މަސްވެރިކަމަކީ ރާއްޖޭގެ އެންމެ ފުޅާ އިޤްތިސާދީ ވަސީލަތްކަމުގައި ހެދުމުގެ ވަގުތު ޖެހިއްޖެކަން ގަބޫލުކުރަން: ރައީސް
ދުނިޔެއަށް އަންނަ އިޤްތިޞާދީ އަދި ސިއްހީ ކުއްލި ލޮޅުންތަކުން ސަލާމަތް ވުމަށް ޓަކައި ރާއްޖޭގެ އެންމެ ފުޅާ އިޤްތިޞާދީ ވަސީލަތަކަށް މަސްވެރިކަން ހެދުމުގެ ވަގުތު ޖެހިއްޖެ ކަމަށް ގަބޫލުފުޅު ކުރައްވާ ކަމުގައި ރައީސް އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރާއްޖޭގެ ގައުމީ އާމްދަނީގައި އެންމެ ބޮޑު ހިއްސާއެއްވާ ސިނާއަތަކީ ފަތުރުވެރިކަން ކަމުގައި ވީ ނަަމަވެސް ކޮވިޑް-19ގެ ފުރަބަންދުގެ ތެރޭގައި ވެސް، މުޅިން ހުއްޓުމަކަށް ނައިސް ކަންކަން ހިނގަހިނގާ އޮތީ އިގްތިސާދުގެ ދެވަނަ ސިނާއަތުގެ ގޮތުގައި މިހާރު ބެލެވޭ މަސްވެރިކަމުގެ ސަބަބުން ކަމުގައި ވެސް އެމަނިކުފާނު ފާހަގަ ކުރެއްވިއެވެ.
ރައީސް ޞާލިހު މި މޭރުމުން ވާހަކަފުޅު ދެެއްކެވީ މަސްވެރިންގެ ދުވަހާ ގުޅިގެން އެމަނިކުފާނު ދެއްވި ޚިތާބުގައެވެ.
ރައީސް ވިދާޅުވީ ކޮވިޑް-19ގެ ބަލިމަޑުކަމުގެ ސަބަބުން ރާއްޖޭގެ ރިސޯޓްތައް ބަންދުކުރަން ޖެހި ފަތުރުވެރިކަމުގެ ސިނާޢަތް ހުއްޓުމަކަށް އައުމުގެ ސަބަބުން މަސްވެރިކަމުގެ ސިނާޢަތަށް ވެސް ބޮޑު ގެއްލުމެއް ލިބިގެން ދިޔަ ކަމަށާއި މުޅި ގައުމު ފުރަބަންދުގެ ހާލަތަކަށް ދިއުމުން ވެސް މަސްވެރިކަމުގެ ސިނާޢަތަށް އަސަރު ކުރި ކަމަށެވެ. އެކަންކަމުގެ ސަބަބުން މިހާރު އެންމެ ބޮޑު ނަފާއެއް ހޯދައިދޭ، ބޮޑު ކަންނެލީގެ މަސްވެރިކަން މުޅިިންހެން ހުއްޓުމަކަށް އައި ކަމަށާއި ރިސޯޓް މާކެޓަށް އަމާޒުކޮށް މަސްވެރިކަން ކުރަމުން ދިޔަ ފަރާތްތަކާއި އަދި އަތޮޅުތަކުގައި ކުރަމުން އައި ފަރުމަހުގެ މަސްވެރިކަން ވެސް ހުއްޓިގެން ދިޔަ ކަމަށް ރައީސްގެ ޚިތާބުގައި ވިދާޅުވިއެވެ.
މިކަންކަމުގެ ސަބަބުން ރާއްޖެ ފަދަ ވަސީލަތް މަދު ގައުމެއްގައި އެއް ސިނާއަތެއްގެ މައްޗަށް މުޅި އިގްތިޞާދު ބިނާ ކުރުމުގެ ގެއްލުމާއި ނުރައްކާތެރިކަން ބޮޑު ކަމަށާއި ކޮވިޑް-19ގެ ބަލިމަޑުކަމުގެ ސަބަބުން ކުރިމަތިވި އިގްތިސާދީ ގެއްލުންތަކުން އަރައިގަތުމަށް، ގައުމީ ފެންވަރެއްގައި މަސައްކަތް ކުރެވެމުންދާ މިފަަދަ ދަނޑިވަޅެއްގައި މަސްވެރިކަމުގެ ސިނާއަތް އިތުރަށް ފުޅާ ކުރުމާއި މަސްވެރިންގެ އުފެއްދުންތައް އިތުރުކުރުމުގެ މުހިންމުކަން ހާމަވެގެން ހިނގައްޖެ ކަމުގައި ރައީސް ވިދާޅުވިއެވެ.
ހަމަ އެހެންމެ، 2021 ވަނަ އަހަރު ތެރޭގައި ދިވެހި މަސްވެރިކަން އިތުރަށް ތަރައްގީ ކުރުމަށް ސަރުކާރުން ހާއްސަ ސަމާލުކަމެއް ދޭނެ ކަމުގައި ވެސް ރައީސް ފާހަގަ ކުރެއްވިއެވެ. އެގޮތުން އައިސް ލިބުމުގެ ދަތިކަން ފިލުވައިދިނުމަށްޓަކައި، މުޅިން އައު، ހަތް އައިސް ޕްލާންޓް އެޅުމުގެ މަސައްކަތް މި އަންނަ އަހަރު ފެށޭނެ ކަމަށާއި ދޯނިފަހަރުގެ ވަތުގައި ފެން ފިނިކުރާ ނިޒާމުތައް ޤާއިމުކުރުމުގެ މަސައްކަތް އިތުރުކުރެވޭނެ ކަަމަށް ރައީސް ވިދާޅުވިއެވެ. ހަމައެފަދައިން، މަސް ކިރުވުމުގައި ދިމާވާ ދަތިތައް ޙައްލުކުރުމުގެ ގޮތުން، މަސް ގަންނަ އިތުރު ފެސިލިޓީތައް ޤާއިމުކުރުމުގެ މަސައްކަތްވެސް، މާތް ﷲގެ ވާގިފުޅާއެކު، މި އަންނަ އަހަރުގެ ތެރޭގައި ފެށޭނެ ކަމަށް ވެސް ރައީސް ވިދާޅުވިއެވެ.
