ލޯބިވެރިޔާ އެހެން މީހަކާއި ކައިވެނި ކުރަން އުޅުމުން ދަރި ވައްޓާލައިފި
އިންޑިއާގެ ސްޓޭޓެއް ކަމުގައިވާ އުއްތަރު ޕްރަދޭޝްގައި އަންހެނަކު އޭނާގެ ލޯބިވެރިޔާ އެހެން މީހަކާ ކައިވެނި ކުރަން އުޅުމުން ދަރި ވައްޓާލައިފިއެވެ.
އެ ސްޓޭޓުގެ ބުލަންދުޝަހަރުގައި މި ހާދިސާ ހިނގާފައި ވަނީ މިއަދުއެވެ. އެ އަންހެން މީހާ ގާތު އުމުރުން 24 އަހަރުގެ ފިރިހެނަކު ވަނީ ކައިވެނި ކުރާނެ ކަމުގެ ވައުދުވެ، އެތައް މަހެއް ވަންދެން ޖިންސީ ގުޅުން ހިންގާފައެވެ.
ނަމަވެސް، މިއަދު އެ ފިރިހެން މީހާ އެހެން އަންހެނަކާ ކައިވެނިކުރަން އުޅޭކަން އެނގިގެން އެކަމާ ބެހޭގޮތުން ސުވާލު ކުރުމުން އޭނާ ވަނީ ދަރި ވައްޓާ ބޭސް އަންހެން މީހާ އަށް ދިނުމަށް ފަހުގައި އެކަން ކުރަން ބުނެފައެވެ.
އުއްތަރު ޕްރަދޭޝްގައި ދަރި ވައްޓާލެވޭނީ ބަނޑަށް 4 މަހަށް ވުރެން ގިނަ ދުވަސް ނުވެ، މައި މީހާ ނުވަތަ ކުއްޖާގެ ފުރާނަ އަށް ނުރައްކަލެއް އޮތުމުން ނުވަތަ ރޭޕް ފަދަ ކަމެއްގެ ޝިކާރަ އަކަށްވުމުން އެކަންޏެވެ. ނަމަވެސް އެ އަންހެން މީހާ ދަރި ވައްޓާލި އިރު ބަނޑަށް ވަނީ 5 މަަހަށް ވުރެން ގިނަ ދުވަސް ވެފައެވެ.
އަންހެން މީހާ ދަރި ވައްޓާލަން ބޭސް ކެއުމުން ހާލު ސީރިއަސްވެގެން ހޮސްޕިޓަލަށް ވަނީ ގެންގޮސްފައެވެ. އަދި އާއިލާގެ ފަރާތުން މައްސަލަ ފުލުުހުންނަށް ހުށަހެޅުމުން އެ ފިރިހެން މީހާ ކައިވެނި ކުރުމުގެ ކުޑަ ވަގުތުކޮޅެއްގެ ކުރިން ވަނީ ރޭޕްގެ ތުހުމަތުގައި ހައްޔަރު ކޮށްފައެވެ.
އިންޑިއާގެ މީޑިއާ ރިޕޯޓުތައް ބުނާގޮތުން އެ ސަރަހައްދުގެ ފުލުުހުން މިހާރު އަންނަނީ އެ ފިރިހެން މީހާ ބަންދުގައި ބަހައްޓައިގެން މައްސަލަ އިތުރަށް ތަހުގީގު ކުރަމުންނެވެ.
