ހެޔޮ ޢަމަލުކުރާ މީހުން ސުވަރުގެ ވައްދަވާނީ، އެމީހުން ކުރި ޢަމަލުތަކާއި ގުޅޭ ދޮރުކޮޅުތަކުންނެވެ. : ޚުތުބާ
އެންމެހާ ޙަމްދު، ތަޢުރީފާ ޘަނާ ޙައްޤުވެގެންވަނީ ގަދަ ކީރިތިވަންތަ މާތް ﷲ އަށެވެ. އެކަލާނގެ އެއްކައުވަންތަކަމަށް އަޅު ހެކިވަމެވެ. އެކަލާނގެއަށް ޝަރީކަކު ނުވެއެވެ. އަދި މުޙައްމަދު (ޞޢޥ) އީ އެކަލާނގެ އަޅާ އަދި ރަސޫލާ ކަމަށް އަޅުހެކި، އެކަލޭގެފާނަށާއި އެކަލޭގެފާނުގެ ޢާލުންނާއި އަޞްޙާބުންނަށް ޞަލަވާތާއި ސަލާމާއި ބަރަކާތް ލައްވާނދޭވެ.
މިއަދުގެ ހުކުރު ޚުތުބާ ޚާއްސަ ކޮށްލާފައިވަނީ ސުވަރުގޭގެ މަތިވެރި ނިޢުމަތްތަކުގެ މައްޗަށެވެ. އެގޮތުން އިންސާނާގެ ދުނިޔަވީ ޙަޔާތުގެ ހުރިހާވެސް މަޤްސަދަކީ އާޚިރަތުގެ ބާއްޖަވެރިކަން ޙާސިލުކުރުންކަން ޚުތުބާގައި ވެސް ހަނދުމަ ކޮށްދެއްވާފައިވެއެވެ.
"ދުނިޔޭގައި ހެޔޮ ޢަމަލުކޮށް މާތް ﷲ އާއި އެކަލާނގެ ރަސޫލާ (ޞޢޥ) އަންގަވާފައިވާ ގޮތަށް އުޅޭ މީހުންނަށް ހުރި ތަނަކީ ނިޢުމަތްތަކުން ފުރިގެންވާ ސުވަރުގެއެވެ."
ސުވަރުގެއަކީ މިދުނިޔެމަތީގައި އެއްވެސް މީހަކަށް އެފަދަ ފުރިހަމަކަމެއް ފެނިފައިނުވާ ތަނެކެވެ. އަދި އެއީ މީހެއްގެ ޚިޔާލަށް ވެސް އަންނާނެ ކަންތައްތަކެއް ނޫނެވެ. ޤުދުސީ ޙަދީޘެއްގައި މާތް ނަބިއްޔާ (ޞޢޥ) ޙަދީޘްފުޅު ކުރެއްވި ބަސްފުޅެއްގެ މާނައިގައި ވެއެވެ.
"މާތް ﷲ ވަޙީ ކުރެއްވެވިއެވެ. ތިމަން ރަސްކަލާނގެ ސޯލިޙު އަޅުތަކުންނަށްޓަކައި އެއްވެސް ލޮލަކަށް ފެނިފައިނުވާ، އެއްވެސް ކަންފަތަކުން އަޑުއަހާފައިނުވާ އަދި އިންސާނެއްގެ ހިތަށްވެސް އަރާފައިނުވާ ފުރިހަމަ ތަނެއް ހެއްދެވީމެވެ."
ރަސޫލާ (ޞޢޥ) ގެ މިބަސްފުޅުގެ ސާބިތު ހެކި ކީރިތި ޤުރްޢާންގައި ވެއެވެ.
"ފަހެ، އެއުރެންނަށްޓަކައި ފޮރުއްވާފައިވާ ލޮލުގެ ފިނިކަން (އެބަހީ ލޮލަށް ފިނިކަން ދެނިވި، ސުވަރުގޭގެ ނިޢުމަތްތައް) އެއްވެސް ނަފްސަކަށް ނޭނގޭނެތެވެ. (އެއީ) އެއުރެން ކޮށްއުޅުނު ޢަމަލުތަކުގެ ޖަޒާއެއް ކަމުގައެވެ."
ސުވަރުގޭގައި އަށް ދޮރުކޮޅެއް ވެއެވެ. އެތަނުގައި މަލާއިކަތްބޭކަލުން ސުވަރުގެވަންތަވެރީންނަށް އިސްތިޤުބާލު ކުރައްވާ، މަރުޙަބާ ކިޔުއްވާނެތެވެ. އަދި އެދޮރުކޮޅުތަކުން އަމާންކަމާއި ރައްކާތެރިކަމާއެކު، ސުވަރުގެ ވަނުމަށް ހުށަހަޅުއްވާނެތެވެ.
