ފައްސިވީ މީހުންގެ އަދަދު މިއަދު އިތުރުވެއްޖެ
އަހަރުގެ ފުރަތަމަ ދުވަހު ރާއްޖެއިން އިތުރު 47 މީހަކު ކޮވިޑް-19 އަށް ފައްސިވެއްޖެއެވެ. މިއީ މީގެ ކުރީ ދުވަސްތަކާ އަޅާ ބަލާއިރު އިތުރުވުމެކެވެ.
ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން އާއްމުކޮށްފައިވާ ސާވޭލަންސް ޑޭޓާއަށް ބަލާއިރު މިއަދު ރާއްޖެއިން ކޮވިޑަށް ފައްސި ވެފައިވަނީ މާލެއިން 25 މީހުންނާއި އަތޮޅުތެރެއިން ދެ މީހުންނާއި ރިސޯޓުތަކުން 3 މީހެއްގެ އިތުރުން ސަފާރީތަކުން 17 މީހުންނެވެ.
މިއަދު ޓެސްޓް ކުރީ 2،085 ޓެސްޓެވެ.
މިހާރު ރާއްޖެއިން މިބައްޔަށް ޖުމްލަ 13،804 މީހުން ފައްސި ވެފައިވެއެވެ.
މިއަދު ބަލިން ރަނގަޅުވި 9 މީހުންނާއެކު ރާއްޖެއިން މިހާރު ކޮވިޑް ބަލިން ފަސޭހަ ވެފައިވަނީ ޖުމްލަ 13,150 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 48 އެވެ.
ހޮސްޕިޓަލުތަކުގައި މިހާރު ފަރުވާ ހޯދަމުން ދަނީ 25 މީހުންނެވެ.
ބަލިފެތުރުން ކޮންޓްރޯލް ކުރުމުގެ ގޮތުން އެޗްޕީއޭ އިން ވަނީ ގިނަ އުސޫލުތަކަށް ލުއިދީފައެވެ. އެގޮތުން މާލެ ސަރަޙައްދުގައި ރޭގަނޑު 00:00 އިން ފަތިހު 4:00 އަށް އެއްގަމު އުޅަނދު ދުއްވުމާއި ބޭރުގައި އުޅުން މަނާކޮށްފައި އޮތް އޮތުން މިހާރު ވަނީ އުވާލާފައެވެ.
