ވެކްސިން ހޯދުމަށް ސިންގަޕޫރުގެ ކުންފުންޏަކާއެކު ސޮއި ކުރަނީ

ކޮވިޑު-19 އިން ރައްކާތެރިވުމަށް ރާއްޖެއަށް ބޭނުންވާ ވެކްސިން ހޯދަން ސިންގަޕޫރުގެ ކުންފުންޏަކާއެކު ސޮއިކުރަން ނިންމައިފިއެވެ.

Ads by MWSC

ފިނޭންސް މިނިސްޓަރު އިބްރާހިމް އަމީރު ސޮއި ކުރައްވައި މިއަދު އާއްމުކޮށްފައިވާ، މާލިއްޔަތު ގަވައިދަށް ނުވަތަ ގަވައިދުން ބަޔަކަށް އަމަލުކުރަން ނުޖެހޭ ގޮތަށް ކަނޑައެޅުމާބެހޭ ގަރާރުގައި ބުނެފައިވަނީ، ކޮވިޑުގެ ބަލިމަޑުކަމުން އަރައިގަތުމަށް ރާއްޖެއަށް ބޭނުންވާ ވެކްސިން ހޯދުމަށްޓަކައި ސިންގަޕޫރުގެ ކުންފުންޏެއްކަމަށްވާ އެސްޓްރާޒެނެކާ ޕްރައިވެޓް ލިމިޓެޑްއާއެކު އެއްބަސްވުމުގައި ސޮއި ކުރަން ސަރުކާރުން ނިންމާފައިވާ ކަމަށެވެ.

ފިނޭންސް މިނިސްޓްރީއިން ބުނެފައިވަނީ މި ވެކްސިންއަކީ ކޮވިޑު-19 ގެ ބަލިމަޑުކަމާ ގުޅިގެން ދުނިޔެއަށް ވެސް ބޭނުންޖެހިފައިވާ ވެކްސިންއަކަށްވުމާއި، އެ ވެކްސިން މިވަގުތު ވަކި ބައެއްގެ ފަރާތުން މެނުވީ ލިބެން ނެތް ވެކްސިންއެއް ކަމަށެވެ. އެހެންކަމުން މި ބަލިމަޑުކަމުން ދިވެހި ރައްޔިތުން ސަލާމަތް ކުރުމަށް، ވެކްސިން ހޯދުމަކީ އެއީ ކޮންމެހެން ކުރަންޖެހޭ މަސައްކަތެއްގެ ގޮތުގައި ގަރާރުގައި ވަނީ ބުނެފައެވެ.

ފިނޭންސް މިނިސްޓްރީގެ ގަރާރުގައި އިތުރަށް ބުނެފައިވާ ގޮތުގައި އޮކްސްފޯޑް ވެކްސިން މުޅި ދުނިޔޭގައިވެސް ދޫކުރަމުން ދަނީ ޕްރޮކިޔުމަންޓުގެ ހާއްސަ އުސޫލުތަކެއްގެ ދަށުން ކަމަށާއި، މި އެއްބަސްވުމުގައި ސޮއި ކުރުމަކީ ކޮންމެހެން ކުރަންޖެހޭކަމެއްގެ ގޮތުގައި ކަމާބެހޭ އިދާރާތަކުން ބުނެފައިވާ ކަމަށެވެ.

އެހެންކަމުން، މާލިއްޔަތު ގަވައިދުން ފިނޭންސް މިނިސްޓަރަށް ލިބިދޭ ހާއްސަ ބާރުގެ ދަށުން، ވެކްސިން ހޯދުމަށްޓަކައި އެ ގަވައިދުގެ ހަތަރު މާއްދާއަކަށް އަމަލުކުރަން ނުޖެހޭނެ ކަމަށް ވެސް ވަނީ ކަނޑައަޅައިފައެވެ.

އަމަލުކުރަން ނުޖެހޭ ކަމަށް ކަނޑައަޅާފައިވާ މާއްދާތައް:

• މާލިއްޔަތުގެ ގަވައިދުގެ ބީލަން ކުރުމުގެ މަރުހަލާތަކުގެ މާއްދާ،
• ކޮންޓްރެކްޓް ހަވާލުކުރުމުގެ މާއްދާ،
• އެޑްވާންސް ފައިސާގެ ގޮތުގައި 15 ޕަސަންޓް ދެވޭ ގޮތަށް އޮތް މާއްދާ، އަދި
• އެގްރީމަންޓްކޮށްގެން ހަވާލުކުރާ މަސައްކަތެއް ލަސްވާނަމަ ގެއްލުމުގެ އަގު ދައްކަންޖެހޭ މާއްދާ އެވެ.

މީގެ އިތުރުން އެގަަރާރުގައި ބުނެފައިވަނީ އެ މާއްދާތަކަށް އަމަލުކުރަން ނުޖެހޭ ގޮތަށް ކަނޑައަޅާފައި ވަނީ ހަމައެކަނި ވެކްސިން ގަތުމަށްޓަކައި އެސްޓްރާޒެނެކާ ކުންފުންޏާއެކު ސޮއި ކުރެވޭ އެއްބަސްވުމުގެ މުއްދަތަށް ކަމަށާއި، އެ މުއްދަތުގައި އަމަލުކުރަންޖެހޭނީ އެ އެއްބަސްވުމުގައި ބަޔާންކޮށްފައިވާ ފަދައިން ކަމަށެވެ.