ޖެނެރަލް ޝިޔާމްގެ މައްޗަށް ދައުވާ ކުރަން ފޮނުވައިފި
ކުރީގެ ޗީފް އޮފް ޑިފެންސްފޯސް މޭޖަރ ޖެނަރަލް އަޙްމަދު ޝިޔާމްގެ ބައްޕަ، ކ.ވިލިނގިލީގައި ހުންނަ ކޯސްޓްގާޑްގެ ޢިމާރާތުގައި 2017ވަނަ އަހަރުން ފެށިގެން ދިރިއުޅުއްވަމުން ދިޔަ ކަމަށް ބުނާ މައްސަލަ އެންޓި ކޮރަޕްޝަން ކޮމިޝަން (އޭސީސީ) އިން ތަޙުޤީޤުކޮށް ނިންމައި ދައުވާކުރަން ޕްރޮސެކިއުޓަރ ޖެނެރަލްގެ އޮފީހަށް މިއަދު ފޮނުވައިފިއެވެ.
އެނގިފައިވާ ގޮތުގައި ކުރީގެ ޖެނެރަލް ޝިޔާމުގެ މައްޗަށް ދަޢުވާކުރަން ފޮނުވާފައި ވަނީ މަޤާމުގެ ނުފޫޒު ބޭނުން ކޮށްގެން ނާޖާއިޒު ފައިދާއެއް ހޯދައި ދިނުމާއި ރަސްމީ ހައިސިއްޔަތު ނަހަމަ ގޮތުގައި ބޭނުންކޮށްގެން އޭގެފައިދާ ލިބެން ނުޖެހޭ މީހަކަށް މަންފާއެއް ހޯދައިދިން ކަމަށް ތުހުމަތު ކޮށްފައެވެ.
އޭސީސީން ކުރިން ބަލައި، ކޮރަޕްޝަނެއް ނެތް ކަމަށް ނިންމި މިމައްސަލަ އަލުން ބަލަން ފަށާފައިވަނީ ޕްރޮސެކިއުޓަރ ޖެނަރަލްގެ އެދިވަޑައިގަތުމަށެވެ.
މައްސަލަ ތަހުގީގު ކުރުމަށްފަހު އޭސީސީން ބުނެފައި ވަނީ 18 ޖުލައި 2017 އިން ފެށިގެން 11 ޑިސެމްބަރ 2018 ގެ ނިޔަލަށް، ޖެނަރަލް ޝިޔާމްގެ ބައްޕަ ވިލިނގިލީގައި ހުންނަ ކޯސްޓްގާޑްގެ ޢިމާރާތުގައި ދިރިއުޅެފައިވާކަމަށާ، އަދި ޝިޔާމްގެ ބައްޕަ ބެލެހެއްޓުމަށް އެމްއެންޑީއެފްގައި ކުރިން މަސައްކަތްކުރި މީހަކުވެސް އެގޭގައި ދިރިއުޅެފައިވާކަން ތަޙުޤީޤަށް ހާމަވެފައިވާ ކަމަށެވެ.
އެގޭގައި ޖެނެރަލް ޝިޔާމްގެ ބައްޕަ ދިރިއުޅެފައިވަނީ، ޖެނެރަލް ޝިޔާލް އަންގަވައިގެން ކަމަށް ވެސް އޭސީސީގެ ތަހުގީގު ރިޕޯޓުގައި ބުނެފައިވެއެވެ. އެހެންނަމަވެސް ޝިޔާމްގެ ބައްޕަ ސިފައިންގެ މަރުކަޒެއްގައި ދިރިއުޅުން ހުއްދަކުރާ ޤާނޫނެއް ނުވަތަ އުސޫލެއް ނެތްކަމަށް ވެސް އޭސީސީއިން ވަނީ ފާހަގަ ކޮށްފައެވެ.
ވިލިނގިލީގައި ހުންނަ ކޯސްޓްގާޑްގެ އިމާރާތަކީ ސިފައިންގެ އެކިއެކި ބޭނުންތަކަށާއި، ސިފައިންގެ ޚިދުމަތްތަކަށް އަންނަ ޚާއްސަ ފަރާތްތައް ވަގުތީ ގޮތުން މަޑުކޮށްގެން ތިބުމަށް ބޭނުންކުރާ އިމާރާތެކެވެ.
