އިނގިރޭސިވިލާތުގައި ކޮވިޑްގެ އާވައްތަރެއް ހަލުވި ކަމާއެކު ފެތުރެނީ!
ލަންޑަން (ސީއެންއެން): އިނގިރޭސިވިލާތުގައި ކޮވިޑް-19 ގެ އާވައްތަރެއް ހަލުވި ކަމާއެކު ފެތުރެމުންދާތީ ޔޫރަޕްގެ އެހެން ޤައުމުތަކަށް އެޤައުމުގެ ފްލައިޓުތައް ދިޔުން ވެސް މަނާ ކޮށްފިއެވެ. ރިޕޯޓުތަކުން ބުނާ ގޮތުގައި، އިނގިރޭސިވިލާތުގައި ފެތުރެމުން ދަނީ މިހާރު ފެތުރެމުންދާ ކޮރޯނާ ވައިރަހަށް ވުރެ ވެސް މާހަލުވި ކަމާއެކު ފެތުރެމުންދާ ވައިރަހެކެވެ.
އިނގިރޭސިވިލާތުގެ ހެލްތު ސެކްރެޓަރީ މެޓް ހެންކޮކް ބުނީ މިހާރު ފެތުރެމުންދާ ކޮވިޑް-19 ގެ ހަލުވިކަމުގެ ސަބަބުން އެޤައުމު ފުރަބަންދު ކޮށްފައިވާ ކަމަށާއި މިފެސްޓިވް ދުވަސްވަރު ވެސް ލަންޑަން އާއި އިންގްލެންޑްގެ އިތުރުން ބްރިޓަން އަށް ވެސް މީހުން އަރައިފޭބުން ބަންދު ކަމަށެވެ.
އިނގިރޭސިވިލާތުގައި މިހާރު ފެތުރެމުން އަންނަ އާވައިރަހުގެ ސަބަބުން ނެދަލޭންޑުން ވެސް ވަނީ މިއަދުން ފެށިގެން އަންނަ އަހަރު ފެށެންދެން، އިނގިރޭސިވިލާތުން އެއްވެސް ފްލައިޓެއް އައުން މަނާ ކޮށްފައެވެ. މިއީ ބަލި ފެތުރުން ކޮންޓްރޯލް ކުރުމުގެ ގޮތުން އެޅި ފިޔަވަޅެއް ކަމުގައި ނެދަލެންޑް ސަރުކާރުން ވަނީ ބުނެފައެވެ.
ބެލްޖިއަމް އިން ބުނެފައިވަނީ، މާދަމާއިން ފެށިގެން އެޤައުމަށް އިނގިރޭސިވިލާތުގެ ރައްޔިތުން އެރުން 24 ގަޑިއިރަށް މަނާ ވާނެ ކަމަށާއި، ކަންތައްވާ ގޮތަށް ބަލާފައި އެމުއްދަތު އިތުރު ކުރަން ވެސް ޖެހިދާނެ ކަމަށެވެ.
"ރައްކާތެރިކަމުގެ ފިޔަވަޅެއްގެ ގޮތުން އަހަރުމެން ނިންމީ މާދަމާގެ 00:00 އިން ފެށިގެން 24 ގަޑިއިރު ވަންދެން އިނގިރޭސިވިލާތުން އެއްވެސް ފްލައިޓެއް ބެލްޖިއަމް އަށް އެރުން މަނާ ކުރަން. މިއީ މިފަދަ ނުރައްކާތެރި ބައްޔަށް އަނެއްކާވެސް މުޅި ދުނިޔެއަށް ފެތުރިދާނެތީ އެކަން ކޮންޓްރޯލު ކުރަން އެޅި ފިޔަވަޅެއް." ބެލްޖިއަމްގެ ބޮޑު ވަޒީރު އެލެކްޒެންޑާ ޑީ ކްރޫ ބުނެފައިވެއެވެ.
