ބޮލީވުޑްގެ ބައެއް "ޕްލާސްޓިކް" ތަރިން!
ބޮލީވުޑްގެ ތަރިންނަކީ އިންޑިއާގެ އިތުރުން މުޅި ދުނިޔޭގައި ވެސް އެބައެއްގެ އެތައް ސަޕޯޓަރުންނެއް ތިބޭ ބައެެކެވެ. އެމީހުންގެ ސިފައަށާއި ހުނަރުވެރި މޮޅު އެކްޓިންއާއި ނެށުމަށް ވެސް ތައުރީފު ކުރާ މީހުން މަދެއް ނޫނެވެ. އޭގެ ތެރޭގައި ދުނިޔޭގައި ނަން ހިނގާ އެތައް ބަޔަކު ނުވަތަ ނުފޫޒުގަދަ އެތައް ބަޔަކު ވެސް، ބޮލީވުޑްގެ ބައެއް އެކްޓަރުންގެ ޖާދޫގައި ޖެހިފައިވެއެވެ.
އިންޑިއާގެ ގިނަ އެކްޓަރުންނަށް ބަލާލާއިރު، އެމީހުންގެ މޫނުމަތިން އެއްވެސް އައިބު ކަމެއް ނުފެނެއެވެ. ކިތަންމެ އުމުރުން ދުވަސްވީ ބަޔަކު ކަމުގައިވިޔަސް، އެކަން އެމީހުންގެ މޫނުމަތިންނާއި ހަށިގަނޑުން ވެސް ފެންނާކަށް ނުހުރެއެވެ. އެހެންކަމުން އެމީހުން ފަދައިން ވެވޭތޯ ބައެއް މީހުން މަސައްކަތް ވެސް ކުރެއެވެ.
ނަމަވެސް ހަގީގަތަށް ބަލާއިރު، ބޮލީވުޑްގެ ގިނަ ތަރިން އެމީހުންގެ އެރީތި ބުރުސޫރަ ހޯދާފައި ވަނީ "ޕްލާސްޓިކުން" ނެވެ. ބުނަން މިއުޅޭ ވާހަކައަކީ، އޭގެ ތެރެއިން ގިނަ ތަރިން ތިބީ ޕްލާސްޓިކް ސާޖަރީ/ކޮސްމެޓިކް ސާޖަރީ ހަދާފައި ކަމެވެ.
އެގޮތުން މިފަދައިން ޕްލާސްޓިކް ސާޖަރީ ހަދާފައިތިބި ބައެއް ތަރިންގެ ނަން ހިމަނާލާނަމެވެ. މިލިސްޓުގައި ހިމެނެނީ ހަމައެކަނި އަންހެން އެކްޓަރުން އެކަންޏެއް ނޫނެވެ. ބޮލީވުޑްގެ ނަން މަޝްހޫރު ފިރިހެން އެކްޓަރުންތަކެއް ވެސް ހިމެނެއެވެ.
އައިޝްވާރްޔާ ރާއީ ބަޗަން
"ރީތީގެ ރާނީ" ކަމުގެ ލަގަބު ދީފައިވާ ކުޅަދާނަ އެކްޓްރެސް އައިޝްވާރްޔާ ރާއީ ބަޗަން ހުންނަނީ ޕްލާސްޓިކް ސާޖަރީ ހަދާފައިކަމަށް ބައެއް މީހުން ޤަބޫލެއް ވެސް ނުކުރެއެވެ. އޭނާގެ ކެރިއަރު ފެށިއިރު ހުރި ގޮތާއި ކެރިއަރުގެ ވަކި ހިސާބަކުން ފެންނަން ފެށި ގޮތް ހާސްބައި ތަފާތެވެ. އޭނާގެ އުމުރަށް ބަލާފައި، އައިޝްވާރްޔާ އަދިވެސް ފެންނަނީ 30 އަހަރު ވެސް ނުފުރޭ ޒުވާނެއްގެ ގޮތުގައެވެ. ނަމަވެސް އެކަމުގެ ކްރެޑިޓް އޭނާގެ ކޮސްމެޓިކް ސާޖަރީ ހެދި ޑޮކްޓަރުންނަށް ވެސް ދޭން ޖެހެއެވެ. ރިޕޯޓުތަކުން ބުނާ ގޮތުގައި، އައިޝްވާރްޔާ ހުރީ ކޮލުން ބައެއް ކެނޑުމާއި، ނޭފަތް ރީތި ކުރުމުގެ އިތުރުން ތުންފަތުގެ ފިލާރސް އޮޕަރޭޝަނަކާއި މުޅި މޫނުމަތީގެ ފިލާރސް އޮޕަރޭޝަނެއް ވެސް ކޮށްފައެވެ.ކޮންމެއަކަސް މިހުރިހާ އޮޕަރޭޝަންތަކެއް ކޮށްދިން ޑޮކްޓަރުންނަށް ވެސް އެވޯޑެއް ދޭވަރު ވެއެވެ.
