ގޯހަރު ޚާން އާއި ޒައިދު ދަރުބާރު ކައިވެނި ކޮށްފި
ބޮލީވުޑްގެ އެކްޓްރެސް ގޯހަރް ޚާން އާއި ކޮރިއޮގްރަފަރ ޒައިދު ދަރްބާރު ކައިވެނި ކޮށްފިއެވެ.
ގޯހަރް އާއި ޒައިދު ކައިވެނި ކުރަން އުޅޭ ޚަބަރު މީގެ ދެ ހަފްތާ ކުރިން އާއްމުކޮށް އިއުލާނު ކުރުމަށްފަހު، މިދިޔަ ހަފްތާ ތެރޭގައި އެމީހުން ވަނީ އެ ދެ މީހުންގެ ކައިވެނީގެ ކުރިން ބާއްވާ އެކިއެކި ހަފްލާތައް ބާއްވާފައެވެ.
ކަައިވެނި ކުރަން އުޅޭކަން އިންސްޓަގްރާމް ގައި އިއުލާނު ކުރަމުން ގޯހަރު ބުނީ މިއަހަރު ވެފައި ވަނީ ވަރަށް ވެސް ތަފާތު އަހަރެއް ކަމަށާއި އެ ދެ މީހުންގެ ލޯބި ވެސް މިއަހަރު އިތުރަށް ވަރުގަދަ ވެފައިވާ ކަމަށެވެ. އެހެންކަމުން މާތް ﷲ ގެ އިރާދަފުޅާއެކީ ދެމީހުން ކައިވެނި ކުރަން ނިންމާފައިވާ ކަމަށާއި ނަމަވެސް މިހާރު ހާލަތު ހުރި ގޮތުން ކައިވެނީގައި ބައިވެރިވެވޭނީ ހަމައެކަނި ދެ ފަރާތުގެ އާއިލާއާއި ގާތް ބައެއް މީހުންނަށް އެކަނި ކަމަށް ވެސް ގޯހަރު ބުނެފައިވެއެވެ.
މީގެ ކުރިން ގޯހަރު ވަނީ އޭނާގެ އިންސްޓަގްރާމް ގައި، އޭނައާއި ޒައިދުގެ ލޯބި ފެށުނު ގޮތް ކަމަށް ބުނެ އެނިމޭޓެޑް ވީޑިއޯއެއް ހިއްސާކޮށްފައެވެ. އޭގައި ބުނާ ގޮތުން އެދެމީހުން އެކަކު އަނެކަކާ ދިމާވެފައި ވެސް ވަނީ ކޮވިޑްއާ ގުޅިގެން އިއުލާނު ކުރި ފުރަބަންދު ތެރޭގައި، ގެއަށް ބޭނުންވާ ބައެއް ސާމާނު ގަންނަން ފިހާރައަކަށް ގޮސް ހުއްޓައެވެ. އެދުވަހަށްފަހު ދެމީހުން އެކަކު އަނެކަކަށް މެސެޖުކޮށް، ގިނައިން ބައްދަލުކޮށް ގުޅުން ބަދަހިވި ކަމަށް ގޯހަރު ބުނެފައި ވެއެވެ.
