މުސްލިމުންނަަށް ނަޞްރު ނުލިބި ނާކާމިޔާބު ލިބިފައި ވަނީ اللهގެ ދީން ދޫކޮށްލުމުގެ ސަބަބުން: ހުތުބާ
އަޅުގަނޑުމެންނަށް ދެދުނިޔޭގެ ފަލާހާއި ކާމިޔާބު ލިބުން އޮތީ اللهއާ އެކަލާނގެ ރަސޫލާ ދެއްކެވި މަގުގައި ހިފައިގެންކަން ކަަށަވަރެވެ. ރަސޫލާ ޞައްލަالله ޢަލައިހި ވަސައްލަމް ވަނީ އަޅުގަނޑުމެންނަށް 2 އެއްޗެއް ދޫކުރައްވާފައެވެ. އެއީ ކީރިތި ގުރުއާނާއި އެކަލޭގެފާނު ސުންނަތެވެ.
ނަޞްރާއި ކާމިޔާބީ އަކީ މާތްالله އަށް ތެދުވެރި، އިހްލާސްތެރި މުއުމިންތަކުންނަށް އެކަލާނގެ ދެއްވާ ނިއުމަތެކެވެ. މިއަދުގެ ހުތުބާގައި އަލި އަޅުވާލައިފައިވާ މައުޟޫއު އަކީ “ނަޞްރު ލިބޭނީ اللهގެ ދީނަށް ނަސްރު ދީގެން” މިއެވެ.
މުސްލިމުންނަށް ނަސްރު ނުލިބި ނާކާމިޔާބު ވެފައިވަނީ اللهގެ ދީން ދޫކޮށްލުމުގެ ސަަބަބުން ކަމަށް ހުތުބާގައި ބަޔާން ކޮށްފައިވެއެވެ. އަދި ދުނިޔޭގެ ވަގުތީ އުފާތަކުގައި ގެއްލި އިންސާނާގެ މަސްއޫލިއްޔަތު އަދާ ނުކުރުމުގެ ސަބަބުންކަމަށް ވެސް ފާހަގަ ކޮށްފައި ވެއެވެ. މީގެ އިތުރުން ހުތުބާގައި ބުނެފައި ވަނީ މާތްالله އިންސާނާ ދުނިޔެއަށް ފޮނުއްވީ އެކަލާނގެއަށް އަޅުކަން ހާލިސް ކުރުމަށާއި ދުނިޔެ އާރާސްތުކޮށް ތަރައްގީ ކުރުމަށެވެ.
ކާމިޔާބާއި ފަލާހް ލިބޭނީ ކަންތައްތަކެއްގެ ތެރެެއިން ލައިފައި ކަމަަށްވެސް ހުތުބާގައި ބަޔާން ކޮށްފައިވެއެވެ. އޭގެ ތެރޭގައި ގަބޫލު ކުރާ ހަރުދަނާ އުސޫލްތަކެއްގެ މަތީގައި ސާބިތުވެ ތިބެގެން ކަމަށް ބުނެފައި ވެއެވެ. މުސްލިމުންނަށް ބަލާއިރު އެއީ އީމާންކަމާއި ދީނުގެ އަގީދާއެވެ.
“ކާމިޔާބާއި ނަޞްރު ލިބޭނީ އީމާންތެރިކަމާއި އެއްބައިވަންތަކަމުގެ ތެރެއިންނެވެ. މުޖުތަމަޢެއްގައި ހަރުދަނާކަމާއި އާރާއި ބާރު ދެމިގެން އަންނަނީ އެ މުޖުތަމައެއްގެ ދަރިންގެ މެދުގައި އޮންނަ ގުޅުމެއްގެ ތެރެއިންނެވެ. މި ގުޅުން ހަޤީޤީ ގުޅުމަކަަށް ވާނީ އެމީހުން ހިއްސާވާ ލަނޑުދަނޑިތަކުންނެވެ. އެމީހުން އުފުލާ މަސްއޫލިއްޔަތު ތަކުންނާއި ޒިންމާތަކުންނެވެ. އެމީހުން ތަަހައްމަލް ކުރާ ވޭނާއި ގިލަންތަކާ އިހްސާސްތަކުންނެވެ. މިކަން އޮންނާނީ އެމީހުން އެންމެ މުހިއްމު އަމާޒަށް ވާސިލު ވުމަށްޓަމައި ލާ އެއްބާރުލުމާއި އެއްބައިވަންތަކަމުގެ މަތީގައެވެ.”ޚުތުބާގައި ބުނެފައި ވެއެވެ.
މުސްލިމުންނަށް ނަޞްރު ހޯދޭނީ ސަބަބުތަކުގައި ވެސް ހިފައިގެން ކަމަށް ހުތުބާގައި ބަޔާން ކޮށްފައި ވެއެވެ. މުސްލިމުންނަށް الله ނަޞްރު ދެއްވާނެކަން ގަބޫލުކޮށް، އެކަމަަށްޓަކައި މާތްالله އަށް ދުޢާ ކޮށް ވަކީލް ކޮށްގެން ކަމަށް ވެސް ފާހަގަ ކޮށްފައިވެއެވެ.
ނަޞްރާއި ކާމިޔާބު ހޯދުމަށް އަޅުގަނޑުމެންނަށް ލިބިފައިވާ އެންމެ ބާރުގަދަ ހަތިޔާރަކީ ދުއާއެވެ. އިބްނު ބަޠޫޠާ އޭނާގެ ދަތުރުނާމާގައި ލިޔުއްވާފައިވާ ގޮތުގައި މުސްލިމުންގެ ހަތިޔާރަކީ ދުއާއެވެ. މާތް اللهއަށް އިހްލާސްތެރިވެ އެކަލާނގެ ހަޟްރަތާ ކުއްތަންވެވުނު ވަރަކަށް ދުއާ އިޖާބަ ކުރެއްވުން އަވަސް ވެގެން ދާނެއެވެ.
ދެދުނިޔޭގެ ކާމިޔާބާއި ފަލާހު ލިބޭނީ اللهގެ މަގުގައި ފައިތިލަ ޘާބިތުކޮށް، اللهއަށް ފުރިހަމަައަށް ބަރޯސާވެގެން ކަމުގައި ހުތުބާގައި ފާހަގަ ކޮށްފައިވެއެވެ.
Ads by STO
