މި ދެފޮޓޯގައިވާ އެއްގޮތްކަމަކީ ކޮބާ؟
މި ދެ ފޮޓޯއަކީ ވެސް އިންޑިއާގެ މަޝްހޫރު ވިޔަފާރި ވެރިއެއް ކަމަށްވާ އާނަންދު މަހިންދުރާ ޓްވީޓް ކޮށްފައިވާ ދެ ފޮޓޯއެވެ. އަދި ޓުވީޓު ކުރުމަށް ފަހު މި ދެފޮޓޯއިން ވެސް ފެންނަ އެއްގޮތް ކަމަކީ ކޮބައިކަން ދެނެގަނެ ރިޓުވީޓު ކުރުމަށް ވަނީ ބުނެފައެވެ. އަދި މި ފޮޓޯ ޓުވީޓު ކުރި ހިސާބުން ފެށިގެން ވަނީ ކުޑަ ވަގުތު ކޮޅެއްގެ ތެރޭގައި 5000 އަށް ވުރެ ގިނަ ލައިކު ލިބިގެން ގޮސްފައެވެ. އަދި ގިނަ ބައެއް ވަނީ ވަރަށް ހެއްވާ ކޮމެންޓުތައް ވެސް ކޮށްފައެވެ.
ކަނާތުގައިވާ ފޮޓޯއިން ފެންނަނީ ފާޚާނާއެއްގައި ފެން ހިންދުމަށް ތައްޔާރު ކޮށްފައިވާ ކުޑަ ލޯވަޅެކެވެ. އަދި ވާއަތް ފަރާތުން ތިޔަ ފެނިގެން ދަނީ "ސޯލާ ޕެނަލް" އެއް ހަރު ކޮށްފައިވާ މަންޒަރެވެ. މި ފޮޓޯ ޓުވީޓުކުރުމުގެ ކުރިން އާނަންދު މަހިންދުރާ ވަނީ މި ދެފޮޓޯ އާނަންދަ ގުރޫޕުގެ ޗެއަރ ޕާސަންއާ ވެސް ހިއްސާ ކޮށްފައެވެ.
މިހާރު މި ދެ ފޮޓޯއަށް ގިނަ ބައެއްގެ ސަމާލުކަން ލިބިގެން ގޮސްފައިވާއިރު، އާނަންދަ މަހިންދުރާ ޓުވީޓު ކޮށްފައިވާ މި ޕޯސްޓަށް ވަނީ އެތައް ބައެއްގެ ޖަވާބުތައް ވެސް ލިބިގެން ގޮސްފައެވެ، މުޅި ކޮމެންޓު ސެކްޝަން އެއްކޮށް ބަރާވެގެން ވަނީ ބެލުންތެރިންގެ މަޖާ ޖަވާބު ތަކުންނެވެ.
އަދިވެސް މި ދެފޮޓޯގެ އެއްގޮތްކަން ނޭނގުނު ހެއްޔެވެ؟ ފުރަތަމަ ކަނާތް ފަރާތުގައި އެވަނީ ފެން ހިންދުމަށް ފާހާނާއެއްގައި ތައްޔާރު ކޮށްފައިވާ ކުޑަ ފެން ހިންދާ ވަޅުގަނޑެކެވެ. އެހެން ނަމަވެސް ވިސްނައިލައިފި މީހަކަށް އެނގިގެން ދާނީ، އެ ފެން ހިންދާ ވަޅުގަނޑު ތައްޔާރު ކުރެވިފައި އެވަނީ ނުބައިކޮށް ކަމެވެ. ފެން ދިއުމަށް ހުންނަބައި އުސްވުމުގެ ސަބަބުން ފެން ހިނދުމަށް މަގު ބަންދު ވެގެން ދެއެވެ.
ވާއަތަށް އެވާ ފޮޓޯގައި އެވަނީ ސޯލާ ޕެނަލްއެކެވެ. ސޯލާ ޕެނަލްއަކީ އަވީގެ ބާރުން މަސައްކަތް ކުރާ އެއްޗެކެވެ. އޭގެ މަސައްކަތަކީ އަވިން ކަރަންޓު އުފެއްދުމެވެ. އެހެން ނަމަވެސް ފޮޓޯގައި ފެނިގެން ދާނޭ ފަދައިން ސޯލާ ޕެނަލްގެ މަތީގައި އެވަނީ ޓިނު އަޅާ ހިޔާ ކޮށްފައެވެ. ދެން އެ ޕެނަލް ގެ ބޭނުމަކީ ފަހެ ކޮބައި ހެއްޔެވެ؟ އެ ސޯލާ ޕެނަލް ހަރުކޮށްފައި އެވަނީ ވެސް ނުބައި ކޮށެވެ. އެހެންކަމުން މި ދެފޮޓޯގެ އެއްގޮތް ކަމަކީ މިއީއެވެ. މޮޔަ ގޮތަކަށް ކަންކޮށްފައި ވުމެވެ.