ޕްރިޔާންކާ ޗޯޕްޅާ ޖޯނަސް
ދުނިޔޭގެ ރީތީގެ ރާނީ ކަމުގެ މަގާމު ހާސިލު ކޮށްފައިވާ ބޮލީވުޑް އަދި ހޮލީވުޑްގެ ވެސް އެކްޓްރެސް ޕްރިޔާންކާ ޗޯޕްޅާ ޖޯނަސް އަކީ ސިފަ ހުތުރު މީހެއް ކަމުގައި މަދު ބަޔަކު ނޫނީ ނުބުނާނެއެވެ. އޭނާގެ ސިފައަށް ބެލިޔަސް އަދި ހަށިގަނޑަށް ބެލިޔަސް، ތައުރީފު ކުރާ މީހުން ގުނާ އަދަދު ނުކުރެވޭހާ ގިނައެވެ. ނަމަވެސް، ރިޕޯޓުތަކުން ބުނާ ގޮތުގައި، ޕްރިޔާންކާ ވެސް ވަނީ ތުންފަތާއި، މޫނުމައްޗާއި، ނޭފަތާއި ކޮލާއި، ނިތްކުރީގެ އޮޕަރޭޝަންތަކެއް ކޮށްފައެވެ. މީގެއިތުރުން އުރަމަތި ރީތިކުރުމުގެ އޮޕަރޭޝަނަކާއި ޓަމީޓަކް ހަދާފައި ހުންނަ ކަމަށް ވެސް ރިޕޯޓު ކޮށްފައިވެއެވެ. ކޮސްމެޓިކް ސާޖެރީ ހެދިކަމަށް ޕްރިޔާންކާ ވެސް ވަނީ އެއްބަސް ވެފައެވެ. ނަމަވެސް ޓަމީޓަކް ހެދިކަމަށް އެއްބަހެއް ނުވެއެވެ.
ކެޓްރީނާ ކެއިފް
ލަންޑަނަށް އުފަން އަދި ބޮލީވުޑްގައި ފައިހަމަ ކޮށްފައިވާ ކެޓްރީނާ ކެއިފަކީ އޭނާގެ ކެރިއަރު ފެށުނުއިރު ވަރަށް "ކިއުޓް" އެކްޓަރެއްގެ ގޮތުގައި ބެލުންތެރިން ފާހަގަކުރި ތަރިއެކެވެ. ނަމަވެސް ފަހަކަށް އައިސް އޭނާގެ ސިފައަށް ވެސް ބަދަލުތަކެއް އައިސްފައިވާކަން ބެލުންތެރިން ފާހަގަ ކޮށްފައިވެއެވެ. އެގޮތުން ރިޕޯޓުތަކުން ބުނާ ކެޓްރީނާ ވަނީ އޭނާގެ ކޮލާއި، ނޭފަތް އަދި ތުންފަތުގެ ވެސް ކޮސްމެޓިކް ސާޖެރީ ކޮށްފައެވެ.
ޝިލްޕާ ޝެޓީ ކުންދްރާ
ކޮސްމެޓިކް ސާޖެރީގެ ވާހަކަ ދައްކާއިރު، ޝިލްޕާގެ ނަމަކީ ހަމަޔަގީނުން ވެސް ނައިސް ނުދާނެ ނަމެކެވެ. ވަރަށް ފުރިހަމަ އެކްޓިންއަކާއި ނެށުމެއް ދައްކައިދޭ ބޮލީވުޑްގެ މިއެކްޓްރެސް މީގެ ކުރިން ވަނީ އޭނާގެ ފަތާ ނޭފަތް އެއްކޮށް ހިމަ، ދިގު ކޮށްލާފައެވެ. އުމުރުން މިހާރު 40 އަށްވުރެ މަތިވެފައިވާ ޝިލްޕާ ވަނީ ދެ ފަހަރަށް ނޭފަތުގެ އޮޕަރޭޝަނެއް ކޮށްފައެވެ. އަދި އެކަމަށް އޭނާ ވަނީ އެއްބަސް ވެސް ވެފައެވެ.
