މަސްތުވާތަކެއްޗާއެކު ހުޅުމީދޫން ދެމީހަކު ހައްޔަރުކޮށްފި
އައްޑޫ ސިޓީ ހުޅުމީދޫން މަސްތުވާތަކެއްޗާއެކު ދެމީހަކު ހައްޔަރު ކޮށްފިއެވެ.
ފުލުހުން ވިދާޅުވީ މި ޑިސެމްބަރ މަހުގެ 7 ވަނަ ދުވަހު މަސްތުވާތަކެތި ގެންގުޅެ އެތަކެތީގެ ވިޔަފާރިކުރާކަމަށް ލިބުނު މައުލޫމާތަކާ ގުޅިގެން އިންޓެލިޖެންސާ ހުޅުމީދޫގައި މަސައްކަތްކުރާ ފުލުހުން ގުޅިގެން، އެރަށުގައި ހިންގި އޮޕަރޭޝަންތަކުގައި އެރަށު މަގުމަތިން 29 އަހަރާއި 31 އަހަރުގެ ދެމީހަކު ހައްޔަރު ކޮށްފައިވާ ކަމަށެވެ. މިދެމީހުންނަކީ ވެސް ދިވެހި ފިރިހެނުންނެވެ.
އަދި އެ ދެމީހުން ހުއްޓުވައި ބަލައި ފާސްކުރިއިރު 29 އަހަރުގެ މީހާ އަތުން މަސްތުވާތަކެތިކަމަށް ޝައްކުކުރެވޭ އެއްޗެއް ހުރި 16 ރަބަރު ޕެކެޓް ފެނިފައިވާއިރު، 31 އަހަރު މީހާގެ އަތުން މަސްތުވާތަކެތި ކަމަށް ޝައްކުކުރެވޭ އެއްޗެއްހުރި ރަބަރު ޕެކެޓެއް ފެނިފައިވާ ކަމަށް ވެސް ފުލުހުން ވިދާޅުވިއެވެ.
ފުލުހުން އިތުރަށް ވިދާޅުވީ މި މައްސަލަތަކުގައި ހައްޔަރުކުރި ދެމީހުންގެ ބަންދާމެދު ގޮތެއް ނިންމުމަށް މެޖިސްޓްރޭޓް ކޯޓަށް ހާޟިރުކުރުމުން މިނިސްޓްރީ އޮފް ހޯމްއެފެއަރޒުން ކަނޑައަޅާ ތަނެއްގައި ބަންދުގައި ބެހެއްޓުމަށް 29 އަހަރުގެ މީހާއަށް 15 ދުވަހުގެ މުއްދަތު ދީފައިވާއިރު 31 އަހަރުގެ މީހާ ވަނީ ޝަރުތުކޮށް ދޫކޮށްލާފައިވާ ކަމަށެވެ.
މި މައްސަލަތައް ހުޅުމީދޫ ޕޮލިސް ސްޓޭޝަނުން ގެންދަނީ ތަހުގީގު ކުރަމުންނެވެ.
Ads by STO
