އަޅުގަނޑު އަބަދުވެސް ދަންނަވަން އަޅުގަނޑަކީ އިސްލާމީ ދީނީ ދަންނަ ބޭކަލެއް ނޫނޭ: ރައީސް ނަޝީދު
ރައްޔިތުންގެ މަޖިލިހުގެ ރައީސް އަދި ކުރީގެ ރައީސް މުޙައްމަދު ނަޝީދަކީ އިސްލާމީ ދީނީ ދަންނަ ބޭކަލެއް ނޫން ކަމަށް އަބަދު ވެސް ވިދާޅުވަމުން އަންނަ ކަމަށް އެމަނިކުފާނު މިރޭ ވިދާޅުވެއްޖެއެވެ.
ރައްޔިތުން ބޭނުން ސުވާލެއް މަޖިލިސް ރައީސާ ކުރުމަށް ހުޅުވާލި ފުރުސަތުގައި މިރޭ މީހަކު ފޮނުވާފައިވާ ސުވާލެއްގައި ބުނެފައިވަނީ އިސްލާމް ދީނުގެ ވަކި މަންޙަޖެއް ކަމަށްވާ "ސަލަފީ އިސްލާމް" ވަނީ ދީނީ ގޮތުން މުޅި ދިވެހި ރާއްޖޭގައި ހައިޖެކް ކޮށްފައި ކަމަށާއި އެއީ ކީއްވެތޯއެވެ. ރާއްޖޭގައި އޮންނަނީ ދިވެހި އިސްލާމީ މަންޙަޖެއް ކަމަށާއި ސުންނީ އެހެން މަޒްޙަބް ތަކަށް (މިސާލަކަށް ހަނަފީ، ޝާފީ، ޙަންބަލީ، އަދި އިސްލާމިކް ސްޕިރިޗުއަލިޓީ ސޫފިޒަމް އަށް) ރާއްޖޭގައި ޖާގަ ނެތީ ކީއްވެތޯއެވެ.
މިސުވާލަށް ޖަވާބު ދެއްވަމުން ރައީސް ނަޝީދު ވިދާޅުވީ އެމަނިކުފާނަކީ އިސްލާމީ ދީނީ ދަންނަ ބޭކަލެއް ނޫން ކަމަށް އަބަދުވެސް ވިދާޅުވަމުން އަންނަ ކަމަށެވެ.
"އެހެން ނަމަވެސް ދިވެހި ރާއްޖޭގައި އިސްލާމްދީން، ދިވެހިން އިސްލާމް ދީން ބަލައިގަތް ގޮތާއި އަދި ދިވެހިންގެ ތެރޭގައި އިސްލާމް ދީން ފެތުރިގެން އައި ގޮތާއި ދިވެހިން އިސްލާމް ދީނުގެ މައްޗަށް ޤަދަރުކުރުމާއި އަދި އެމައްޗަށް ބޯލެނބުން އުފެދިގެން އައި ގޮތް އެއީ އަޅުގަނޑު އަބަދުވެސް ޝައުޤުވެރިވާ ކަމެއް އަދި ބަލަމުން ވެސް އަންނަ ވާހަކައެއް" ރައީސް ނަޝީދު ވިދާޅުވެފައި ވެއެވެ.
ރައީސް ނަޝީދު ވިދާޅުވީ ދިވެހިންގެ ތެރެއަށް އިސްލާމްދީން ފާޅުވެގެން އައީ މީލާދީ ގޮތުން 1100 ގެ ދުވަސްވަރު ކަމަށެވެ. ޚާއްސަ ގޮތެއްގައި ޢަރަބި ވިޔަފާރިވެރިން ޢަރަބި ކަރައިން ފުރައިގެން ދިޔައީ ސީނު ކަރައަށް (ޗައިނާ އަށް) ކަމަށާއި އެމީހުންގެ އެދަތުރުގައި ނުވަ މަސް ދުވަހު ރާއްޖޭގައި މަޑު ކޮށްފައި ނޫނީ އެމީހުންނަށް ނުދެވޭ ކަމަށެވެ.
"ހުޅަނގު މޫސުމާއި އިރުވައި މޫސުމުގައި ދެފަރާތަށް ވައިޖެހޭ ގޮތް ބަލައިގެން ދަތުރު ކުރަން ޖެހެނީ. ނުވަ މަސް ދުވަހު ރާއްޖޭގައި ތިބޭއިރުގައި އެމީހުން ރާއްޖެއިން މީހުންނާ އެބަ އިނދޭ، ހަމަ އެއާއެކީގައި މުދާ ވެސް ގެނޭ، ވިޔަފާރި ވެސް ކުރޭ، މަޑުމަޑުން ދިވެހި ރާއްޖޭގެ އެކިއެކި ދިމަދިމާލުގައި އިސްލާމީ މުޖުތަމަޢުއާއި ވިޔަފާރި އުފެދެމުން އައީ. މިހެން އައި އިރު ދަރިން ލިބެމުން އައިއިރު، ކިޔަވައިދޭ މުދައްރިސުން އަންނަން ފަށައިފި" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ މިކަންކަމުގެ ވާހަކަތަކާ އެކީގައި ރާއްޖެއަށް އިސްލާމްދީން ފެތުރި، މާލޭގެ ތެރެއަށާއި މެދުރާއްޖެ ތެރެއަށް ފެތުރިގެން އައި ކަމަށެެވެ.
"ހަމައެއާއެކު އައްޑޫ މީދޫ ގައިވެސް މިބާވަތަށް ކަން ހިނގަމުން އާދޭ. އެންމެ ފަހުން އައިސް ދިވެހި ރާއްޖޭގެ ރަސްގެފާނު އިސްލާމްވެ" ރައީސް ނަޝީދު ވިދާޅުވިއެވެ.
ރައީސް ނަޝީދު ވިދާޅުވީ އިސްލާމްދީނުގައި ދުނިޔޭގެ ކަންކޮޅުތަކުގައި ހިނގާ ކޮންމެ ރޫޙެއް ރާއްޖޭގައި ވެސް ހިނގާ ކަމަށެވެ.
ނޫނޭ ކަލެއަކީ ދީނީ ދަންނަބޭކަލެކޭ. ކަލޭ ތިހެން ބުނީމަ މަ ހާދަ ދެރައެއް ވެއޭ. ކަލޭގެ ފަތުވާއަށް އިންތިޒާރު ކޮށްކޮށް މަމިހުންނަނީ އަބަދުވެސް. މީހުނަށް އެބަކިޔާދެން ކަލޭ ފަތުވާ ނެރެފިއޭ ކުރާނެ ކަންކަން ހުސްވީމަ ނޫނީ ނަމާދާ ގާތް ނުވާށޭ. އެހިސާބަށް ދާނީ ކަށްވަޅަށް ދިޔައިމައޭ. ކަލޭ ތީ ހަމަ ދަންނަބޭކަލެއް.