މަރުވާ މުސްލިމުން ރާއްޖޭގައި ވަޅުލާން އެދުނުކަން ލަންކާގެ ކެބިނެޓަކަށް ނޭނގޭ!
ކޮވިޑް-19 ޖެހިގެން ޝްރީލަންކާ ގައި މަރުވާ މުސްލިމުން ރާއްޖޭގައި ވަޅުލާން އެދިފައިވާކަން، އެޤައުމުގެ ވަޒީރުންގެ މަޖިލީހަށް އެނގިފައިނުވާ ކަމަށް ވަޒީރުން މަޖިލީހުގެ ތަރުޖަމާނު ވިދާޅުވެއްޖެއެވެ.
ތަރުޖަމާނު އަދި މިނިސްޓަރު ކެހެލިޔަ ރަމްބުކްވެލާއާ ހަވާލާދީ ނިއުސް ސެންޓާއިން މިއަދު ރިޕޯޓުކުރި ގޮތުގައި ލަންކާގައި ކޮވިޑް-19 ޖެހިގެން މަރުވާ މުސްލިމުން ރާއްޖޭގައި ވަޅުލައިދިނުމަށް އެޤައުމުގެ ރައީސް އެދިފައިވާ ކަމުގެ މައުލޫމާތު ކެބިނެޓަށް ލިބިފައެއް ނުވެއެވެ.
ލަންކާ ކެބިނެޓުގެ ފަރާތުން ކޮންމެ ހަފްތާއަކު ބާއްވާ ނޫސް ބްރީފިންގެއްގައި، ނޫސްވެރިއަކު ކުރި ސުވާލަކަށް ޖަވާބު ދެއްވަމުން ކެހެލިޔަ ވިދާޅުވީ އެފަދަ ކަމަކާ ގުޅޭ ގޮތުން މީގެ ކުރިން ކެބިނެޓުގައި މަޝްވަރާކޮށްފައި ނުވާ ކަމަށާއި މައުލޫމާތު ސާފު ކުރުމަށް ފަހު ނޫސްވެރިންނާ ހިއްސާ ކުރައްވާނެ ކަމަށެވެ.
ރާއްޖޭގެ ފޮރިން މިނިސްޓްރީން އިއްޔެ ވިދާޅުވެފައި ވަނީ، ލަންކާގައި ކޮވިޑް-19 ޖެހިގެން މަރުވާ މުސްލިމުން ރާއްޖޭގައި ވަޅުލައި ދިނުމަށް އެދި އެޤައުމުގެ ރައީސް ގޯޓާބަޔާ ރާޖަޕަކްސާ ގެ ސިޓީފުޅެއް އިއްޔެ ރައީސް އިބްރާހިމް މުޙައްމަދު ޞާލިޙަށް ލިބިވަޑައިގަންނަވާފައިވާ ކަަމަށެވެ.
ލަންކާއާއި ރާއްޖެއާއި އޮންނަ ގުޅުމުގެ ސަބަބުންނާއި އިސްލާމީ އަޚުވަންތަކަމުގެ ސަބަބުން އެކަން ކޮށްދެއްވުމަށް ރައީސް ޞާލިޙު ކަމާ ގުޅުން ހުރި ފަރާތްތަކާ މަޝްވަރާ ކުރައްވަމުން ގެންދަވާ ކަމަށް ވެސް ފޮރިން މިނިސްޓްރީން ވިދާޅުވެފައިވެއެވެ.
ފޮރިން މިނިސްޓަރު އަބްދުﷲ ޝާހިދު ވެސް ޓްވީޓު ކުރެއްވި އެ ބަޔާނުގައި ބުނެފައި ވަނީ ލަންކާގެ ރައީސް އެދިވަޑައިގެންނެވީ ކޮވިޑުގައި މަރުވާ ލަންކާ މުސްލިމުން އެގައުމުގައި ވަޅުލެވޭނެ ގޮތް ހަމަޖައްސަން ދަތިވުމުން ރާއްޖޭގައި ވަޅުލައި ދެއްވުމަށް ކަމަށެވެ.
