މިއީ ޗެމްޕިއަންސް ލީގުގައި ކުޅުނު އެންމެ ހަގު ކުޅުންތެރިޔާ، އުމުރަކީ 16 އަހަރު!
ފޮޓޯ އިން ތިޔަ ފެންނަނީ ކޮން ކުޅުންތެރިއެއްކަން ގިނަ މީހުންނަށް ނޭނގިދާނެއެވެ. ނަމަވެސް ކުރިއަށް އޮތް ތަނުގައި "ޔޫސޮއުފާ މޮއުކޯކޯ" މި ނަމަކީ އަބަދުހެން އިވޭ ނަމަކަށް ވެސް ވުން ވަރަށް ގާތެވެ.
ޔޫސޮއުފާ އަކީ ޑޯޓްމަންޑުގެ ސީނިއާ ޓީމާ މިދިޔަ މަސް ތެރޭ ގުޅިފައިވާ ޒުވާން، އުއްމީދީ ފޯވާޑެެކެވެ. އިއްޔެ ޑޯޓްމަންޑާއި ޒެނިޓް ބައްދަލު ކުރި މެޗުގައި އޭނާ ކުޅެން އެރުމާއެކު ޗެމްޕިއަންސް ލީގުގައި މިހައިތަނަށް ކުޅުނު އެންމެ ހަގު ކުޅުންތެރިޔާގެ ޝަރަފު ޔޫސޮއުފާއަށް ވަނީ ލިބިގެން ގޮސްފައެވެ.
އިއްޔެގެ މެޗުގައި ޔޫސޮއުފާ ބަދަލު ކުޅުންތެރިއެއްގެ ގޮތުގައި ކުޅެން ނިކުތް އިރު އޭނާގެ އުމުރަކީ 16 އަހަރާއި 18 ދުވަހެވެ. މިއީ މީގެ ކުރިން މި ޝަރަފު އޮތް ސެލްސްޓިން ބަބަޔަރޯ އަށް ވުރެން 67 ދުވަހުގެ ކުރިއެރުމެއްކަން ފާހަގަކޮށްލެވެއެވެ.
ޑޯޓްމަންޑުން ޗެމްޕިއަންސް ލީގުގެ ގްރޫޕް ސްޓޭޖުގެ މެޗުތައް ތާވަލުގެ އެއްވަނައިގައި އޮވެގެން ނިންމާލާފައި ވާއިރު، ކުރިއަށް ހުރި މެޗުތަކުގައި ޔޫސޮއުފާގެ ދައުރު މަޑުމަޑުން އިތުރު ކުރަމުން ގެންދާނެކަމަށް ބެލެވެއެވެ.
ޑޯޓްމަންޑުގެ އިތުރުން ޗެލްސީ، ސެވިއްޔާ، ލާޒިއޯ، ޔުވެންޓަސް، ބާސެލޯނާ ޕީއެސްޖީ އަދި ލައިޕްޒިގް ވަނީ މުބާރާތުގެ ދެވަނަ ބުރަށް ދަތުރުކޮށްފައެވެ.
ފުރަތަމަ ބުރުގެ ބައެއް ޓީމުތަކުގެ ކުޅުން އަދިވެސް ހުރިއިރު، މެންޗެސްޓާ ޔުނައިޓެޑު ވަނީ މިހާރު މުބާރާތާ އަލްވަދާއު ކިޔައިފައެވެ.