ޝާހިދު ކަޕޫރު
ފިލްމު "އިޝްޤް ވިޝްޤް" އިން ބޮލީވުޑަށް ތަޢާރަފްވި ޝާހިދު ކަޕޫރަކީ، އޭނާ ފެނި އެތައް އަންހެން ކުދިންނެއް ދީވާނާވާ ތަރިއެކެވެ. ފިލްމީ ދާއިރާއަށް ނިކުތްއިރު ކުޑަ ކުއްޖެއްހެން ހީވި ޝާހިދު މިހާރު ވަރަށް ފިރިހެންވަންތަކަމަށް އެތައް ބަޔަކު ޤަބޫލު ކުރެއެވެ. އޭނާގެ ފިރިހެންވަންތަކަން ހަމައެކަނި ގުޅިފައިވަނީ މިހާރު އޭނާގެ ހުރި ތުނބުޅިމަތިމަހާ އެކަންޏެއް ނޫނެވެ. ރިޕޯޓުތަކުން ބުނާ ގޮތުގައި ޝާހިދު ކަޕޫރު ވެސް ވަނީ އޭނާގެ ނޭފަތް ރީތި ކުރުމަށް އޮޕަރޭޝަން ކޮށްފައެވެ.
ސައިފް ޢަލީ ޚާން
ހަމުގެ ކުލަ އަބަދުވެސް އަލިކަމަށް ފެންނަ ސައިފް ޢަލީ ޚާން ހުންނަނީ ކޮސްމެޓިކް ސާޖަރީއެއް ހަދާފައި ކަމަށް ޤަބޫލުކުރަން އެތައް ބަޔަކަށް އުނދަގުލެވެ. ނަމަވެސް އިންޑިއާގެ ރިޕޯޓުތަކުން ބުނާ ގޮތުގައި ސައިފް ހުންނަނީ އޭނާގެ ލޯ ކައިރި ކަޅުވުން ހުއްޓުވަން ވެސް ސާޖަރީއެއް ހަދާ، ހަންގަނޑު އޮމާންކޮށް އަބަދުވެސް ބަހައްޓަން މޫނުމަތީގެ އޮޕަރޭޝަނެއް ކުރުމުގެ އިތުރުން، އޭނާގެ ފުރަގަސް ފަރާތް ބޮޑުކުރުމުގެ އޮޕަރޭޝަނެއް ވެސް ކޮށްފައި ކަމަށް ރިޕޯޓުތަކުން ބުނެއެވެ.
ސަލްމާން ޚާން
މޫނުމައްޗަށް ބަދަލު ގެނައުމުގައި ސަލްމާން ޚާން ވެސް ދުލެއް ނުކުރެއެވެ. އަދި ދުވަހަކުވެސް ކައިވެނި ކޮށްފައިނުވާ އަދި ކައިވެންޏެއް ކުރަން ހިތަށް ވެސް ނާރުވާކަމަށް ބުނާ ސަލްމާން ޚާން ހުންނަނީ ކޮލާއި މޫނުގެ ހަންގަނޑު އޮމާންކޮށް ބެހެއްޓުމުގެ އޮޕަރޭޝަނެއް ކޮށްފައި ކަމަށް ރިޕޯޓުތަކުން ބުނެފައިވެއެވެ.
މިތަރިންގެ އިތުރުން ޖާންވީ ކަޕޫރް، ވާނީ ކަޕޫރް، އަނުޝްކާ ޝަރްމާ، ޝްރޫތީ ހަސަން، އާމިރް ޚާން، ޝާހްރުކް ޚާން އަދި ރަންބީރް ކަޕޫރު ވެސް ކޮސްމެޓިކް ސާޖަރީ ހެދި ބޮލީވުޑް ތަރިންގެ ލިސްޓުގައި ހިމެނެއެވެ.
މަށަށް ވަރިހަމަ.
ކޮންވާ ބެހޭކަމެއް.