"އަދުލު ފަސް ކުރުމަކީ އަދުލު ނަގާލުން, އިސްތިޢުނާފް މައްސަލަ ނުނިންމާ އިތުރު ޙުކުމެއް ކުރުމަށް މިސްރާބް ހިފުމަކީ އަނިޔާއެއް"
ކްރިމިނަލް ކޯޓުން ކުރީގެ ރައީސް އަބްދުﷲ ޔާމީން އަބްދުލް ޤައްޔޫމްގެ މައްޗަށް އިއްވި 5 އަހަރު ދުވަހުގެ ޖަލު ހުކުމް، އެމަނިކުފާނުގެ ފަރާތްޕުޅުން ހައިކޯޓުގައި އިސްތިއުނާފު ކޮށްފައިވާ މައްސަލައިގައި ހުކުމްކުރުން ލަސް ކުރުމަކީ އަނިޔާއެއް ކަމުގައި އިދިކޮޅު ޕީއެންސީގެ ޕާލެމަންޓަރީ ގުރޫޕުގެ ލީޑަރު، މަޑުއްވަރީ ދާއިރާގެ މެންބަރ އާދަމް ޝަރީފު ޢުމަރު ވިދާޅުވެއްޖެއެވެ.
ރައީސް ޔާމީން ޖަލަށްލިތާ، މިއަދަށް 1 އަހަރު ފުރިފައިވާއިރު، މިއަދު ޝަރީފް ކުރެއްވި ޓްވީޓެއްގައި ވިދާޅުވީ، އާދަމް، ރައީސް ޔާމީނުގެ ފަރާތްޕުޅުން ހައިކޯޓަށް ހުށަހެޅުއްވި އިސްތިއުނާފު މައްސަލައިގެ ހުރިހާ އަޑުއެހުމެއް ނިމި ހުކުމްކުރުމާ ހަމައަށް ވާސިލުވުމަށް ފަހު ހުކުމް ނުކޮށް ފަސްކުރާ ކުރުމަކީ، ރައީސް ޔާމީނާމެދު އިންސާފުން އަދުލުވެރިކަމާއެކު ކަން ނުކުރާނެ ކަމުގެ ހެއްކެއް ކަމުގައެވެ. އަދި އަދުލު ފަސް ކުރުމަކީ އަދުލު ނަގާލުން ކަމަށާއި އިސްތިޢުނާފް މައްސަލަ ނުނިންމާ އިތުރު ޙުކުމެއް ކުރުމަށް މިސްރާބް ހިފުމަކީ އަނިޔާއެއް ކަމަށެވެ.
ރައީސް ޔާމީނުގެ ފަރާތްޕުޅުން ހައިކޯޓަށް ހުށަހެޅުއްވި އިސްތިއުނާފު މައްސަލައިގެ އެންމެ ފަހުގެ އަޑުއެހުން ބާއްވާފައިވަނީ ސެޕްޓެންބަރު މަހުގެ 1 ވަނަ ދުވަހުއެވެ. އެދުވަހު މައްސަލަ ނިންމަވަމުން ޝަރީޢަތުން އަންގަވާފައިވަނީ އިތުރު ކަމެއް އޮޅުން ފިލުވަން ނެތްނަމަ ދެން އޮންނާނީ އެ މައްސަލާގައި ފައިސަލާކޮށް ހުކުމްކުރުން ކަމަށެވެ.
