ވެކްސިން ޖަހަން ފެށުމުން މާސްކް އެޅުން ހުއްޓުމަކަށް އަންނާނެތަ؟
އެންމެންވެސް މިހާރު ދައްކަމުން އަންނަނީ އެއް ވާހަކައެކެވެ. މުޅި ދުނިޔެ ހުއްޓުވާލި ކޮވިޑް-19 ހުއްޓުވާލަން އުފެއްދި ވެކްސިންގެ ވާހަކައެވެެ. ދުނިޔޭގެ ބައެއް ބޮޑެތި ޤައުމުތަކުގައި ވެކްސިން މިހާރު ޖަހަން ފަށާފައިވާއިރު، އަޅުގަނޑުމެން ވެސް މިއަދު އިންތިޒާރު ކުރަމުން މިދަނީ އަޅުގަނޑުމެންނަށް ވެކްސިން ޖެހޭނެ ދުވަހަކަށެވެ.
ވެކްސިނުގެ ވާހަކައާއެކު ގިނަ ސުވާލުތަކެއް މިވަނީ ފެންމަތި ވެފައެވެ. މިގޮތުން އެންމެ ގިނަ ބަޔަކު ޖަވާބު ބޭނުންވާނެ އެއް ސުވާލަކީ، މަތީގައި ހެޑްލައިންގައި ޖަހާފައިވާ ސުވާލުކަން ޔަޤީނެވެ. މާ ހާސަރު ދިގު ނުކޮށް ޖަވާބަށް ދަމާ ހިނގާށެވެ.
ކުރުކޮށް ދަންނަވާނަމަ، ވެކްސިން ޖަހާ އެތައް ދުުވަހެއް ވަންދެން މިހާރެކޭ އެއްގޮތަށް މާސްކް އަޅަން ޖެހޭނެއެވެ. ސަބަބުތައް ވަރަށް ބައިވަރެވެ. ފުރަތަމަ ކަމަކަށް ދުނިޔޭގައި މިހާރު އެންމެ މަޝްހޫރު ދެ ވެކްސިން ކަމުގައިވާ، މޮޑާނާ އަދި ފައިޒާ އިން އުފައްދާފައިވާ ވެކްސިނަކީ ދެ ޑޯޒް ހަމަކުރަން ޖެހޭ ދެ ވެކްސިނެވެ. މީގެ މާނައަކީ ވެކްސިނުގެ އަސްލު ރާހަތު ލިބޭނީ ދެ ފަހަރެއްގެ މަތިން ވެކްސިން ޖެހުމުންނެވެ. މިއާއެކު ވެކްސިނުގެ ފުރަތަމަ ޑޯޒް ޖެހިޔަސް ކޮވިޑް-19 ޖެހުމުގެ ފުރުސަތު ހަމަ ބޮޑުވާނެއެވެ. ފައިޒާއިން ފުރަތަމަ ޑޯޒާއި ދެވަނަ ޑޯޒްގެ ދެމެދުގައި 3 ހަފްތާގެ ދުރުމިނެއް ބަހައްޓަން ޖެހޭއިރު، މޮޑާނާގެ ވެކްސިން ޖެހުމަށް ފަހު 4 ހަފްތާ ދެވަނަ ޑޯޒާއި ދެމެދު ހުންނަން ޖެހެއެވެ. މިހެންވެ މިމުއްދަތުގައި މީހާ ބައްޔަށް ހުށަހެޅިއްޖެނަމަ ކޮވިޑް-19 އެމީހަކަށް ޖެހުމުގެ ފުރުސަތު އޮވެއެވެ. މީގެ ސަަބަބުން މިމުއްދަތުވެ ތެރޭގައި ކޮވިޑް އިން ރައްކާތެރިވުމަށް މިހާރުވެސް އަޅަމުންދާ ފިޔަވަޅުތައް، މިސާލަކަށް މާސްކް އެޅުން މުހިންމެވެ.
ދެވަނަ ކަމަކަށް ފައިޒާ އަދި މޮޑާނާ ވެކްސިން ޖެހުމުން ބަލީގެ އަލާލާމްތައް ނުފެނު ކަމުގައިވީ ނަމަވެސް ބަލި އެހެން މީހަކަށް ދައުރު ކުރުމުގެ ފުރުސަތު ނެތް ކަމަށް އަދި ޔަޤީންވާ ވަރަށް ޑާޓާ އެއް ނެތެވެ. މިހެންކަމުން ތިމާއަށް ވެކްސިން ޖެހުނު ކަމުގައިވީ ނަމަވެސް ތިމާގެ ފަރާތުން އިތުރު ފަރާތަކަށް ބަލި ޖެހުނު ނުދިނުމަށްޓަަކައި ހާޑް އިމިއުނިޓީއަކަށް ދަންދެން މާސްކް އެޅުން މުހިންމެވެ.
