އެއާޕޯޓު ހިންގާ ރަށްރަށާއި މީހުން ދިރިއުޅޭ ހުރިހާ ރަށެއްގައި މާސްކު އަޅަން އަންގައިފި
އެއާޕޯޓު ހިންގާ ރަށްރަށާއި މީހުން ދިރިއުޅޭ ހުރިހާ ރަށެއްގައި މާސްކު އަޅަން އެޗްޕީއޭއިން އަންގައިފިއެވެ.
ޞިއްޙަތު ރައްކާތެރިކުރުމުގެ ޤާނޫނުގެ ދަށުން އަޅާފައިވާ ބައެއް ފިޔަވަޅުތަކަށް ބަދަލުތަކަށް މިއަދު ގެނައި ބަދަލުތަކުގެ ތެރޭގައި އެޗްޕީއޭއިން ވަނީ ރައްކާތެރިކަމުގެ ފިޔަވަޅެއްގެ ގޮތުން މީހުންދިރިއުޅޭ ރަށްރަށާއި އެއާޕޯޓު ހިންގާ ރަށްރަށުގައި މާސްކު އަޅައިގެން އުޅުމަށާއި ބޭރުގައި އެކުވެ އުޅޭއިރު 3 ފޫޓުގެ ގައިދުރުމިނެއް ބެހެއްޓުމަށް އަންގާފައެވެ.
މީގެ އިތުރުން ވެސް އެޗްޕީއޭ އިން ވަނީ ފަތުރުވެރިން ފިޔަވައި ރާއްޖެއިން ބޭރުން އަންނަ ފަރާތްތަކާއި މާލެއިން އަތޮޅުތެރެއަށް ދާ ފަރާތްތަކާއި ރިޒޯޓުތަކުން ރަށްރަށަށް ދަތުރުކުރާ ފަރާތްތަކާއި ގެސްޓްހައުސް ހިންގާ ރަށްރަށުން އެހެން ރަށްރަށަށް ދަތުރުކުރާ ފަރާތްތަކަށް ކަރަންޓީނުވުމަށް ކަނޑައަޅާފައިވާ މުއްދަތު ވަނީ 10 ދުވަހަށް ކުރުކޮށްފައެވެ. މި މުއްދަތަށް ފަހު ކަރަންޓީނުން ދޫކުރާނީ ފީ.ސީ.އާރް ނައްސި ނަތީޖާއަކާއެކުގައެވެ.
އަދި .ކޮންމެހެން ދޭންޖެހޭ ޚިދުމަތެއް ދިނުމަށާއި އެކިއެކި މަޝްރޫޢުތަކުގެ މަސައްކަތް ހިންގުމަށް ހުއްދަ ލިބިގެން ކުރު މުއްދަތަށް މާލެއިން އަތޮޅު ތެރެއަށް ދަތުރުކުރާ ފަރާތްތައް 72ގަޑިއިރު ނުވާ ނައްސި ޕީ.ސީ.އާރް ނަތީޖާއަކާއެކު ދަތުރު ކުރުމަށް ވެސް ވަނީ ނިންމާފައެވެ. އަދި މިގޮތަށް ހެދޭ ޓެސްޓަށް ޚަރަދު ކުރަންވާނީ ދަތުރުކުރާ ފަރާތުން ނުވަތަ ދަތުރުގައި ބައިވެރިވާ ފަރާތްތަކަށް ޒިންމާވާ ކުންފުންޏަކުން ނުވަތަ އޮފީހަކުން ކަމުގައި އެޗްޕީއޭއިން ވަނީ ބުނެފައެވެ.
