ކަނޑިންމަ މުވައްޒަފު އެޅި ވޭން ރިކޯޑްކޮށް މެނޭޖަރަށް ފޮނުވުމުން ވެސް އަޅާނުލި: އާމިރު
ކަނޑިންމަ ރިސޯޓުން ކޮވިޑް-19 އަށް ފައްސިވެގެން ނިޔާވި މުވައްޒަފުގެ ހާލު ރިސޯޓުގެ މެނޭޖްމެންޓުގެ ސަމާލުކަމަށް ގެނައުމަށް ގިނަ މަސައްކަތްތަކެއް މުވައްޒަފުން ކުރި ކަމަށް ކުޑަހުވަދޫ ދާއިރާގެ މެމްބަރު އަހްމަދު އާމިރު ވިދާޅުވެއްޖެ އެވެ.
ކަޑިންމަ ރިސޯޓުގައި ކޮވިޑް ޖެހިގެން ނިޔާވި އާދަމް ނަސީރުގެ މަރާ ގުޅިގެން މަޖިލީހަށް ހުށަހެޅި ކުއްލި މައްސަލައިގައި ބަހުސް ކުރައްވަމުން އާމިރު ވިދާޅުވީ އެމަރުގައި ރިސޯޓުގެ އިހުމާލު ބޮޑު ކަމަށެވެ.
އެގޮތުން އާދަމް ނަސީރު ބަލިވެ އުޅުނު އިރު އެކަން މެނޭޖްމެންޓުގެ ސަމާލުކަމަށް ގެނައުމަށް އޭނާއާ އެކުގައި މަސައްކަތް ކުރި ފަރާތްތައް މަސައްކަތް ކުރި ކަމަށާއި އޭނާ އާއެކު އެއް ކޮޓަރީގައި ދިރިއުޅުނު މީހުން އޭނާ ވޭން އަޅަމުން ދާތީވެ، އެކަމުގެ ބިރުވެރިކަން އިހުސާސް ކުރެވިގެން އެ އަޑު ރިކޯޑުކޮށް، މެނޭޖަރަށް ފޮނުވުމުން ވެސް އަޅާނުލިކަމުގެ މައުލޫމާތު ލިބިފައިވާ ކަމަށެވެ. އާމިރު ވިދާޅުވި އޭނާއަށް ވެސް އެ އޯޑިއޯތައް ލިބިފައިވާ ކަމަށެވެ.
އާމިރު އިތުރަށް ވިދާޅުވީ އާމިރު ވިދާޅުވީ ކަޑިންމަ ރިސޯޓަކީ ކޮވިޑް-19 އަށް ޓެސްޓް ކުރުމުގެ ވަސީލަތްތައް ވެސް ގާއިމް ކުރެވިފައިވާ ރިސޯޓަކަށް ވާއިރު ބަލި ހާލަތު ގޯސްވަމުން ދިޔައިރު އެ ބައްޔަށް ޓެސްޓް ވެސް ނުކުރާ ކަމަށާއި އިތުރު ފަރުވާ ކައިރި މަރުކަޒަކަށް ނުވަތަ މާލެއަށް ގެންދަން ފުރުސަތު ނުދިނުމަކީ ވެސް ރިސޯޓުން ވެފައިވާ ވަރަށް ބޮޑު އިހުމާލެއް ކަމަށެވެ.
"އާއިލާއިންވެސް ގަބޫލު ކުރޭ އާދަމް ނަސީރު ދެން ދުނިޔެއަށް ނުގެނެވޭނެކަން. އެހެން ނަމަވެސް މިކަން ހިނގާފައި ވަނީ ބައެއްގެ އިހުމާލުން ކަމަށްވާތީވެ، އެކަން އަދުލުވެރިކަމާއެކު ބަލައި ދިނުމަކީ މިއަދު އާއިލާގެ ވަރަށް ބޮޑު އާދޭހަކަށް ވާތީވެ، އެކަން އަޅުގަނޑަށް ހުށަހެޅުމުން މި މައްސަލަ މަޖިލީހުގެ ސަމާލުކަމަށް މި ގެނައީ،" އާމިރު ވިދާޅުވިއެވެ.
މިދިޔަ އޮކްޓޯބަރު މަހުގެ 30 ވަނަ ދުވަހު އެބަލީގައި ނިޔާވެފައިވާ އާދަމް ނަސީރު (60އ.) ނިޔާވީ ބަލިވެ އުޅޭތާ ގާތްގަނޑަކަށް 10 ދުވަސް ފަހުންނެވެ. އޭނާ ފަރުވާ އަށް އާއިލާގެ ގާތަށް ފޮނުވައިދޭން ތަކުރާރުކޮށް އެދުމުން ވެސް އެކަން ރިސޯޓުން ހަމަޖައްސައި ނުދީ ލަސްކުރި ކަމަށް އާއިލާގެ ފަރާތުން ވަނީ ތުހުމަތު ކޮށްފައެވެ.
ނަސީރު ކޮވިޑަށް ފައްސިކަން އެނގުނީ ހާލު ސީރިއަސް ވެގެން މިދިޔަ ހުކުރު ދުވަހު ދ. ކުޑަހުވަދޫ ހޮސްޕިޓަލަށް ގެންގޮސް ފަރުވާ ދެނިކޮށް ހާޓްއެޓޭކެއް ޖެހިގެން މަރުވި ފަހުން ހެދި ޕީސީއާރު ޓެސްޓުންނެވެ.
