އޭޝިއާ-ޕެސިފިކްގައި ކޮވިޑް ވެކްސިން ދިނުން ފެށޭނީ އަންނަ އަހަރުގެ މެދު ތެރޭ: ޑަބްލިޔުއެޗްއޯ
އޭޝިއާ-ޕެސިފިކް ސަރަހައްދުގެ ގައުމުތަކުގައި ކޮވިޑް-19 ވެކްސިން ދޭން ފެށޭނެ ކަމަށް ބެލެވެނީ އަންނަ އަހަރުގެ މެދު ތެރޭ ނުވަތަ ފަހުކޮޅު ކަމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ)އިން ބުނެފި އެވެ.
ޑަބްލިޔުއެޗްއޯގެ ރީޖަނަލް ޑިރެކްޓަރު ޑރ. ޓަކެޝީ ކަސައި ވިދާޅުވީ ވެކްސިން އުފައްދާ ކުންފުނިތަކާއެކު އެއްބަސްވުންތައް ހަދާފައިވާ ގައުމުތަކުން ކުރިއަށް އޮތް މަސްތަކުގައި ވެކްސިން ދޭން ފެށި ނަމަވެސް އެހެން ގައުމުތަކަށް ވެކްސިން ލިބުން އެއަށް ވުރެ ލަސްވެދާނެ ކަމަށް ޑަބްލިޔުއެޗްއޯގެ ވެސްޓަން ޕެސިފިކް ކޯޑިނޭޓާ ޑރ. ސޮކޮރޯ އެސްކަލާތޭ ވިދާޅުވެފައި ވާ ކަމަށެވެ.އަދި ރައްކާތެރި ވެކްސިންއެއް ތައްޔާރުކުރުމާއި އެންމެންނަށް ބޭނުންވާ ވަރަށް އެ ވެކްސިން އުފެއްދުމަކީ ތަފާތު ދެ ކަމެއް ކަމެއް ކަމަށް ފާހަގަކުރިއެވެ.
ޑރ. ސޮކޮރޯ އެސްކަލާތޭ ވިދާޅުވީ ވެސްޓަން ޕެސިފިކްގެ ގާތްގަނޑަކަށް ހުރިހާ ގައުމަކުން ކޮވެކްސް ފެސިލިޓީއާ ގުޅިފައި ވާ ކަމަށާއި ކޮވެކްސް ފެސިލިޓީން ވެކްސިން ލިބޭނެ ކަމަށް ބެލެވެނީ 2021ގެ ދެވަނަ ކުއާޓަރުގައި ކަމަށެވެ.
ކޯވެކްސް ގެ މައިގަނޑު މަގްސަދަކީ 2021 ގެ ނިޔަލަށް 2 ބިލިއަނަށް ވުރެ ގިނަ ޑޯޒް ހޯދުމާއި ހަމަކުރުމެވެ. މިހާރުވެސް ނުވަ ވެކްސިނެއް ވަނީ ކާމިޔާބު ވުމުގެ މަރުހަލާގައެވެ.
ކޮވެކްސް ފެސިލިޓީ އަކީ ކޮވިޑް-19 އަށް އުފައްދާ ވެކްސިން ހަމަހަމަކަމާއެކު ހުރިހާ ގައުމުތަކަށް ފޯރުކޮށްދިނުމަށް ދުނިޔޭގެ ސިއްހަތު ޖަމިއްޔާ (ޑަބްލިޔުއެޗްއޯ އިން އުފައްދާފައިވާ ސްކީމެކެވެ.
