ދިވެހިރާއްޖޭގެ ގައުމިއްޔަތު ބިނާކުރުމުގައި އެންމެ ބޮޑު އެއް ބައިވެރިޔާ އަކީ މައިޒާން ހަސަން މަނިކު : ނަޝީދު
ދިވެހިރާއްޖޭގެ ގައުމިއްޔަތު ބިނާކުރުމުގައި އެންމެ ބޮޑު އެއް ބައިވެރިޔަކީ އަލްމަރުޙޫމް މައިޒާން ޙަސަން މަނިކު ކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
ނަޝީދު މިހެން ވިދާޅުވެފައި ވަނީ އަލްމަރުޙޫމް މައިޒާން ޙަސަން މަނިކުގެ ހަނދާނުގައި އެކުލަވާލާފައިވާ "މައިޒާން ޙަސަން މަނިކު 1953-2002" ފޮތް ނެރުމަށް ބުރާސްފަތި ދުވަހު ބޭއްވި ޚާއްސަ ހަފްލާގައި ވާހަކަފުޅު ދައްކަވަމުންނެވެ.
ހަސަން މަނިކަށް ތައުރީފް ކުރައްވަމުން ނަޝީދު ވިދާޅުވީ އެމަނިކުފާނުގެ ފަލްސަފާ ވެރިކަމާއި، ކުޅަދަނާ ކަމަކީ އަބަދުވެސް ހަނދާނުގައި ހުންނަކަމެއް ކަމަށެވެ. އަދި ހަސަން މަނިކު ދަންނަން ފެށީ އެމަނިކުފާނުގެ ހަޔާތްޕުޅުގައި ވަރަށް ތުއްޕުޅުއިރުގައި ކަމަށެވެ. ނަޝީދުގެ ޒާތީ ހަޔާތާއި ހަސަން މަނިކުގެ ޒާތީ ހަޔާތް ވަރަށް ބޮޑަށް ގުޅިފައިވާ ކަން ވެސް ރައީސް ނަޝީދު ފާހަގަ ކުރެއްވިއެވެ.
"އަޅުގަނޑު މައިޒާން ހަސަން މަނިކު ދަންނަނީ އޭނާ އަކީ ސައިންޓިސްޓެއްގެ ގޮތުގައި، އޭނާ އަކީ ފިލޯސަފަރެއް، އޭނާ އަކީ ތިންކަރެއް، އޭނާ އަކީ އެކްޓިވިސްޓެއް، އޭނާ އަކީ ސިޔާސީ ބޭފުޅެއް އަދި އޭނާއަކީ ވެރިއެއް." ނަޝީދު ވިދާޅުވިއެވެ.
ހަސަން މަނިކުގެ ފަރާތުން އެނގިފައި ހުރި އެއްޗިއްސާއި އަޑުއިވިފައި ހުރި ވާހަކަތަކަކީ އެމަނިކުފާނުގެ ހަޔާތް ވަރަށް ބޮޑަށް ބައްޓަން ކުރެވޭ ވާހަކަތަކެއް ކަމަށް ވެސް ނަޝީދު ވިދާޅުވިއެެވެ.
