ޑަބްލިއު.އެޗް.އޯއިން ރާއްޖެއަށް އެއްމިލިއަން ޔޫރޯގެ އެހީއެއް
ކޮވިޑް-19ގެ ހާލަތުން ލިބޭ ގެއްލުން ކުޑަކުރުމަށްޓަކައި ޑަބްލިއު.އެޗް.އޯއިން ރާއްޖެއަށް އެއްމިލިއަން ޔޫރޯގެ އެހީއެއް ދީފިއެވެ.
މި އެހީގެ ތެރޭގައި ބޭހާއި ސިއްޙީ ދާއިރާގައި ބޭނުންކުރާ ތަކެތީގެ އިތުރުން މެޑިކަން ފެސިލިޓީތަކަށް ބޭނުންވާ ބައެއް ސާމާނު ހިމެނެއެވެ. ކޮވިޑް-19 ބަލިމަޑުކަމުން ރާއްޖެއަށް ލިބުނު ގެއްލުންތަކުން އަރައިގަތުމަށް ގިނަ ގައުމުތަކުން ދަނީ އެހީ ފޯރުކޮށްދެމުންނެވެ. ރާއްޖޭގެ ކޮވިޑް-19ގެ ހާލަތު ދަށަށް ދިޔަ ނުދީ ހިފެހެއްޓުމަށާއި ރެޕިޑް ރެސްޕޮންސް ޓީމަށް ބޭނުންވާ އެހީ ޑަބްލިއު.އެޗް.އޯއިން ވަނީ ފޯރުކޮށްދީފައެވެ.
ޑަބްލިއު.އެޗް.އޯއިން އެހީގެ ތެރޭގައި ރާއްޖޭގެ ކޮވިޑް-19 ބަލިމީހުންނަށް ފަރުވާދޭ އައިސީޔޫއަށާއި އެހެން ބައެއް ފެސިލިޓީތަކަށް ބޭނުންވާ ތަކެތި ވެސް ހިމެނެއެވެ. ޑަބްލިއުއެޗްއޯއިން ދެކޭ ގޮތުގައި މި އެހީގެ ސަބަބުން ރާއްޖޭގައި ކޮވިޑް-19އަށް ދެމުން ގެންދާ ފަރުވާގެ ފެންވަރު އިތުރަށް ރަނގަޅުވާނެއެވެ. އަދި ވޯލްޑް ހެލްތް އޯގަނައިޒޭޝަންއިން ރާއްޖެއަށް ދިން މި އެހީއަކީ ރާއްޖެއިން ކޮވިޑް-19ގެ ބަލިމީހުންނަށް ދޭ ފަރުވާއާއި ޚިދުމަތްތައް އިތުރަށް ފުޅާކޮށް ފުރިހަމަކުރުމަށް ދިން އެހީއެކެވެ.
ރާއްޖެއިން ކޮވިޑް-19 އަށް ޖުމްލަ 13،930 މީހުން ފައްސި ވެފައިވެއެވެ. ކޮވިޑް ބަލިން ފަސޭހަ ވެފައިވަނީ ޖުމްލަ 13,217 މީހުންނެވެ. އަދި މިބަލީގައި ރާއްޖެއިން ނިޔާވި މީހުންގެ ޖުމްލަ އަދަދު މިހާރު 48 އެވެ. ހޮސްޕިޓަލުތަކުގައި މިހާރު ފަރުވާ ހޯދަމުން ދަނީ 41 މީހުންނެވެ.
