ރައީސް ޔާމީނަކީ ބޭރުގެ އިސްތިއުމާރީ ބާރުތަކަށް ދިވެހި ފަސްގަނޑުން ޖާގަ ނުދެއްވާ ވެރިއެއް: ޝިޔާމް
ރައީސް ޔާމީނަކީ ބޭރުގެ އިސްތިއުމާރީ ބާރުތަކަށް ދިވެހި ފަސްގަނޑުން ޖާގަ ނުދެއްވާ ވެރިއެއް ކަމުގައި ނައިފަރު ދާއިރާގެ މަޖިލިސް މެންބަރު އަދި އިދިކޮޅު ޕީޕީއެމް ގެ ނައިބު ރައީސް އަހުމަދު ޝިޔާމް ވިދާޅުވެއްޖެއެެވެ.
ޝިޔާމް މިހެން ވިދާޅުވީ ރިސޯޓެއްގައި ދިވެހި އަންހެން ކުއްޖަކަށް ޖިންސީ ގޯނާ ކުރި އިންޑިއާ ފިރިހެނަކު ރާއްޖެއިން ފުރުވާލާފައިވާ ކަމަށް އޮންލައިން ނޫހަކުން ޝާއިއުކުރި ހަބަރެއް ހިއްސާކޮށް ކުރެއްވި ޓްވީޓެއްގައެވެ.
ޝިޔާމް ވިދާޅުވީ ރައީސް ޔާމީނަކީ ބޭރުގެ އިސްތިއުމާރީ ބާރުތަކަށް ދިވެހި ފަސްގަނޑުން ޖާގަ ނުދެއްވާ ބޮޑެތި ގޮންޖެހުން ތަކާއެކު ވެރިކަން ކުރެއްވި ވެރިއެއް ކަމަށެވެ.
"އެ ޖާގަ ދީފިނަމަ ގައުމު އަޅުވެތިވެ، އަމިއްލަ ފަސްގަނޑުގައި 2 ވަނަ ދަރަޖައިގެ ރައްޔިތުންނަށް ދިވެހިން ވާނެ ކަން ރައީސް ޔާމީން އަބަދުވެސް ތަކުރާރު ކުރައްވާ" ޝިޔާމް ގެ ޓްވީޓުގައި ވިދާޅުވިއެވެ.
ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި މިދިޔަ ޑިސެމްބަރު މަހުގެ 29 ވަނަ ދުވަހުގެ ރޭ ޖޭ.ޑަބްލިޔު މެރިއޮޓް މޯލްޑިވްސް ރިސޯޓްގައި، 19 އަހަރުގެ އަންހެން ކުއްޖާގެ ރޭޕްކުރި އެ ރިސޯޓްގެ އެފްއެންޑްބީ މެނޭޖަރު ކަމުގެ މަގާމުގައި ހުރި އިންޑިއާ ރައްޔިތަކު ޖެހިގެން އައި ދުވަހު ވަނީ ރާއްޖެއިން ފުރުވާލާފައެވެ.
މިކަމާ ގުޅިގެން އޭރު ނޫސްވެރިން ފުލުހުންނާ ސުވާލު ކުރުމުން ފުލުހުން ވަނީ އެފަދަ މައްސަލައެއް ހުށަހެޅިފައި ނުވާ ކަމަށް ވިދާޅުވެފައެވެ.
ނަމަވެސް ފުލުހުން މީޑިއާތަކަށް މައުލޫމާތު ދޭ މީޑިއާ ގުރޫޕުގައި މިއަދު ވިދާޅުވީ އަޑު ފެތުރިފައިވާ ވާހަކަތަކުގެ ސައްހަކަން ބެލުމުގެ މަސައްކަތް ކުރަމުން އަންނަ ކަމަށެވެ.
