ކޮވިޑްގަ މަރުވާ މީހުންނަކީ ކޮންމެ ދީނެއްގެ މީހެއް ކަމުގައި ވިޔަސް، ދީނުގައިވާ ގޮތަށް ޖަނާޒާގެ ޙައްޤު ލިބެންޖެހޭނެ: ޤާސިމް
ކޮވިޑް-19 ޖެހިގެން މަރުވާ މީހުންނަކީ ކޮންމެ ދީނެއްގެ ބައެއް ކަމުގައި ވިޔަސް، ދީނުގައިވާ ގޮތަށް އެމީހުންގެ ޖަނާޒާގެ ކަންކަން ބޭއްވުމަކީ ލިބެންޖެހޭ ޙައްޤެއް ކަމުގައި ރައްޔިތުންގެ މަޖިލީހުގެ މާމިގިލީ ދާއިރާގެ މެންބަރު އަދި ޖުމްހޫރީ ޕާޓީގެ ލީޑަރު ޤަސިމް އިބްރާހިމް ވިދާޅުވެއްޖެއެވެ.
ޤާސިމް މިއަދު ހެނދުނު ކުރެއްވި ޓްވީޓެއްގައި ވިދާޅުވެފައި ވަނީ ކޮވިޑް-19 ގައި މަރުވާ މީހުންނަކީ ކޮންމެ ދީނެއްގެ މީހަކު ކަމަށް ވިޔަސް ދީނުގައިވާ ގޮތަށް ޖަނާޒާގެ ކަންތައް ކުރުމުގެ ޙައްޤު ދިނުމަކީ އެމީހުންނަށް ލިބުން ލާޒިމް ޙައްޤެއް ކަމަށެވެ.
"ކޮވިޑް-19 ގައި މަރުވާ މީހުންނަކީ ކޮންމެ ދީނެއްގެ މީހަކު ކަމަށްވިޔަސް ދީނުގައިވާ ގޮތަށް ޖަނާޒާގެ ކަންތައް ކުރުމުގެ ޙައްޤު ދިނުމަކީ ބައިނަލްއަގުވާމީ ގޮތުން ބެލިޔަސް، ދީން ތަކުގެ ހަމައިން ބެލިޔަސް، އިންސާނީ ބުއްދީގެ ހަމައިން ބެލިޔަސް، އެއީ އެބައި މީހުންނަށް ލިބުން ލާޒިމު ޙައްޤެއް" ޤާސިމް ވިދާޅުވެފައިވެއެވެ.
ޤަސިމް މިފަދައިން ވިދާޅުވެފައި މިވަނީ އަވަށްޓެރި ޝްރީލަންކާ ގައި ކޮވިޑް-19 ޖެހިގެން މަރުވާ މުސްލިމުން އެޤައުމުގައި ވަޅުލުމުގައި "ދަތިތަކެއް" ކުރިމަތިވެފައިވާ ކަމަށް ބުނެ ރާއްޖޭގައި އެފަދަ މީހުންގެ ހަށިގަނޑު ވަޅުލައި ދިނުމަށް އެޤައުމުގެ ރައީސް ގޯޓާބަޔާ ރާޖަޕަކްސާ، ރައީސް އިބްރާހިމް މުޙައްމަދު ޞާލިޙުގެ އަރިހުން އެދިލައްވާފައި ވަނިކޮށެވެ.
އެނގިފައިވާ ގޮތުގައި އެޤައުމުގައި ކޮވިޑް ބަލީގައި މަރުވާ މީހުން ވަޅުނުލާ އަންދާލަނީ، އެތަނުގެ ބުދިސްޓު މޮންކުންތަކެއް ފަތުރަމުންގެންދާ ވާހަކަތަކަކާ ގުޅިގެންނެވެ. ލަންކާގެ ރައީސްގެ އެދިލެއްވުމަށް އެޤައުމުގެ މުސްލިމުންނަށް އެހީތެރިވުމުގެ ގޮތުން ރައީސް ޞާލިޙު، ކަމާ ގުޅުންހުރި ފަރާތްތަކާ މަޝްވަރާ ކުރައްވަމުން ގެންދަވާ ކަމަށް އިއްޔެ ފޮރިން މިނިސްޓްރީން ވެސް ވަނީ ވިދާޅުވެފައެވެ.
ލަންކާގައި މަރުވާ މުސްލިމުން ރާއްޖެ ގެނެސް ވަޅުލުމާމެދު އެކި މީހުންގެ ޚިޔާލު ތަފާތެވެ. އެގޮތުން މިކަމަކީ ރަނގަޅުކަމެއް ގޮތުގައި ސިފަކޮށް ދީނީ ޢިލްމުވެރިޔާ ޑރ. މުޙައްމަދު އިޔާޒް އިއްޔެ ޓްވީޓު ކުރައްވާފައިވާއިރު، ކުރީގެ ރައީސް މައުމޫން އަބްދުލްޤައްޔޫމް ވަނީ މިކަމާ ދެކޮޅު ހައްދަވާފައެވެ. ބެލެވޭ ގޮތުގައި ޤާސިމް ވެސް އެވިދާޅުވަނީ، ލަންކާގެ މުސްލިމުން އެޤައުމުގައި (މުސްލިމުންގެ ހަމަތަކުގެ މަތިން) ވަޅުލުމުގެ ޙައްޤު އެމީހުންނަށް ލިބެން ޖެހޭނެ ކަމަށެވެ.
