149 ކިލޯގެ މަސްތުވާތަކެތީގެ މައްސަލައިގައި ޕީޖީ މަޖިލީހަށް
ގދ. އަތޮޅުގައި އޮންނަ ފަޅުރަށެއް ކަމުގައިވާ ހުޅުވާރުލުގައި، ވަޅުލައިގެން އުޅުނު 149 ކިލޯގެ މަސްތުވާތަކެތީގެ މައްސަލައިގައި، ބައެއް ކަންކަން ސާފު ކުރުމަށް ޕްރޮސެކިއުޓާ ޖެނެރަލް (ޕީޖީ) ޙުސެއިން ޝަމީމް ރައްޔިތުންގެ މަޖިލީހުގެ ޖުޑިޝަރީ ކޮމިޓީއަށް ހާޒިރު ކުރުމަށް ނިންމައިފިއެވެ.
ހުޅުވާރުލުގައި ވަޅުލައިގެން އުޅުނު 149 ކިލޯގެ މަސްތުވާތަކެތި އަތުލައިގެންފައި ވަނީ 2019 ވަނަ އަހަރުގައެވެ. މިމައްސަލައިގައި ފަސް މީހަކަށް ވަނީ ދައުވާ ކޮށްފައެވެ.
މިމައްސަލަ މީގެ ކުރިން ކްރިމިނަލް ކޯޓަށް ހުށަހެޅި ނަމަވެސް، މައްސަލަ ހުށަހަޅަން ޖެހޭނީ ކުށުގެ އަމަލު ހިނގި ސަރަހައްދުގެ ކޯޓަކަށް ކަމަށް ބުނެ އެކޯޓުން ވަނީ މިމައްސަލަ ބޭރު ކޮށްލާފައެވެ.
ސަތޭކަ ސާޅީސް ނުވަ ކިލޯގެ މަސްތުވާތަކެތީގެ މިމައްސަލައިގައި ދައުވާ ކުރީ ގއ. ކޮނޑޭ، ގަހާކޯޅި އަހުމަދު އަނީލް (34)، ގދ. ގައްދޫ، އެދުރުގެ، އަހުމަދު ހާމީމު (42)، ގއ. ކޮނޑޭ، ރޮމޭންސް ޝަފީޒް މުހައްމަދު (35)، ގއ. ނިލަންދޫ، ދިހްޝާންވިލާ އަލީ ޝާކިރު (30) އަދި ގދ. ގައްދޫ، އެދުރުގެ ޔާމިހް ހާލިދު (23) ގެ މައްޗަށެވެ.
މި ފަސް މީހުންނަށް ދައުވާ ކުރަން ގދ. ގައްދޫ މެޖިސްޓްރޭޓް ކޯޓަށް ހުށަހެޅި ނަމަވެސް، އެކޯޓުން ވަނީ އެދައުވާތައް ބޭރު ކޮށްލާފައެވެ. ގައްދޫ ކޯޓުން މިމައްސަލަ ބޭރުކޮށްލީ ދެ ދައުވާ ކުރަން ގާނޫނުގައި ބަޔާން ކުރާ މުއްދަތު ހަމަވި ފަހުން މައްސަލަ ކޯޓަށް ހުށަހެޅުމުން ކަމަށް ބުނެއެވެ.
އެމައްސަލަ ބޭރުކޮށްލުމުން ޕީޖީ އޮފީހުން ވަނީ އެމައްސަލަ އަލުން އިސްތިއުނާފު ނުކުރާނެ ކަމަށް ބުނެފައެވެ. އަދި އެމައްސަލަ ހައިކޯޓުގައި އަލުން އިސްތިއުނާފު ނުކުރި ނަމަވެސް އެކަމާ ގުޅިގެން އަޅަންޖެހޭ އެހެން ފިޔަވަޅުތައް ދިރާސާކުރަމުން އަންނަ ކަމަށް ވެސް ބުނެފައިވެއެވެ.
ކޯޓުތަކުން މިމައްސަލަ ބޭރުކޮށްލުމުން، މަޖިލީހުގެ ޖުޑީޝަރީ ކޮމިޓީން ވަނީ މިމައްސަލަ މިހާރު ބަލަން ފަށާފައެވެ. އެގޮތުން އެ ކޮމެޓީން މިއަދު ބޭއްވި ބައްދަލުވުމުގައި ކޮމެޓީން ވަނީ މި މައްސަލައާ ގުޅޭ ކަންކަން ސާފުކުރުމަށް ޕީޖީ ޝަމީމް ކޯޓަށް ހާޒިރުކުރަން ނިންމާފައެވެ. މިފަދައިން ނިންމީ މިބައްދަލުވުމުގައި ބައިވެރިވި ހުރިހާ މެންބަރުންގެ އިއްތިފާގުންނެވެ.
