ބޮލުން އިސްތަށި ފޭބުމާ މާބޮޑަށް ފިކުރު ކުރުމާ ގުޅުމެއް ވޭތަ؟
ބައެއް މީހުން ޤަބޫލު ކުރާ ގޮތުގައި ބޮލުން އިސްތަށި ފޭބުމަކީ އުމުރާ ގުޅިފައިވާ ކަމެކެވެ. އެއީ މުސްކުޅި ވަނީ އެވެ.
ނަމަވެސް ހަގީގަތަށް ބަލާއިރު، މިއީ ވަރަށް ގިނަ ޒުވާނުންނަށް ވެސް ކުރިމަތިވާ ކަމެކެވެ. މެދު އުމުރަށް ނާރާއިރު ވެސް ބޮލުގެ މެދު ތަލަވެފައި ތިބޭ މީހުން އަޅުގަނޑުމެން ތެރޭގައި ވެސް މަދެއް ނޫނެވެ. އެހެންކަމުން މިއި ހަމައެކަނި އުމުރުން ދުވަސްވެގެން ވާކަމެއް ނޫންކަން އެބަ އެނގެއެވެ.
ބޮލުން އިސްތަށި ފައިބާ ސަބަބެއް ކަމަށް އެހެން ބައެއް މީހުން ބުނަނީ މާބޮޑަށް ވިސްނާ ފިކުރު ކުރުމެވެ. އެހެންކަމުން އެކަމާއި މިކަމާ އެއްވެސް ގުޅުމެއް ވޭތޯ ބަލައިލީމެވެ.
އެގޮތުން "މާޔޯ ކްލިނިކް" ގައި ޝާއިޢު ކޮށްފައިވާ ރިޕޯޓެއްގައި ބުނެފައިވަނީ، ބޮލުން އިސްތަށި ފޭބުމާއި މާބޮޑަށް ފިކުރު ކުރުމާ ގުޅުން ހުންނަ ކަމަށެވެ.
އެގޮތުން މިފަދައިން ބޮލުން އިސްތަށި ފައިބާ ތިން ހާލަތެއް ވެއެވެ. އެއީ ޓެލޮޖެން އެފްލުވީއަމް، ޓްރިކޮޓިލޮމޭނިއާ އަދި އެލޮޕީޝިއާ އެރިއޭޓާ އެވެ.
ޓެލޮޖެން އެފްލުވީއަމް: މާބޮޑަށް ވިސްނާނަމަ، ބައެއް ހެއާ ފޮލިކަލްސް ރެސްޓު ކުރުމުގެ މޯޑަށް ދެއެވެ. އެފަދަ ވަގުތެއްގައި ފުނާ އެޅުމުން ނުވަތަ ބޯ ދޮތުމުން ވެސް ވަރަށް ފަސޭހައިން އެއިސްތަށިތައް ފައިބަން ފަށައެވެ.
ޓްރިކޮޓިލޮމޭނިއާ: މިހާލަތުގައި ފިކުރު ބޮޑުވެގެން ގޮސް ބޮލުގެ އިސްތަށިތައް އުފުރާލާ ހިތްވާނެއެވެ. މިއި ބައެއް މީހުން ދެކޭ ގޮތުގައި ރުޅިއާއި ހިތާމައާއި، އެކަނިވެރިކަމާއި މިނޫންވެސް ފިކުރުތަކުން ދުރުކޮށްދޭ ކަމެކެވެ. މިފަދަ ފިކުރުތަކެއްގައި ހުރެ ބޮލުގެ އިސްތަށިގަނޑަށް ދަމާނަމަ، ވަރަށް ފަސޭހައިން ބޮލުން އިސްތަށި ފައިބަން ފަށައެވެ.
އެލޮޕީޝިއާ އެރިއޭޓާ: މިހާލަތް މެދުވެރިވާ ވަރަށް ގިނަ ސަބަބުތަކެއް ވެއެވެ. އޭގެ ތެރެއިން އެންމެ ބޮޑު އެއް ކަމަކީ ވަރަށް ބޮޑަށް ، ވަރަށް ގަދަޔަށް ކަމަކާ ވިސްނައި ފިކުރު ކުރުމެވެ. މިހާލަތުގައި ހަށިގަނޑުގެ ދިފާޢީ ބާރުވެސް ވަރަށް ބޮޑަށް ދަށްވެ، ބޮލުން އިސްތަށި ފައިބަން މެދުވެރިވެއެވެ.
ކަންމިހެން ހުރި ނަމަވެސް ތަޖުރިބާކާރުން ބުނާ ގޮތުގައި ކަންކަމާ ފިކުރު ކޮށްގެން ބޮލުން އިސްތަށި ފޭބުމަކީ ދާއިމީ ކަމެއް ނޫން ކަމަށެވެ. ތިމާާ ކަންކަމާމެދު ފިކުރު ކުރާވަރު ކޮންޓްރޯލް ކުރެވިއްޖެނަމަ ބޮލުން އިސްތަށި ފޭބުން ވެސް ކޮންޓްރޯލް ވާނެ ކަމަށް އެމީހުން ބުނެއެވެ.
މިއާއެކު ބޮލުން އިސްތަށި ފޭބުމާ ބެހޭ ގޮތުން ސިއްޙީ މާހިރުން ދެއްވާފައިވާ އެހެން އިރުޝާދެއް ވެސް ވެއެވެ. އެއީ ކަންކަމާމެދު އެވަރަށް ފިކުރު ވެސް ނުކޮށް ހުއްޓާ ތިމާގެ ބޮލުން އިސްތަށި ފައިބަން ފަށާނަމަ، އަވަހަށް ޑޮކްޓަރަށް ދެއްކުމަށެވެ. އެއީ އެފަދައިން ކުއްލިއަކަށް ބޮލުން އިސްތަށި ފޭބުމަކީ ސިއްޙީ މައްސަލައަކާ ގުޅިގެން މެދުވެރިވެދާނެ ކަމަކަށް ވާތީ ކަމަށް އެބޭފުޅުން ވިދާޅުވެއެވެ.
