ރޭޕްކުރި ކަމަށް ތުހުމަތު ކުރެވޭ އިންޑިއާ މީހާ ފުރުވާލުމުން އިދިކޮޅުގެ ކަންބޮޑުވުން
ރާއްޖޭގެ ރިސޯޓެއްގައި އުމުރުން 19 އަހަރުގެ އަންހެނަކު ރޭޕްކުރި ކަމަށް ތުހުމަތު ކޮށްފައިވާ އިންޑިއާ މީހަކު، ފުރުވާލިކަމަށް ބުނާ މައްސަލައިގައި އިދިކޮޅު ޕްރޮގްރެސިވް ކޮންގްރެސް ކޯލިޝަނުން ނުރުހުން ފާޅު ކޮށްފިއެވެ.
އިދިކޮޅު ޕީޕީއެމް/ޕީއެންސީގެ އަންހެނުންގެ ގޮފީގެ ފަރާތުން މިއަދު ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެކޯލިޝަންގެ ތަރުޖަމާނު ހީނާ ވަލީދު ވިދާޅުވީ، ރިސޯޓެއްގައި މަސައްކަތް ކުރަމުން އަންނަ 19 އަހަރުގެ އަންހެނަކު ރޭޕްކުރި އިންޑިއާ މީހާ ފުރުވާލިކަމަށް ބުނާ މައްސަލައިގެ ހަގީގަތް ސަރުކާރުން ތަހުގީގުކޮށް ހާމަކުރަން ޖެހޭކަމަށެވެ.
ހީނާ ވިދާޅުވީ، އެމައްސަލަ ތަހުގީގުކޮށް ކަންވީގޮތް އާންމު ރައްޔިތުންނަށް ތަފްސީލުކޮށްދޭން ޖެހޭ ކަމަށާއި އޭނާ ފުރައިގެންދިޔަ ވާހަކައަކީ، ތެދެއްކަމުގައި ވާނަމަ ފުރައިގެން ދިޔައީ ކިހިނެއްތޯ ނުވަތަ ފުރުވާލެވުނީ ކޮން ގޮތަކަށްތޯ ބަލައި އެކަމުގައި ފިޔަވަޅު އަޅަން ޖެހޭކަމަށެވެ.
"މިކަމުގެ ސަބަބުން ފަތުރުވެރިކަމުގެ ދާއިރާގައި މަސައްކަތްކުރާ އަދި އެދާއިރާއަށް ނިކުންނަން ބޭނުންވާ ދިވެހި އަންހެނުންނަށް ބޮޑު ބިރުވެރިކަމަކާއި ކުރިމަތިލާން ޖެހޭ، ފަތުރުވެރިކަމުގެ ދާއިރާއަކީ މިހާރު ފިރިހެނުންނެކޭ އެއްވަރަށް އަންހެނުންވެސް ފައިހަމަ ކުރަމުންދާ ދާއިރާއެއް" ހީނާ ވިދާޅުވިއެވެ.
މީގެއިތުރުން ހީނާ ވިދާޅުވީ މިފަދަ މައްސަލަތަކުގައި ވަކި ގައުމެއްގެ މީހަކަށް ވަކިގޮތެއް ވެގެން ނުވާނެ ކަމަށާއި ދިވެހިންގެ މެދުގައި ވެސް މިފަދަ މައްސަލަ ތަކުގައި ތަފާތު ކުރުމެއް ނެތި ފިޔަވަޅު އަޅަންޖެހޭ ކަމަށެވެ. ނަމަވެސް ބައެއްފަހަރު މިފަދަ މައްސަލަތަކުގައި ބައެއް "ރޯޔަލް" ފަރާތްތަކާ މެދު ފިޔަވަޅު އެޅުން ލަސްވާކަން ވެސް މިއަދުގެ ބައްދަލުވުމުގައި ހީނާ ފާހަގަ ކުރައްވާފައި ވެއެވެ.