މާތް ﷲ އަށް ކުއްތަންވުމަށްޓަކައި، ސުންނަތް އަޅުކަން ގިނަކުރުމަށް އިސްލާމް ދީނުގައި ބާރު އަޅުއްވާފައިވެއެވެ. އެގޮތުން އެމީހަކު ދުނިޔެމަތީގައި ކުރާ ސުންނަތް އަޅުކަންތަކުގެ ތެރެއިން އެއަޅުކަމެއްގެ މަތީގައި ދެމިހުންނަ އަޅުކަމަކުން އާޚިރަތް ދުވަހު އެމީހަކު ޚާއްސަ ވެގެންވާނެއެވެ.
ކީރިތި ރަސޫލާ (ޞޢޥ) ގެ ޙަދީޘުން ސާބިތުވާ ގޮތުގައި، ހެޔޮ ޢަމަލުކުރާ މީހުން ސުވަރުގެ ވައްދަވާނީ، އެމީހުން ކުރި ޢަމަލުތަކާ ގުޅޭ ދޮރުކޮޅުތަކުންނެވެ. (ގިނަގިނައިން ސުންނަތް) ނަމާދުކޮށް އުޅުނު މީހަކުނަމަ، ނަމާދަށް ޚާއްސަ ދޮރުކޮޅުންނެވެ. ޖިހާދުކޮށް އުޅުނު މީހަކު ނަމަ، ޖިހާދަށް ޚާއްސަ ދޮރުކޮޅުންނެވެ. ފަހެ އޭނާއީ (ގިނަގިނައިން ސުންނަތް) ރޯދަ ހިފާ އުޅުނު މީހެއްނަމަ އައްރައްޔާން އޭ ކިޔުނު ދޮރުކޮޅުންނެވެ. ފަހެ އޭނާއީ (ގިނަގިނައިން) ޞަދަޤާތްދީ އުޅުނު މީހަކުނަމަ ޞަދަޤާތަށް ޚާއްސަ ދޮރުކޮޅުންނެވެ.
މިބަސްފުޅު އަޑުއައްސަވާފައި، މާތް ﷲ އެކަލޭގެފާނަށް ރުއްސުންލެއްވި، އަބޫބަކުރުގެފާނު ދެންނެވިއެވެ.
"ﷲ ގެ ރަސޫލާއެވެ. އަޅުގަނޑުގެ މައިންބަފައިން ކަލޭގެފާނަށް ފިދާކުރަމެވެ. އެމީހަކަށް މިއިން ކޮންމެ އެއް ދޮރުކޮޅަކުން ގޮވާލެވުނު ނަމަވެސް އެއީ އޭނާއަށް ފުދިގެންވާ ކަމެއް ނޫންތޯއެވެ. ވީއިރު އެއްވެސް މީހަކަށް މިހުރިހާ ދޮރުކޮޅަކުން އެއްފަހަރާ ގޮވައޮލެވިދާނެތޯއެވެ؟"
އެކަލޭގެފާނު ޙަދީޘްފުޅު ކުރެއްވިއެވެ.
"އާދޭހެވެ! އަދި ކަލޭގެފާނީ އެފަދަ ބޭކަލަކު ކަމުގައި ވާނެކަމަށް ތިމަންކަލޭގެފާނު އުންމީދު ކުރައްވަމެވެ."
ސުވަރުގޭގެ އަހުލުވެރިންނަށް މާތް ﷲ ތައްޔާރު ކުރައްވާފައިވާ ގަނޑުވަރުތަކަކީ އިންސާނަކު ދުވަހަކު ލޮލުން ނުދެކޭހާ ފުރިހަމަ ތަންތަނެވެ. މާތް ﷲ ވަޙީ ކުރެއްވި ބަސްފުޅެއްގެ މާނައިގައިވެއެވެ.
"ތަޤްވާވެރީންނަށް ވަޢުދު ކުރައްވާފައިވާ ސުވަރުގޭގެ މިސާލަކީ އެތާނގައި ތަޣައްޔަރުކަމެއް ނުވާ ސާފު ފެނުގެ ކޯރުތަކާއި، އޭގެ ރަހަ ތަފާތު ނުވާ ކިރުގެ ކޯރުތަކާއި، ބޯ މީހުންނަށް މީރުރަހަ ލިބެނިވި ރަލުގެ ކޯރުތަކާއި، ސާފު މާމުއިގެ ކޯރުތައްވާ ސުވަރުގެއެވެ. އަދި އެތާނގައި އެއުރެންނަށްޓަކައި ހުރިހާ ބާވަތެއްގެ މޭވާތަކާއި، އެއުރެންގެ ވެރިރަސްކަލާނގެ ޙަޟްރަތުން ފާފަ ފުއްސެވުން ހުއްޓެވެ."
