އިންތިހާބުން ބަލިވަންދެން މުއިއްޒު ބަންދުނުކޮށް ބަހައްޓައިދިނުމަށް އެދެން: ރައީސް ނަޝީދު
ކުރިއަށް އޮތް ލޯކަލް ކައުންސިލު އިންތިހާބުގައި މާލެ މޭޔަރު ކަމަށް ކުރިމަތިލާފައިވާ ކުރީގެ ހައުސިން މިނިސްޓަރ ޑރ.މުހައްމަދު މުއިއްޒުގެ މައްސަލަ، އިންތިހާބު ނިމެންދެން ވަކި ގޮތަކަށް ނުނިންމަން އެދޭ ކަމަށް ރައްޔިތުންގެ މަޖިލީހުގެ ރައީސް، މުހައްމަދު ނަޝީދު ވިދާޅުވެއްޖެއެވެ.
މުއިއްޒުގެ މައްޗަށް އުފުލާފައިވަނީ ވަނީ ދޮގު ބަޔާން ދިނުމުގެ ދައުވާއެވެ. އެ މައްސަލަ ފޮނުވީ ޖޫން 14، 2020 ގައެވެ.
މިއަދު ހަވީރު ބޭއްވި ނޫސްވެރިންގެ ބައްދަލުވުމެއްގައި ނަޝީދު ވިދާޅުވީ އިދިކޮޅު ފަރާތްތައް ބަންދުކޮށްފައި އިންތިހާބު ބޭއްވުމަކީ ގޯސް ކަމެއް ކަމަށެވެ.
އަދި އެއީ އެއްގޮތަކަށް ވެސް އެކަން ކޮށްގެން ވާނެ ގޮތް ނޫން ކަން ފާހަގަ ކުރައްވައި ނަޝީދު ވިދާޅުވީ އެކަން އެގޮތަށް ކުރާ ކަމަށް ދެކެވަޑައިނުގަންނަވާ ކަމަށެވެ.
ނަޝީދު ވިދާޅުވީ އިންތިހާބުން މުއިއްޒު "ބަލިވަންދެން" ބަހައްޓައި ދިނުމަކީ ވަރަށް ބޮޑު އެދުމަކާއި އުންމީދެއް ކަމަށެވެ.
"ރައީސް ޔާމީން ހުންނެވީ ބަންދުގައި. ދެން މާލޭގެ މޭޔަރު ކަމަށް ކުރިމަތިލައްވާފައިވާ ބޭފުޅެއްގެ މައްޗަށް އަޅުގަނޑު ހިތުން މައްސަލައެއް އެބަ ބެލޭ. އަޅުގަނޑު އުންމީދު ކުރަން އެމްއެމްޕީއާރުސީގެ މައްސަލައިގައި ވިޔަސް އިންތިހާބުން ބަލި ވަންދެން [މުއިއްޒު] ބަހައްޓާނެ ކަމަށް. އަޅުގަނޑު ވަރަށް ބޮޑަށް ބޭނުން ހައެއްކަ ވޯޓް ދީ މާލެއިން ބަލިކޮށްލަން. އަޅުގަނޑު ވަރަށް ބޮޑަށް އެދެން، އުންމީދު ކުރަން މުއިއްޒު ބަންދު ނުކޮށް ބަލި ވަންދެން، ބަލި ވަންދެން، އިންތިހާބު ނިމެންދެން ބަހައްޓާނެ ކަމަށް،" ނަޝީދު ވިދާޅުވިއެވެ.
