ބޮޑެތި ވިޔަފާރިތަކަށް ލޯނުގެ ގޮތުގައި 554 މިލިއަން ރުފިޔާ
ކޮވިޑް-19ގެ ސަބަބުން ކުރިމަތިވެފައިވާ މާލީ ދަތިތަކުން އަރައިގަތުމުގެ ގޮތުން ބޮޑެތި ވިޔަފާރިތަކަށް ލޯނުގެ ގޮތުގައި 554 މިލިއަން ރުފިޔާ ބޭންކް އޮފް މޯލްޑިވްސް އިން ދޫކޮށްފިއެވެ.
ފިނޭންސް މިނިސްޓްރީން އެންމެ ފަހުން އާންމުކުރި ތަފާސް ހިސާބުތަކަށް ބަލާއިރު، މިމަހުގެ 19 އާ ހަމައަށް 554.7 މިލިއަން ރުފިޔާ އާއި އަށް މިލިއަން ޑޮލަރު ވަނީ 390 އަށް ވުރެ ގިނަ ވިޔަފާރިއަށް ދޫކޮށްފައެވެ.
މި ލޯނުގެ ހޯދުމަށް 590 ކުންފުންޏަކުން ހުށަހަޅާފައިވާއިރު މީގެ ތެރެއިން 17 އެޕްލިކޭޝަނެއް ވަނީ އެކި ސަބަބުތަކާ ހުރެ ބާތިލް ކޮށްފައެވެ. އަދި 417 ވިޔަފާރިއަކަށް ލޯނު ދޫކުރަން ވަނީ އެޕްރޫވް ކޮށްފައެވެ.
ކޮވިޑް-19 އާ ގުޅިގެން ދައުލަތުން ކުރި ހަރަދުތައް 2.6 ބިލިއަން ރުފިޔާއަށް އަރާފައިވާ ކަމަށް އެންމެ ފަހުގެ ތަފާސް ހިސާބުތަކުން ދައްކައެވެ.
އެގޮތުން ސިއްހީ އަދި އިޖުތިމާއީ ކަންކަމަށް ވަނީ 1.32 ބިލިއަން ރުފިޔާ ހަރަދު ކޮށްފައިވާއިރު އިގުތިސޯދީ ކަންކަމަށް ވަނީ 1.36 ބިލިއަން ރުފިޔާ ހޭދަ ކޮށްފައި ވެއެވެ.
