އިސްރާޢީލާއެކު ގުޅުން ޤާއިމް ކުރުމަށް ދަނީ ޕްރެޝަރ ކުރަމުން، އެކަމަކު ހުންނާނީ ސާބިތު ކަމާއެކު ފަލަސްތީންގެ މުސްލިމުންނާއެކު: ޕާކިސްތާން
އިސްރާޢީލާއެކު ގުޅުން ޤާއިމް ކުރުމަށް، ޕްރެޝަން ކުރަމުން އަންނަ ކަމަށާއި ނަމަވެސް ފަލަސްތީންގެ މުސްލިމުންނަށް އެމީހުންގެ ޙައްޤުތައް ހޯދައި ނުދޭހާ ހިނދަކު، މުސްލިމުންގެ ޙައްޤުގައި ވާކާލާތު ކުރައްވާނެ ކަމަށް ޕާކިސްތާނުގެ ބޮޑު ވަޒީރު އިމްރާން ޚާން ވިދާޅުވެއްޖެއެވެ.
ޕާކިސްތާނުގެ މީޑިޔާތަކަށް ދިން ބަސްދީގަތުމެއްގައި ބޮޑު ވަޒީރު އިމްރާން ޚާން ވިދާޅުވީ، އިސްރާޢީލަކީ ދައުލަތެއްގެ ގޮތުގައި ބަލައިގަތުމަށް ބޭރުގެ ބޮޑު ބާރަކުން ޕާކިސްތާނަށް ޕްރެޝަރ ކުރަމުން އަންނަ ކަމަށެވެ. ނަމަވެސް ޕާކިސްތާނުން ސާބިތުކަމާއެކު، ފަލަސްތީންގެ މުސްލިމުންގެ ޙައްޤުތަކަށް ވަކާލާތު ކުރުމުގައި ދެމި ހުންނާނެ ކަމަށާއި އިސްރާއީލުން ފަލަސްތީންގެ މުސްލިމުނަށް ކުރަމުންދާ ލާއިންސާނީ އަމަލުތައް އަބަދުވެސް ކުށްވެރި ކުރައްވާނެ ކަމަށެވެ.
އެކުވެރި އަަރަބި އިމާރާތް (ޔޫއޭއީ) އިން ދާދިފަހުން އިސްރާޢީލާއެކު ގުޅުންވަނީ ބަދަހިކޮށްފައެވެ. މިކަމަށް ގިނަ މުސްލިމު ޤައުމުތަކުން ދަނީ ފާޑު ކިޔަމުންނެވެ. ނަމަވެސް ޔޫއޭއީ އިން ވަނީ އިސްރާޢީލާއެކު ވައިގެ މަގުން ދެވޭނެ ގޮތް ހަމަޖައްސާ، އިސްރާޢީލްގައި ހައްދާތަކެތި އެޤައުމުގައި ވިއްކޭ ގޮތަށް ޤާނޫން އިސްލާޙްކޮށްފައެވެ.
ޕާކިސްތާނު ފަހަކަށް އައިސް ވެގެން ގޮސްފައި ވަނީ، މުސްލިމުންގެ ހިމާޔަތުގައި އަޑު އުފުލާ މަދު ޤައުމުތަކުގެ ލިސްޓުން ޖާގަ ހޯދާފައެވެ. މިގޮތުން ފްރާންސްގެ ރައީސް އިސްލާމްދީނަށް ފުރައްސާރަ ކުރުމުން، އެކަން ކުށްވެރިކޮށް، ފްރާނަސްގެ އުފެއްދުންތައް ބޮއިކަޓް ކުރި އެއްޤައުމަކީ ވެސް ޕާކިސްތާނެވެ.
