ފްލައިޓްތައް އެތައް އިރަކު ގެއްލުމުގައި މަޑު ކުރަން ޖެހެނީ، ސަރުކާރުން އިންތިޒާމްތައް ހަމަނުޖައްސައިގެން: ސައީދު

ރާއްޖެއަށް ބޭރުން އަންނަ ފްލައިޓްތައް އެތައް އިރަކު ގެއްލުމުގައި މަޑު ކުރަން ޖެހެނީ، ސަރުކާރުން އިންތިޒާމްތައް ހަމަނުޖައްސައިގެން ކަމަށް މާވަށު ދާއިރާގެ މެންބަރު މުޙައްމަދު ސައީދު ވިދާޅުވެއްޖެއެވެ.

Ads by Hajj Corporation

ސައީދު މިހެން ވިދާޅުވެފައި މިވަނީ ކޮވިޑް19ގެ ބަލިމަޑުކަމާ ގުޅިގެން ރާއްޖޭގެ ބޯޑަރު ބަންދުކޮށްފައި އޮތުމަަށްފަހު އަލުން ހުޅުވާލުމަށް ފަހު ރާއްޖެ އަންނަ ފަތުރުވެރިންގެ އަދަދު އިތުރުވެފައިވާ ކަން ފާހަގަކޮށް އޮންލައިން ނޫހެއްގައި ޝާއިއުކޮށްފައިވާ ހަބަރެއް ހިއްސާ ކުރެއްވުމަށް ފަހުގައެވެ.

ސައީދު ވިދާޅުވީ އާންމު އުސޫލަކުން މިކަމުގައި ވެސް ސަރުކާރުން ރައްޔިތުންނަށް އޮޅުވާލާފައިވާ ކަމަށެވެ.

އެގޮތުން ބޯޑަރު ހުޅުވާލުމަށް ތައްޔާރުވުމަށް އެތައް މަހެއް ލިބުނު އިރު، ޑިސެންބަރު މަސް އައިއިރު ވެސް ގިނަ އިންތިޒާމުތައް ހަމަނުޖެއްސޭ ކަމަށް ސައީދު ވިދާޅުވިއެވެ.

“ކުރިއާލާ އެއްވެސް މަސައްކަތެއް ކުރިނަމަ އެއާކްރާފްޓްތައް ގެއްލުމުގައި އެތައް އިރަކު މަޑުކުރާކަށް ނުޖެހުނީސް” ރައީސް ޔާމީންގެ ވެރިކަމުގައި އިކޮނޮމިކް މިނިސްޓަރުކަން ވެސް ކުރެެއްވި ސައީދު ވިދާޅުވިއެވެ.

ޑިސެންބަރު އަދި ޖެނުއަރީ އަކީ ފިނި މޫސުމާ ގުޅިގެން އެންމެ ގިނައިން އަބަދުވެސް ފަތުރުވެރިން ރާއްޖެ ޒިޔާރަތް ކުރާ ދުވަސްވަރެވެ.

ކޮވިޑުގެ ސަބަބުން ރާއްޖޭގެ ބޯޑަރު ބަންދު ކުރުމަށް ފަހު އަލުން ބޯޑަރު ހުޅުވާލީ ޖުލައި މަހުގެ 15 ވަނަ ދުވަހުއެެވެ. ބޯޑަރު އަލުން ހުޅުވާލުމާއެކު ރާއްޖެ އައި ފަތުރުވެރިންގެ އަދަދު ލައްކައަކަށްވުރެ މައްޗަށް ގޮސްފައިވެއެވެ.

ކުރިޔަށް އޮތް ދިހަ ދުވަސްތެރޭ އިތުރު 40،000 އަށްވުރެ ގިނަ ފަތުރުވެރިން އަންނާނެ ކަމަށް ލަފާކުރެވޭ ކަމަށް ފަތުރުވެރިކަމާ ބެހޭ ވަޒީރު އަބްދުﷲ މައުސޫމް ވެސް ވަނީ މީގެ ކުރިން ވިދާޅުވެފައެވެ. މައުސޫމް ވިދާޅުވީ ސަރުކާރުގެ މިހާރުގެ އަމާޒަކީ ފަސްލައްކަ ސާޅީސް ފަސްހާސް ފަތުރުވެރިން އަހަރު ނިމުމުގެ ކުރިން ރާއްޖެ ގެނައުން ކަމަށެވެ. އަދި އެކަމުގެ އުންމީދު ވަރަށް ބޮޑު ކަމަށް ވެސް އެމަނިކުފާނު ވިދާޅުވިއެވެ.