ބޭވަފާތެރިޔާއެވެ! މިއަދު އަހަރެންގެ ހިތުގައި ތިބާއަށް އޮތީ ޝުކުރުވެރިކަމެވެ.
ބޭވަފާތެރިޔާގެ ނަމުން މުޚާތަބު ކުރަން ޖެހުނަސް ތިއީ އަހަރެން ވަރަށް ލޯބިވީ މީހެކެވެ. ތިބާގެ ލޯބީގައި އަހަރެން އެތައް އަހަރެއް ވޭތު ކުރީމެވެ. ދެމީހުން އެކީގައި އުފާވެރި ވަގުތުތަކެއް ގުނީމުއެވެ. ފޮނި އެތައް ހަނދާންތަކެއް ރައްކާ ކުރީމުއެވެ. ނަމަވެސް އެ ލޯތްބަށް ވިހަލާ ތިބާ އަހަރެން ދުރުކޮށްލީ އެއްވެސް ސަބަބެއް ނެތިއެވެ. އުޒުރެއް ނުދެއްކުނަސް ތިބާއާ މާ އެކަށީގެންވާ އެހެން މީހަކު ފެނުނުކަން އަހަންނަށް އެނގުނެވެ.
އެދުވަހު އަހަރެން ހިތާމަކުރީމެވެ. ރޮއި ހެދީމެވެ. އެތައް ރޭގެ ނިންޖެއް ނަގާލީ ހަމަ ތިބާ ވަކިވުމުގެ އާހުގައެވެ.
އެހެން ނަމަވެސް މިއަދު އަހަރެން އެދުވަސްތައް ސިފަ ކުރަނީ ހަޔާތުގައި ލިބުނު އިބްރަތްތެރި ތަޖުރިބާއެއްގެ ގޮތުގައެވެ. އެއީ އަހަރެންގެ ހަޔާތަށް އައި ހިތާމަވެރި ދުވަހެކޭ ބުނާކަން މިހާރަކު ބޭނުމެއް ނޫނެވެ. ނަމަވެސް އެއީ އަހަރެންގެ ދިރިއުޅުމަށް މިންވަރު ކުރެއްވި ބޮޑު ނަސީބެކެވެ. ތިބާއާ މެދު އަހަރެން ހާދަ އުއްމީދެއް ކުރީމެވެ. އެކީގައި އުފާވެރި ދިރިއުޅުމެއް އުޅުމުގެ ފޮނި ހުވަފެންތަކެއް ދުށީމެވެ. އެހެނަސް އުފާވެރި މޫސުމް ބަދަލު ވެދިޔައީ ދެން އަންނަން އޮތްތަނަށް ތައްޔާރު ވުމަށް ފުރުސަތު ވެސް ނުލިބިއެވެ. އެހާވެސް އަވަހަށެވެ. ބޭވަފާތެރިޔާއެވެ! މިއަދު އަހަރެންގެ ހިތުގައި ތިބާއަށް އޮތީ ޝުކުރުވެރި ކަމެވެ. ތިބާގެ ނިންމުމަކީ އަހަރެންގެ ހަޔާތް އުޖާލާ ކޮށްދިން ކަމެކެވެ.
ތިބާ ވަކިވެގެން ދިޔުމުގެ ހިތާމައިގައި ވަނިކޮށް އަހަރެންގެ ޒަވާޖީ ގުޅުމަށް ބައިވެރިއަކު ހޯދައިދިނީ އަހަރެންގެ މަންމައެވެ. އެއީ އެ މަންމަގެ ބަނޑުގައި ގަރުބަ ގަތީއްސުރެ އަހަންނާމެދު ފަރުވާތެރިވި މަންމައެވެ. އަހަންނަށް ދެރަގޮތެއް ވާން ނޭދޭނެކަން ޔަގީންވާ މަންމައެވެ. އެހެންކަމުން މަންމަގެ އެ އެދުމަށް އަހަރެން އާނ ބަސް ބުނީ ދެރަގޮތެއް ނުވާނެ ކަމުގެ ޔަގީން ކަމާއެކުގައެވެ. ތިބާގެ ހަނދާންތަކާ ދުރުވުމަށް ނިންމައިގެންނެވެ.
މިއަދު އަހަރެންގެ ހަޔާތް މާ އުޖާލާއެވެ. ހަލާލު ލޯބީގެ ގުޅުން މާ އުފާވެރިއެވެ. މާ ހިތްހަމަޖެހެއެވެ. މަންމަގެ ހިތުގައި އެފަދަ ހިތްހެޔޮކަމަކާ ކުލުނެއް ލައްވާ ، އަހުރެންނަށް އިމެއް ނެތް ނިޢުމަތާއި އުފާވެރި ދިރިއުޅުމެއް ލެއްވި ﷲ ތަޢާލާއަށް ޙަމްދު ކުރަމެވެ. އަހަރެންގެ ދިރިއުޅުން މި ގޮތުގައި ލަހައްޓަވާށިއެވެ.
ބޭވަފާތެރިޔާއެވެ. ތިބާއަށް އޮތީ ޝުކުރާއި ހެޔޮ ދުޢާއެވެ.
Ads by STO
