަރީޢަތުގައި އިއްޔެ ކުރި ހުކުމުގައިވަނީ ޤާނޫނުލް އުގޫބާތުގެ 53 ވަނަ މާއްދާ ދަށުން ކުޑަކުދިން ކުރާ ކުށްތަކަށް މައާފް ލިބެނިވި ދިފާއު ލިބިގެން ވިޔަސް، އިސްލާމްދީނުގައި ހައްދު ކަނޑައެޅޭ ކުށްތަކާއި އަނިޔާވެރި ކުށްތަކުގެ ޒިންމާ އެ ކުދިން ނަގަން ޖެހޭ ކަމަށާއި، އެ ކުއްޖާ ކުރި އަމަލަކީ ލައިސަންސް ނެތި ބާރު ސްޕީޑުގައި ސައިކަލު ދުއްވުމުން ކަމަށް ވާއިރު، އޭގެ ނަތީޖާއެއްގެ ގޮތުން އެކްސިޑެންޓުވެ މީހަކަށް އަނިޔާވެ، މަރުވުމަކީ އެ ކުށުގެ ޒިންމާ އޭނާ އުފުލަން ޖެހޭ ފަދަ އަނިޔާވެރި ކުށެއް ކަމަށެވެ.
އެހެންކަމުން އެ ހާލަތުގައި މައާފް ލިބެނިވި ދިފާއު އެ ކުއްޖާއަށް ނޯންނާނެ ކަމަށް ވެސް ހައިކޯޓުގެ އެހުކުމުގައި ވެއެވެ.
