އެހެން މީހުންގެ ދިރިއުޅުމާމެދު ނުވިސްނާ! ގިނަ ފަހަރު ތިޔަ ފެންނަނީ އެމީހުންގެ "ފޮޓޯޝޮޕް" ދިރިއުޅުން!
ކޮންމެ އިންސާނެއްގެ ދިރިއުޅުމަކީ ވެސް ތަފާތު ދިރިއުޅުމެކެވެ. ދިރިއުޅުމުގެ ޙާލަތާއި އިސްކަންދޭ ކަންކަމާއި ، ދިރިއުޅުން މާނަ ކުރާ ގޮތުގެ ވިސްނުމަކީ ވެސް އެކި މީހުންގެ މެދުގައި ތަފާތުވާ ކަންކަމެވެ.
މިއަދު އަހަރެމެންގެ މުޖުތަމައުތަކުން ފެންނަ ނޭދެވޭ އެއްކަމަކީ އެހެން މީހުންގެ ދިރިއުޅުމުގެ ތެރެއަށް ވަނުމެވެ. އެހެން މީހުންނަށް އެނގިގެން ވިޔަސް ނޭނގި ވިޔަސް، އެހެން މީހުންގެ ކަންކަމާ ބެހި ، އެ ޒާތުގެ ވިސްނުމުގައި ބޭކާރު ހަކަތައާ ވަގުތު ހޭދަކޮށްލެވެނީ އެއްވެސް މާނައެއް ނެތް ގޮތުގައެވެ.
ވިސްނާލައްވާށެވެ. މިއަދު ވަރަށް ގިނަ މީހުންނަކީ މީސްމީޑިއާގެ އެކި މަންސަތަކުގައި ތިމާގެ ދިރިއުޅުމުގެ ހަމަ ކޮންމެ ސިކުންތެއް ، ހަރަކާތެއް ، ޚަބަރެއް ހިއްސާ ކުރަމުންދާ މީހުންނެވެ. ތިމާ ދާ ތަންތަނާއި ކުރާ ކަންކަމާއި ދިރިއުޅުމުގެ ބޮޑެތި ކަންކަން އާންމުންނާ ހިއްސާ ކުރުމަކީ ވަރަށް އާންމު ކަމެކެވެ. އެގޮތުން ތިމާލާ އަގު ބޮޑު ހެދުމާއި ގަނޑުވަރެއް ފަދަ ގެއާއި ލޫޅާފަތި، ރީތި ބައިވެރިޔާއާ އެކީ ހޭދަ ކުރާ އަގު ބޮޑު ޗުއްޓީތަކާއި ، ބައިވެރިޔާއަށް ދޭ އަގު ބޮޑު ހަދިޔާ ތަކަކީ ވަރަށް ގިނަ ބަޔަކު މީސްމީޑިއާގައި ހާމަ ކުރާ ކަންކަމެވެ.
ހަމަ މިއާއެކު އެފަދަ ނިޢުމަތްތައް ލިބިގެން ނުވާ މީހުން ، އެމަންޒަރުތައް ބަލާ ، ޚަބަރުތައް ކިޔާ އެކަންކަމާމެދު ވިސްނާ ފިކުރުކޮށް ހަދަތެވެ. ނުރައްކާތެރި "ނަމަ"އިގެ އަޅަކަށް ވެދެއެވެ. އަހަންނަށް ވެސް އެފަދައިން އުޅެވޭނެ ނަމައޭ ، އަހަންނަށް ވެސް އެފަދަ އެއްޗެހި ލިބޭނެ ނަމައޭ ހިތާހިތާ ކިޔާ ، އަދި އެ ވާހަކަ ރަހުމަތްތެރީންނާ ވެސް ހިއްސާކޮށް އުޅެއެވެ. އެންމެ ފަހުން ތިމާގެ ހިތުގައި އަނެކާގެ މައްޗަށް ހަސަދަވެރިކަން އުފެދި, ތިމާގެ އަމިއްލަ ހުރިހާ ކަމަކާ ހިތްހަމަ ނުޖެހި ދެއެވެ. މީގައި އަދި އެންމެ ހެއްވާ އެންމެ މަޖާ އެއް ކަމަކީ ، އެފަދައިން އާންމުކުރާ ފޮޓޯތަކަކީ އޭގެ އަސްލުން ކައްސުވާލާފައިވާ "ފޮޓޯޝޮޕް” ފޮޓޯތަކަކަށް ވުމެވެ. އެފަދައިން ފޮޓޯ އާންމުކުރާ މީހުންގެ ދިރިއުޅުމަކީ "ފިލްޓަރ"ގެ ދުނިޔެއަކަށް ވުމެވެ.
ކޮންމެ މީހެއްގެ ދިރިއުޅުމަކީ ވެސް ތަފާތު ދަތުރެކެވެ. އެކަކަށް ލިބިފައިވާ ނިއުމަތެއް އަނެކަކަށް ނުލިބި ދިޔުމަކީ އާންމު ކަމެކެވެ. އަދި އެކަކަށް ލިބިފައިވާ ނިއުމަތަކާމެދު ހިތްބުރަކަން އިހްސާސްވެދާއިރު ހަގީގަތަކީ އެ އިހްސާސް ކުރާ މީހާއަށް މާ އުފާވެރި ނިއުމަތެއް ލިބިފައި އޮވެދާނެ ކަމެވެ.
ދެ ދުނިޔޭގެ އުފާވެރިކަމަށް މަގު ދައްކައިދޭ ބުއްދިވެރި ބަސްކޮޅެއްގައި ވެއެވެ.
ދުނިޔޭގެ ކަންކަމުގައި ތިމާއަށްވުރެ ދަތި ޙާލުގައިވާ މީހާއާ މެދު ވިސްނާށެވެ. އެބަހީ ތިމާއަށްވުރެ ދަތި ޙާލުގައި އެތައް ބަޔަކު ދިރިއުޅޭކަން ދެނެގަންނާށެވެ. އަދި ދީނީ ކަންކަމުގައި ތިމާއަށްވުރެ ތަގުވާވެރި މީހާއާ މެދު ވިސްނާށެވެ. އެބަހީ އެފަދަ މީހުންނާ ވާދަކޮށް ހެޔޮ ޢަމަލުތައް ގިނަ ކުރުމަށް އަވަސްވެ ގަންނާށެވެ.
