19 އަހަރުގެ އަންހެންކުއްޖަކު ރޭޕްކުރި އިންޑިއާ މީހާ ގެ ޚަބަރު ފުލުހުން ކަށަވަރު ކުރަނީ
ރާއްޖޭގެ ރިސޯޓެއްގައި މަސައްކަތް ކުރި އިންޑިއާ ފިރިހެނަކު، ދިވެހި އަންހެން ކުއްޖަކަށް ޖިންސީ ގޯނާ ކުރި ކަމަށް ބުނާ ހަބަރުގެ ސައްހަކަން ކަށަވަރު ކުރުމުގެ މަސައްކަތް ދިވެހި ފުލުހުން ފަށައިފިއެވެ.
ބައެއް މީޑިއާތަކުގައި ރިޕޯޓުކޮށްފައިވާ ގޮތުގައި މިދިޔަ ޑިސެމްބަރު މަހުގެ 29 ވަނަ ދުވަހުގެ ރޭ ޖޭ.ޑަބްލިޔު މެރިއޮޓް މޯލްޑިވްސް ރިސޯޓްގައި، 19 އަހަރުގެ އަންހެން ކުއްޖާގެ ރޭޕްކުރި އެ ރިސޯޓްގެ އެފްއެންޑްބީ މެނޭޖަރު ކަމުގެ މަގާމުގައި ހުރި އިންޑިއާ ރައްޔިތަކު ޖެހިގެން އައި ދުވަހު ވަނީ ރާއްޖެއިން ފުރުވާލާފައެވެ.
މިކަމާ ގުޅިގެން އޭރު ނޫސްވެރިން ފުލުހުންނާ ސުވާލު ކުރުމުން ފުލުހުން ވަނީ އެފަދަ މައްސަލައެއް ހުށަހެޅިފައިނުވާ ކަމަށް ވިދާޅުވެފައެވެ.
ނަމަވެސް ފުލުހުން ، މީޑިއާތަކަށް މައުލޫމާތު ދޭ މީޑިއާ ގުރޫޕުގައި މިއަދު ވިދާޅުވީ އަޑު ފެތުރިފައިވާ ވާހަކަތަކުގެ ސައްހަކަން ބެލުމުގެ މަސައްކަތް ކުރަމުން އަންނަ ކަމަށެވެ.
"ބައެއް މީޑިއާ ގައި އެފަދަ ކަމެއް ރިޕޯޓް ކޮށްފައިވާތީ އެ މައުލޫމާތުގެ ސައްކަން ކަށަވަރު ކުރުމަށް ކުރަން ޖެހޭ ކަންކަން ފުލުހުން ކުރަމުން ގެންދޭ" ކަމަށް ފުލުހުން ވިދާޅުވިއެވެ.
މިއީ ނޫހެއްގައި ޖެހި ހަބަރެއްގެ މައުލޫމާތު ކަށަވަރު ކުރުމުގެ މަސައްކަތްތަކެއް ފުލުހުން ފެށި ކަމަށް ބުނި ފުރަތަމަ ފަހަރުކަން ފާހަގަކޮށްލެވެއެވެ.
