ވައްކަމާ ގުޅިގެން ބައެއް ބޭފުޅުންނަށް ދައުވާ ކުރަން ޕީޖީ ފަހަތަށް ޖެހޭ ކަމަށް ނަޝީދު ތުހުމަތު ކުރައްވައިފި
ކޮވިޑް-19 އާ ގުޅިގެން ހިނގި ވައްކަންތަކާ ގުޅިގެން ބައެއް ބޭފުޅުންނަށް ދައުވާ ކުރުމަށް ޕްރޮސެކިއުޓާ ޖެނެރަލް ހުސެއިން ޝަމީމް ފަހަތަށް ޖެހިވަޑައިގަންނަވާ ކަމުގެ ތުހުމަތު މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު އަނެއްކާ ވެސް ކުރައްވައިފިއެވެ.
މަޖިލީހުގައި މިރޭ ކުރިއަށްދާ ޖަލްސާގައި ވެންޓިލޭޓަރުތަކާ ގުޅިގެން މަޖިލީހަށް ކުރީގެ ހެލްތް މިނިސްޓަރު އަބްދުﷲ އަމީން ދޮގު މައުލޫމާތު ދެއްވި މައްސަލައިގައި އިމްތިޔާޒު ކޮމިޓީން ހުށަހެޅުއްވި ރިޕޯޓާ ގުޅިގެން ނަޝީދު ވިދާޅުވީ މަޖިލީހުގެ އިމްތިޔާޒަށް މީހަކު އަރައިގަތުމަށް ކޮމިޓީން ނިންމައިފިނަމަ ޕްރޮސެކިއުޓާ ޖެނެރަލް އިން ޖެހޭނީ ދައުވާ ކޮށްދޭން ކަމަށާއި އިތުރު ގޮތެއް ނޯންނާނެ ކަމަށެވެ.
"މަޖިލީހުގެ އިމްތިޔާޒަށް އަރައިގަތީމާ. މިތަނުން އެކަން ނިންމީމާ. ޕްރޮސެކިއުޓަރު ޖެނެރަލް ދައުވާ ކޮށްދެއްވާން ޖެހޭނެ. އެއަކު ދެން އިތުރު ބަހަނާއެއް ވާހަކައެއް ނެތް. ޕްރޮސެކިއުޓަރު ޖެނެރަލް ފަހަތަށް އެބަ ޖެހިވަޑައިގަންނަވާ ވައްކަމުގައި ދައުވާ ކުރެއްވުމަށް. ބައެއް ބޭފުޅުންގެ މައްޗަށް." ނަޝީދު ވިދާޅުވި އެވެ.
ނަމަވެސް މިފަދަ މައްސަލަ ތަކުގައި ފަހަތަށް ޖެހިވަޑައި ނުގަނެވޭނެ ކަމަށް ވެސް ނަޝީދު ވިދާޅުވިއެވެ.
އަމީން މަޖިލީހަށް އިތުރުފުޅު ހެއްދެވި މައްސަލައިގައި އިމްތިޔާޒު ކޮމިޓީން ނިންމާފައިވަނީ އަމީން އަމީން މުޅި މަޖިލީހަށް ގަސްދުގައި އޮޅުވާލާފައިވާ ކަމަށާއި މަޖިލީހުގެ އިމްތިޔާޒަށް އަރައިގަތްފައިވާ ކަމަށެވެ.
ވެންޓިލޭޓަރުތައް ގަތުމުގައި ހިނގިކަމަށް އޮޑިޓަރ ޖެނެރަލް ވިދާޅުވާ ވައްކަންތަކާ ގުޅިގެން ޕީޖީން ދައުވާ އުފުލާފައި ނުވާތީ ރައީސް ނަޝީދު ވަނީ ކުރިން ވެސް ޕީޖީ ތަފާތުކުރުންތައް ގެންގުޅޭ ކަމަށް ތުހުމަތު ކުރައްވާފައެވެ.
