ވެކްސިން ޖެހުމަށްފަހު ދެ މަސް ވަންދެން ރާ ނުބޮއެ ހުންނަން ބުނުމުން ރަޝިޔާ މީހުން ބޮޑު ފިކުރަކަށް!
ކޮވިޑް-19 އިން ރައްކާތެރިވުމުގެ ގޮތުން ރަޝިޔާގައި ވެކްސިން ޖެހުމުގެ ކުރިން 48 ގަޑިއިރު ވަންދެން ރާ ނުބޮއެ ހުރުމަށާއި ވެކްސިން ޖެހުމަށްފަހު ވެސް ދެ މަސް ދުވަސް ވަންދެން އެއްވެސް ގޮތަކަށް ބަނގުރާ ނުބޮއެ ހުރުމަށް އެޤައުމުގެ ސިއްޙަތާއިބެހޭ ތަޖުރިބާކާރުން ނަސޭޙަތްތެރި ވެއްޖެއެވެ.
ރަޝިޔާގެ ރައްޔިތުންނަށް ދެމުން އަންނަ ސްޕަޓްނިކް ވީ ވެކްސިނާ ބެހޭގޮތުން ވާހަކަ ދައްކަމުން އެޤައުމުގެ ކޮންޒިއުމަރ ވޮޗްޑޯގް ގެ ހެޑް ބުނީ ވެކްސިން ދިނުމަށްފަހު ހަ ދުވަސް ވަންދެން ރަލާ ދުރުގައި ހުރުމަށެވެ.
އެނާ ޕޮޕޯވާ، މޮސްކޯ ޓައިމްސްއަށް ދިން އިންޓަވިއު އެއްގައި ބުނީ ހަށިގަނޑުގެ ދިފާޢީ ބާރު ގަދަ ކުރުމަށް ވެކްސިން ޖެހުމަށްފަހު އެންމެ މަދުވެގެން ދެ ހަފްތާ ވަންދެން ރާ ނުބުއިމަށެވެ. ފަހުން އޭނާ ބުނެފައި ވަނީ އެންމެ އެދެވިގެންވާ ގޮތަކީ ވެކްސިން ޖެހުމަށްފަހު 42 ދުވަސް ވަންދެން ރާ ނުބޮއެ ހުރުން ކަމުގައެވެ.
ދިގު މުއްދަތަކަށް ރާ ބުއިން ހުއްޓާލުމަށް އެންގުމުން ރަޝިޔާ ގެ އެތައް ބަޔަކު އަންނަނީ އެކަމާ ދެބަސްވެ ނުރުހުން ފާޅު ކުރަމުންނެވެ.
"މިއީ އަހަރުމެންގެ ތެރެއިން ގިނަ މީހުންނަށް ފަސޭހަ ކަމަކަށް ނުވެދާނެ. އެކަމަކު ސިއްޙަތަށް ރަނގަޅަށް ބެލުމަށްޓަކައި ރާ ބުއިމާ ދުވަސް ކޮޅަކަަށް ނަމަވެސް ދުރަށް ދާންޖެހޭ” ޕޮޕޯވާ ބުނެފައި ވެއެވެ.
