ޓޫރިޒަމް މިނިސްޓްރީގެ ޕީއެސް އިސްތިއުފާ ދެއްވައިފި
ޓޫރިޒަމް މިނިސްޓްރީގެ ޕާމަނެންޓް ސެކްރަޓެރީ (ޕީއެސް) ކަމުގެ މަގާމުން އައިޝަތު ސޫޒަން ހަނީފް އިސްތިއުފާ ދެއްވައިފިއެވެ. އޭނާ އެމަގާމުން އިސްތިއުފާ ދެއްވާފައި ވަނީ މަގާމުން ސަސްޕެންޑު ކޮށްފައި ހުއްޓައެެވެ.
ސޫޒަން އެމަގާމުން އިސްތިއުފާ ދެއްވާފައިވާއިރު ސިވިލް ސާވިސް ކޮމިޝަނުން ވަނީ ޓޫރިޒަމް މިނިސްޓްރީގެ ޕާމަނެންޓް ސެކްރެޓަރީގެ މަގާމަށް ބޭފުޅަކު ހޯދުމަށް އިއުލާނު ކޮށްފައެވެ. އެ އިއުލާނުގައި ބުނެފައިވަނީ މި މަހުގެ 19 އާ ހަމައަށް އެ މަގާމަށް ކުރިމަތިލުމަށް ފުރުސަތު ހުޅުވާލާފައިވާ ކަމަށެވެ.
ސިވިލް ސާވިސް ކޮމިޝަނުން ސޫޒަން އެންމެ ފުރަތަމަ ސަސްޕެންޑު ކުރީ މިއަހަރުގެ ސެޕްޓެމްބަރު މަހުގެ 7 ވަނަ ދުވަހުގައެވެ.
އެކޮމިޝަނުން ބުނީ ޕީއެސް ސަސްޕެންޑު ކުރީ ކޮވިޑް19 އާއި ގުޅިގެން ޓޫރިޒަމް މިނިސްޓްރީއިން ކުރި މަސައްކަތްތަކާ ގުޅޭ އޮޑިޓް ރިޕޯޓާއި، އެ މިނިސްޓްރީގެ މުވައްޒަފުންގެ ފަރާތުން ޕީއެސް ސޫޒަންއާ ގުޅިގެން ސިޓީއަކުން ހުށަހެޅިފައިވާ ޝަކުވާތަކާ ގުޅިގެން ކަމަށެވެ.
އެ ސިޓީގައި ސޫޒަންް މުވައްޒަފުންގެ މެދުގައި ތަފާތުކުރުންތައް ގެންގުޅޭ ކަމަށްވެސް ތުހުމަތު ކޮށްފައި ވެއެވެ. އަދި މިނިސްޓްރީގެ ބައެއް އިސްވެރިންނާއި މުވައްޒަފުންނާ ދެމެދު މަސްލަހަތު ގެއްލި މައްސަލަތަކެއް އުފެދޭ ގޮތަށް ސޫޒަން މުއާމަލާތްތައް ކޮށްފައިވާ ކަމަށް ވެސް މުވައްޒަފުން ތުހުމަތު ކޮށްފައި ވެއެވެ.
